Mbouj dwg lwi, haxbaenh Loz Siujhungz mingzmingz maij yawj gij ngaeuzbaihlaeng de, ngaez dwk ngauzngauz gyaeuj, raemxda ronghliklik youq ndaw lwgda de baenq.

Gyausou dwgrengz daet mbaw va, cengq da caengz de raurau, saeknaj henjcangcang. Mbwn oemsaengsaeng, de cijndei aeu genbuh uetuet naedhanh najbyak. Diuzbuh gaenq deng hanh mbaeq dingz ndeu, hoeng fwngz lij rag gij gaenz fag daetrongfaex, seiqhenz raq dem raq sing coegrwz yiengjcaca. Loz Siujhungz deng saenqdaenh dwk nyaeuq najbyak byaij daengz henzndang de. Gyausou gaem gaenzfwngz engq ndaet, guh ndaej engq vaiqvid. Couh lumj miz vunz yaek aeu mingh de nei, de lumjnaeuz gig guhhek, gig mbouj nyienh daet bae doenghgij vava nywjnywj neix.

Loz Siuhungz dep daengz henz ndang de. Gyausou baknaek mbouj gangjvah. Loz Siujhungz mbwdmboed gangj:“Gou siengj ndei lo.” Sing de gig iq, di neix gyausou gig habhoz, yienghneix de cuengq fag daetrongfaex roengzdaeuj, ngeng ndang cim de:“Gangj ba.”

Loz Siujhungz miz di ngaez, lujlaj youh mbeilek, hawj vunz nanq mbouj rox. Seizneix de sawqmwh roengz gietsim:“Hawj gou guh lwgbawx mwngz!”

Loz Siujhungz gangj dwk dinghrwd, soengsat. Gyausou vutvak fag daetrongfaex, byaij bae coh aen daengqraez lajfaex, gag naemj gag ngeix. De mbouj ngeux gyaeuj bae yawj mehyoux de: Dwgcaengz! De baenzlawz cungj dwg yienghneix heux mbouj gat, dwgcaengz lai. Doeklaeng, vih gaijgez ndei aen vwndiz neix, de hix mbouj ngeux gyaeuj yawj dah de, mwh dahyoux de byaij daengz henz ndang de youhcaiq bungq cikfwngz coyab de, cikfwngz yaengx hwnjdaeuj de lumj diuzbien nei duiq roengzdaeuj.

“Baenzneix, mwngz dwg mbouj doengzeiq lo.” Loz Siujhungz cimyawj de naeuz.

Gyausou naengh youq gwnz daengqraez, got gyaeuj naemj lo. Loz Siujhungz buenx de naengh roengzma, cimyawj de mbouj yaep da, lauheiq de sawqmwh mbouj raen, lumjnaeuz vunzhung gamyawj lwgnyez nei. Hoeng yaek gvaq ngeihcib faencung lo, gyausou lij lumj ngauq rin ndeu nei baknaek mbouj gangjvah. Loz Siujhungz caen nyaenx mbouj ndaej lo, ndwn hwnjdaeuj youh naengh roengzbae, yawj swix yawj gvaz, youhcaiq ndwn hwnjdaeuj, heux youq seiqhenz ndang gyausou. Roxnyinh lij dwg mbouj naihfanz, iet song cik fwngz, hix mbouj guenj miz mbouj miz vunz dingq, conghbak couh namhboedboed gangj: “Fanjcingq……couh yiengh- neix, gou……couh yienghneix……gou aeu genh- ciz……Saehyak, gangj okdaeuj……saehyak……”

Gawq “saehyak” neix daj conghbak Loz Siuj- hungz gangj okdaeuj, seiqvunz gyausou couh faen baenz song duenh: Saehyak; mingzdaeuz ndei. Geij ngoenz gvaqbae le, de sikhaek banh bonj cingq- gietvaen hawj de, roengz hugouj hawj Loz Siujhungz, lwgbawx couh yienghneix aeu haeuj ranz lo.

Bawxmoq ngeihcib sam bi, lwggwizmoq cibgouj bi. Gyoengqde baenzgya le gvaq ndaej gig ndei.

Bawxmoq venj rim doxgaiq dajcang seiqhenz bangxciengz ndaw ding, miz aen swx vameizgveiq aeu suliu guh, miz moegyou caengj aeu faex guh, miz gvaenghsiengq hung bonjfaenh. Aenaen dou cungj cuengq miz boux vunzgyaj ndeu, fwngz gaem fag yangj ndeu, hawj ndaw ranz neix yawj daeuj caen lumj ranzfangz, bouxwnq mbouj gamj doeng byaij sae byaij.

Youq ndaw rug, bawxmoq aeu baengz saeknoh goemq gwnz dingj caeuq seiqhenz bangxciengz，venj song aen daengbauqgingj iqetet youq song baih ndaw benjdou, baez miz vunz caij youq gwnz benj lajdaej baihrog dou, aen daeng neix couh rongh hoengzijij.

