6 nyied 6 hauh daengz 7 hauh, Gvangjsih Minzcuz Yijvwnz Yenzgiu Cungsim youq Namzningz banh aen ban son baenzlawz biensij sawloih Sawcuengh. Swcigih Minzcungjveij dangjcuj cwngzyenz、fucujyin Veih Yungjhungz camgya aen yizsiz haiban caemhcaiq gangjvah. Gungh miz gyawj 70 boux camgya, gyoengqde dwg lauxhangz Sawcuengh caeuq boux guh hong Sawcuengh, daj Aen Siz Vahcuengh Sawcuengh Cunghgoz Minzcuz Yijvwnz Fanhyizgiz、Gvangj- sih Minzcuz Bause、Gvangjsih Sam Nyied Sam Cazcise、Gvangjsih Sawcuengh Yozyau caeuq aen cungsim neix daengj danhvei daeuj.

Baez son’gyauq neix youz Lanz Ligoz bozsw、Liuz Yizdangz yizsinj daengj lauxhangz hwnjdangz; gyoengqde daj Aen Siz Vahcuengh Sawcuengh daeuj. Gyoengqde hwnj gij dangz《Gij Yenzcwz Caeuq Fuengfap Biensij Swzdenj》《Gij Ndabaij Caeuq Yienghlaeh Biensij Swzdenj》《Dang- ciengz Youq Ndaw Dennauj Raiz Diuz Sawloih Hawj Vunz Yawj》daengj, daj gyaeuj daengz rieng cungj son gyoengq bouxhag rox vihmaz biensij、ciuq gijmaz biensij caeuq baenzlawz biensij.

Ciuq cam rox, aen cungsim neix bineix couh heijguh hong bien song bonj sawloih Sawcuengh——《Sawloih Gun Cueng Genjmingz》《Swzdenj Doiq Hoiz Mingzcienmonz Gun Cuengh》, dajsuenq 3 bi guhsat. Ndawde《Sawloih Gun Cuengh Genjmingz》sou sawloih Sawgun daihgaiq 3 fanh diuz, daengx bonj saw daihgaiq 150 fanh cih;《Swzdenj Doiq Hoiz Mingz- cienmonz Gun Cuengh》dajsuenq sou sawloih Sawgun daihgaiq 4 fanh diuz, daengx bonj saw daihgaiq 120 fanh cih. Song bonj saw neix langhnaeuz bien baenz, daihdingzlai dwg hawj boux guh hong fanzhoiz caeuq bouxlauxsae hagseng song vah saw yungh, hix ndaej hawj boux yenzgiu Vahcuengh Sawcuengh yawj caeuq yungh.

（raiz/Yangz Yijcingz、Ouh Caij- fangh ingj/Liengz Cunh）