Seizneix ranz ndaw singz ngoenz beij ngoenz hwnj gyaq, swhgeij it ndwen mbouj miz geijlai ngaenz souhaeuj, seizneix naemj doq youq ndaw singz cawx ranz beij hwnj mbwn bae lij hoj, naemj daengz neix, Daegcangj hix mbouj gamj guhsing lo, de roxnyinh gig mbouj miznaj.

Baezneix ndei lo, de ndaej gag sezgi, ndaej youq gunghswh youh lingh dem miz souhaeuj, yienghneix guh roengzbae, mbouj daengz song bi, de couh ndaej cawx ranz lo, de aeu vaiqdi dawz gienh saeh angqyangz neix lwnh hawj Dahlouq nyi.

Mbwn laep dingh, Daegcangj daeuj daengz diegyouq Dahlouq. Doenghbaez de yaek daeuj, cungj dwg sien dwk dienhvah hawj Dahlouq, baezneix de naemj hawj Dahlouq doeksaet baez he, de miz yaekseiz hai dou.

Caen dwg daenj buh moq mbouj bungz goengda, daenj vaq rengq raen yahnax. Daegcangj hai dou haeuj rug seiz, raen Dahlouq cingq caeuq ndaek bouxsai he doxgot.

Seizhaenx Daegcangj caen naemj cung gvaqbae roq ndaek sai haenx geij ngauq gaemxgienz, hoeng de naemj daengz coenz vah bouxgeq naeuz “gaeq mbouj gyaeng, baenzlawz bae gyaeng yiuh”. Daegcangj naeuz:“Louq, raeuz doxmaij bi lai lo, mwngz couh naemj yienghneix cuengq bae gij cingzngeih raeuz la?”

Dahlouq naeuz:“Dwg lo, bi lai neix mwngz ndaej hawj gou maz? Caiq caj mwngz geij bi, mwngz youh ndaej hawj gou maz? Mwngz dauqbae ba, gou gaenq gietdingh gaen de, ngoenz- laeng raeuz caiq mbouj doxra lo.”

Daegcangj mbouj guhsing, baenq ndang dauqbae lo.

Bihaenx yaek daengz cieng, gyoengqvunz bae baihrog dajgoeng bouxboux aemq daeh dawz rap maranz gvaq cieng, ndaw cehcan vunz bae vunz dauq ndaetfoedfoed. Dahgyaeu hix daj yienhsingz dap ci dauqbae ranzmbanj.

Lajmbanj roen bya van lai, Dahgyaeu miz di ngunh ci, mbouj rox ci hai bae le geijlai nanz, Dahgyaeu couh baiqninz lo, de fwt dingqnyi miz vunz gangj:“Liux lo, liux lo, ci bae mbouj ndaej lo.”

Dahgyaeu hai da seiz, raen ci gaenq youq gyang roen dingz roengzdaeuj, bouxhaici doq gangj doq roengz ci bae, yaep he youh hwnj gwnz ci daeuj, doiq vunzlai naeuz:“Ci bae mbouj ndaej lo, daihgya roengzbae lingh dap ci wnq dauqbae ba.”

Ndaw ci 30 lai boux vunz, boux gangj neix boux gangj haenx nauh- humhum, Dahgyaeu hix vueng lo, gag naemj: Danghnaeuz caiq nguh bae diemj lai song diemjcung cij miz ci daeuj, mbwn laep lij mbouj ndaej daengz ranz bw, ngoenzneix caen boihseiz.

Vunzlai cingq ndwn hwnjdaeuj, bouxboux gaem daeh riuj doxgaiq yaek roengz ci bae seiz, daegcoz he naeuz:“Daihgya sien gaej muengz roengz ci gonq, gou bae yawjyawj ci dwg gizlawz vaih, coih ndaej couh coih, coih mbouj ndaej raeuz caiq roengz ci hix mbouj ceiz.”

Dahgyaeu riengz sing yawj gvaqbae, de da baez rongh: Daegcoz neix mbouj dwg Daegcangj mbanjnden ha, geij bi mbouj raen de lo, de lij lumj yiengh gaeuq mbouj bienq saekdi, mbouj rox de seizneix youq gizlawz guh maz hong.

Daegcangj miz boux godangz he youq yienhsingz coih ci, mwh de lij doegsaw seiz, baez cuengqgyaj de couh bae gaen godangz hag coih ci, ra ndaej ngaenz bae doegsaw hix hag rox di bonjlingx coih ci.

Daegcangj roengz ci bae, cazyawj yaep he youh saet hwnj ci daeuj, de biengj hwnj gep fa goemq gyaeuj ci haenx hwnjdaeuj, fwngz gaem fag banjsouj he doenghdoengh geij baez, gij din fwngz de suglienh, miz gyaeuj miz rieng.