“Neix dwg daxboh gag cauh dandog.” Mizseiz de yaengx mehfwngz daekeiq dwk lwnh hawj goenggvan caeuq vunzlai.

Ngoenznaengz banhaet cibit diemj hwnq le, bawxmoq couh bae cawj haeuxringz, danghnaeuz mbwn cingxgvengq, de couh lawqlawq ndwn youq yangzdaiz, maezmwd muenghyawj aen laeuz gyausou guhhong haenx, danghnaeuz lij ndaej hoengq, de couh lai yawj yaep ndeu. Lwggwizmoq senq okbae gai faenh bauqceij ceiq seizhwng haenx lo.

“Baenzgya le, gvaq saedceij lo.” Gyausou naeuz:“Mbouj ndaej lumj doenghbaez neix lo, aeu doz di cienz, gvaqlaeng saedceij cij gvaq ndaej ndei.”

Ndigah lwggwizmoq itcig daengz daengngoenz roengz bya cij dauqma, banringz yaek soengq haeux bae hawj de. Yah gyausou youq baihdoeng giz gyaegyanggyang hwnjban, youq ndaw danhvei gwn haeux, daengz haemh cij ma ranz. Gvaq banringz le, aen rug saeknoh haenx, couh bienqbaenz aen rongziq bawxmoq caeuq gyausou gig dwggyaez ndeu.

Daengz banhaemh, daengx ranz vunz nanzndaej doxcaemh gwn haeux. Bawxmoq yienghceij laux- saed, beizheiq unqswnh, loengh gij byaekhaeux ndeiyawj youh feihfwd haenx, hawj caezgya gamj- doengh、vuenheij. De ciengzseiz ndwn hwnjdaeuj nip byaek hawj goengbuz caeuq bouxgvan.

“Aeu lai gwn di gyaeqgaeq. Mwngz byom lo.” De naeuz bouxgvan. Hoeng bouxgvan ne, baknaek mbouj haengj gangjvah, cij guenj gwn, nip byaek hix caenh geb aen buenz dangqnaj bonjfaenh, ciengzseiz gwn mbouj daengz byaekndei, ndigah Loz Siujhungz gaenx nip byaek hawj de.

“Mwngz ha, lwgbawx, dwg bouxvunz gaugviq youh hauqswnh ndeu,” mehlaux naeuz,“hoeng mwngz miz yiengh ndeu gig mbouj ndei.” Vah gangj daengz neix, bawxmoq naj hungzvang liux, cik dawh gyausou doek roengz lajdieg. “Aen loengcawq gig haenq ndeu.” Mehlaux dingz yaep ndeu youh naeuz:“Mwngz mbouj gvensim aen ndang bonjfaenh saek di. Mwngz cungj dwg you dou gwn mbouj ndei.”

“Gou……mbouj iek, baenz ngoenz cungj youq ndaw ranz， mboujmiz saeh couh hwnj muengx.” Bawxmoq unqswnh dwk naeuz, fajnaj hoengzfwdfwd.

“Hoeng, mwngz rox baenzneix guh yaek yingjyangj daihlaeng lwi?”

“Mbouj itdingh law? Daxmeh gou seng gou seiz, ngamq faen naz daengz hoh, haeux gwn cungj mbouj imq……Gou hix maj ndaej maqhuz ndei ha. ”

“Mwngz yawj dah neix.” Mehlaux riu lo.

“Deng ha,” gyausou lumjbaenz hix yawj ndei ndangdaej de, nyaenx mbouj ndaej naeuz,“youq ndaw vwnzyozyen raeuz, mwngz dwk lanzgiuz ceiq ndei……Daeuj, gou nip gaiq noh gaeqndaem hawj mwngz!”

Gwn caeuz sat le, bawxmoq sousib daizhaeux, yienzhaeuh dwk dienhvah caeuq doengzhag gangj- goj, roxnaeuz hai aen youzsieng denswj bonjfaenh, roxnaeuz caezgya gvaengx youq dangqnaj VCD ciengq go, roxnaeuz dwk geizciengh, doxlwnz dwk, gou cienggun mwngz, mwngz cienggun gou, nauh- yied dangqmaz. Ngoenzngoenz lumj yienghneix.

Lwggwizmoq lumjbaenz youq baihrog dingqnyi gijmaz, lumjbaenz dwg daxboh caeuq mehyah bonjfaenh miz maz nanaengq. De itloh daemh dwngx byaij ma ranz, simnyap dangqmaz, saehyak ragsik aen aek de. Song lwgda de hoengzndat, gig hojsouh dwk yawj gyoengq vunzlai songhenz gai. Gyoengqde hix geizheih dwk yawj de. Baenzneix gaenq mbouj dwg baeznduj lo, lumjbaenz daj baenzgya couh yienghneix. Gvaiq mbouj ndaej miz vunz naeuz de daengzcog aiq dwg bang bouxwnq seng lwg, bang hagseng iq ndeu caemh riu de. Gyoengqvunz baebae dauqdauq, mbouj miz saek boux leixlangh de. Gyoengqde yawj mbouj hwnj boux vunz gyad neix saek di…… (2)