De dwg boux hagseng maenhndei hag Sawcuengh ndeu, daj boux- dajgoeng、bouxcauhnieb daengz yinz- da daibyauj, ciuhvunz de itcig youq ranzmbanj, daiq vunzlai duet gungz bienq miz. De doiq cihsaw “Cuengh” gig miz gamjcingz, “Boux- cuengh” “Mbanjcuengh” “Bawx Mbanjcuengh” daengj saw gapbaenz le gij hoenz giyez de. De caeuq sicangj caemh daiz cigboq gai huq, dawz gij doxgaiq daegsaek mbanjranz gai daengz daengx guek gak dieg bae. De couhdwg Gvangjsih Denzdungh Yen Bawx Mbanjcuengh Youzcaz Mizhanh Gunghswh Cwnz Cauhyez.

“Mboujguenj Guh Gij Saeh Hung Roxnaeuz Iq, Cungj Aeu Lauxlaux Saed- saed Bae Guh”

Gaxgonq Cwnz Cauhyez youq Denzdungh Yen Minzcuz Cunghyoz (diemjson’gyauq Cuengh Gun song vahsaw) doegsaw, seizde gij cingzcik Sawcuengh de gig ndei. 1993 nienz cuhcungh bizyez le, de mbouj laebdaeb doeg roengzbae lo, daengz bouqgairaemxnae ndaw cin daj- goeng, baez guh couh ndaej song bi.

1995 nienz, Cwnz Cauhyez baenzranz lo, gvaqlaeng, de gietdingh gag cauhnieb. Ndaej daengz vunz ndaw ranz cihciz le, de bae gwnz haw Sozliengz Cin co aen bouq ndeu, cawx aen gihgi guhnae, gai raemxnae、naediuz. Cwnz Cauhyez gaenx guh lauxsaed, canh ndaej di ngaenz.

“Boux Buet Ndaej Ceiq Vaiq Mbouj Itdingh Ndaej Guhbaenz, Hoeng Boux Itcig Buet Dingh Ndaej”

Ngoenz ndeu, boux vunz he byaij haeuj aen bouq Cwnz Cauhyez, siengj caeuq Cwnz Cauhyez doxgap gai youzcaz. De ok gihgi, Cwnz Cauhyez ok dieg, canh ndaej cienz bingzfaen. Cwnz Cauhyez gag naemj: Dieg ndaw bouq hoengqvatvat mbouj guh maz hix aeu hawj baenzlai cienzco, caeuq de caez guh, lij yinx ndaej vunz daeuj ndaw bouq cawx gijwnq, neix dwg aen gaicawx itdingh ndaej ngaenz. De mbouj ngeix lai, doq doengzeiq lo, Cwnz Cauhyez bi haenx couh faen ndaej geij cien maenz.

Raen songde canh cienz baenz- neix lai, bi daihngeih boux lauxbanj de couh deng caencik de rag bae gai youzcaz. Cwnz Cauhyez mbouj doek- naiq, gietdingh gag guh gij gaicawx youzcaz. Mbouj geij nanz, de caeuq ranzmeh ciq ndaej 7500 maenz cawx le aen gihgi caq youz ndeu, caiq cam baengzyoux ciq le song sam cien maenz daeuj cawx aen caizyouzgih he, aen ranzcaqyouz ndeu couh laebbaenz lo, doq ndaej hai hong caq youz.

Aenvih youzcaz mbouj ndaej gwq caq, baezlaeng sam seiq bi, aen ranzcaqyouz Cwnz Cauhyez mbouj canh ndaej saekdi cienz, cij ndaej baengh gai naediuz caeuq huqcab gvaq ngoenz. Daengz bi daihhaj, de dem aen gihgi le gij seng’eiq cij menhmenh bienq ndei hwnjdaeuj, ngoenz ndeu caq ndaej ok song dun youzcaz. Aenvih gij youzcaz de ndei caemhcaiq de guh vunz ndei gangj lauxsaed, mbouj geij nanz gij youzcaz de couh gai ndaej gig ndei lo.

Raen gij gyaq youzcaz youq 2015 nienz moix gaen gai 20 maenz, daengz 2016 nienz hwnj daengz moix gaen 40 maenz, youzcaz gai ndaej yied daeuj yied bengz, hoeng, gij vunz daeuj cawx cix yied daeuj yied lai. Seizneix, gij youzcaz aen ranzcaqyouz Cwnz Cauhyez gaenq mbouj gaeuq gai lo, de hainduj ngeix daengz ngoenzlaeng.

“Gou Dwg Bouxcuengh, Maj Youq Mbanjcuengh, Ndigah Couh Heuhguh ‘Bawx Mbanjcuengh’”

2015 nienz, Cwnz Cauhyez youq Denzdungh Yen Nazbaz Cin laebbaenz le Gvangjsih Denzdungh Bawx Mbanjcuengh Youzcaz Haifat Mizhanh Gunghswh, caemhcaiq cawx dieg guh aen cangj caq youzcaz, gvangq miz saek 10 moux. Seizneix gunghswh bi canjciz miz 500 fanh maenz, dwg gij gveihmoz ceiq hung、sezbei ceiq senhcin ndaw Denzdungh Yen. 2016 nienz, Cwnz Cauhyez vih gij canjbinj guh aen sanghbyauh heuhguh “Bawx Mbanjcuengh”.

“Vihmaz heuhguh ‘Bawx Mbanj- cuengh ne?” Gicej cam.

“Gou dwg Bouxcuengh, maj youq Mbanjcuengh, haq vunz le couhdwg bawx lo, ndigah couh heuhguh ‘Bawx Mbanjcuengh’ ha.” Cwnz Cauhyez angqvauvau naeuz.

2016 nienz, gij yienghbinj youz- caz Bawx Mbanjcuengh soengq daengz Nanzningz genjcwz, cungj dwg gij biucinj it gaep, gij mingzdaeuz youzcaz Bawx Mbanjcuengh menh- menh gyae’gyawj cungj rox lo.

“Haemhneix 7 Diemj- cung, Sicangj Caeuq Mwngz Doxiu Youq Dauzbauj Cig- boq Gai Huq”

4 nyied 16 hauh banhaet 7 diemj 11 faen, Cwnz Cauhyez youq ndaw baengzyouxgien veihsin de fat:“Haemhneix 7 diemjcung, Baksaek Si cangzvu fusicangj caeuq mwngz doxiu youq Dauzbauj cigboq gai huq, youzcaz Bawx Mbanjcuengh youq gizneix caj mwngz!” Haemhhaenx 7 diemj daengz 9 daemj, Baksaek Si cangzvu fusicangj Siz Gozvaiz caeuq Cwnz Cauhyez youq Dauzbauj caemh daiz cigboq gai youzcaz Bawx Mbanj- cuengh.

Haenqrengz le 4 bi, “Bawx Mbanjcuengh” gaenq baenz gij nungzcanjbinj ndei Baksaek lo. 3 nyied 16 hauh, Denzdungh Yen Yinzminz Cwngfuj fuyencangj Se Yaujgangj hix youq Ginghdungh cigboq bang gai gij youzcaz Bawx Mbanjcuengh, caeuq vunzlai gaisau senhconz gij nungzcanjbinj miz daegsaek Denzdungh.

“Ndaej Buenx Mwngz Byaij Daengz Giz Engq Gyae, Cij Miz Ndangcangq”

Gij youzcaz dwg gij youz doenghgo guek raeuz gag miz, dwg aeu ceh goyouzcaz caq baenz. Goyouzcaz youq Yizbwnj caeuq geij aen guekgya Dunghnanzya miz di ndwi, cij miz guek raeuz ndaem miz haujlai. Ndaw youzcaz hamz miz gij yenzsu sinh lai raeuh, beij youq ndaw youz duhhenj lij lai 10 boix; ndaw youzcaz hamz miz lai cungj anhgihsonh, dwg sojmiz youz- gwn ndawde ceiq lai. Caemhcaiq goyouzcaz dwk vafeiz caeuq nungzyoz couh mbouj baenz mak lo, ndigah dwg gijgwn denhyenz, gig ancienz.

“Ndaej buenx mwngz byaij daengz giz engq gyae, cij miz ndangcangq.” Cwnz Cauhyez gangj. Gij suijbingz swnghhoz vunzlai ngoenz doek ngoenz ndaej daezsang, caemh- caiq miz engq lai vunz rox gij ndeicawq youzcaz, de nyinhnaeuz doeklaeng gij youzcaz itdingh yied gai yied ndei、yied gai yied lai.

“Gou Cij Dwg Boux- guhnaz Ndeu, Cij Rox Guh Saedsaeh”

Cwnz Cauhyez guhbaenz lo, hoeng de mbouj lumz gyoengqvunz henz ndang lij caengz duet gungz gvaq. De dwg Denzdungh Yen yinzda daibyauj, itcig ngeix baenzlawz daiq vunzlai duet gungz bienq miz. Lai bi daeuj, de mboujduenh dawz gij ginghyen guhbaenz cauhnieb son hawj vunzlai, caemhcaiq daiqlingx gyoengqvunz fatcaiz byaij hwnj roen siujgangh. De daiqdoengh le 55 hoh duet gungz bienq miz, caeuq 291 aen hozcozse、600 lai hoh ciem le gij hezyi ndaem goyouzcaz, aen giyez de ciengzgeiz miz 30 lai aen gangjvei ciu bouxguhnaz daeuj guhhong.

Seizneix, Denzdungh Yen ndaem goyouzcaz aiq miz 46000 moux, ndaem youq Nazbaz Cin、Sozliengz Cin caeuq Yihih Cin 3 aen cin. Cwnz Cauhyez vih gij hong duet gungz Denzdungh Yen dem rengz haujlai.

“Gyoengq lingjdauj ndaw yienh heuh gou gangjgangj gij goj bonjfaenh, gou naeuz gou mbouj rox gangj, gou cij dwg bouxguhnaz ndeu, cij rox guh saedsaeh.” Cwnz Cauhyez giemhaw naeuz.