Daegcangj doengh yaep he, couh heuh bouxhaici fatdoengh aen ci yawjyawj. Ci maenjhwhw, youh ndaej hai bae lo. Ndaw ci vunz gangj- nyannyan, bouxboux cungj haenh Daegcangj vunz ndei bonjlingx maenh. Dahgyaeu hix gamjdoengh lo, gig naemj gvaqbae caeuq Daegcangj gangjgangj geij coenz, ndaw ci yauzngengngeng, doxgaiq youh lai, baedauq mbouj fuengbienh, cij ndei naengh youq.

Ci daengz gwnz haw dingz roengzdaeuj seiz, mbwn fuemxfubfub, gag boux muengzfoedfoed ganj maranz.

Daj gwnz haw daengz ndaw mbanj lij miz duenh roen he, seizneix gaenq mbouj miz ci bae lajmbanj, Dahgyaeu dajsuenq byaij roen dauq- bae, de byaij daengz baihnaj Daeg- cangj, naeuz:“Vei, lij geiq ndaej gou lwi?”

Daegcangj baenq gyaeuj dauq laeng yawj yaep he, de naemj yaep he le naeuz:“Mwngz dwg Dahgyaeu? Yo, geij bi mbouj raen, yied maj yied gyaeu lo.” Dahgyaeu rox Daegcangj gangj gij vah neix dwg vah mbouj ciuq sim, hoeng dingq daengz gij vah neix de hix gig simhai.

Daegcangj cam Dahgyaeu baenz- lawz dauqranz, Dahgyaeu naeuz dajsuenq byaij din dauqbae, Daeg- cangj naeuz:“Gou miz caencik youq gwnz haw, gou bae ciq mozdoz de bae ranz gonq, ngoenzlaeng caiq hai dauq hawj de, mwngz mbouj yiemz couh gaen gou dauqbae.”

Dahgyaeu naeuz:“Ndei lai lo, yienghneix couh sinhoj mwngz lo.” Gij saeh gyoengqde couh yienghneix haidaeuz.

“Did——did——” rog ranz miz sing ci yiengj, ciep daeuj youh dwg sing bauq “bili bala” yiengj hwnjdaeuj. Dahgyaeu rox vunz ciep bawxmoq daeuj daengz lo, de ndwn youq naj aen gingq, byoemgyaeuj nyungq lumj aen rongzgaeq nei, yakyawj dangqmaz, de caen naemj aeu fagroi roi geij baez, hoeng seizneix de roi mbouj ndaej.

Dieg Dahgyaeu miz sibgvenq, lwgmbwk ngoenz okhaq yaek okdou gaxgonq daegdaengq dawz byoem- gyaeuj sanq roengzdaeuj, byoemgyaeuj caiq nyungq caiq baenzlawz raemh lwgda hix mbouj ndaej gag roi, aeu caj goengnax roi sam baez le, cij ndaej gag roi.

Goengnax caeux couh fwngz gaem aen roi he ndwn youq bakdou.Seizndei daengz le, Dahgyaeu caeuq gyoengq yahbuenx daeuj daengz bakdou, goengnax couh caenfwngz bang Dahgyaeu roi gyaeuj, doq roi doq damz:

“Hai baez roi daih’it,

Bae ciengx bit ciengx gaeq.

Hai baez roi daihngeih,

Bae ndaem reih ndaem naz.

Hai roi baez daihsam,

Bae caux ranz caux gya.”

Goengnax roi gyaeuj cij ndaej okhaq aen sibgvenq neix, eiqsei dwg hoh dahlwg bae daengz ranzvunz le, guh maz ndaej maz yienghyiengh swnhsim. Goengnax roi gvaq sam baez le, Dahgyaeu couh suenq haq okbae lo.

Guh laeuj cingj hek gvaq le, Daegcangj caeuq Dahgyaeu daeuj daengz yienhsingz, gienh saeh daih’it gyoengqde couhdwg bae cawx dauq ranz he gonq. Gyoengqde gaenq miz dajsuenq, dauq ranz neix aeu miz 4 aen rug, aen he gyoengqde youq, aen he bohmeh Dahgyaeu youq, aen he bohmeh Daegcangj youq, aen he daengzcog miz lwg le hawj lwg youq. Daj baezneix hwnj, song ranz vunz couh guh ranz ndeu.

Naemj cawx aen ranz baenzneix hung, aeu miz roek caetcib fanh cij ndaej. Gyoengqde bae yawj ranz, raen miz dauq ranz he hab’eiq, couh giet- dingh cawx roengzdaeuj.

Bouxgairanz cam:“Sou naemj baeznduj hawj geijlai ngaenz? Dai- gvanj geijlai bi?”

Daegcangj naeuz:“Dou dwg ngaenzhau baez ndeu gyau caez.” Daegcangj gangj le, gyoengq dah- gairanz bouxboux iet linx.

Gyau ndei ngaenz, banh ndei gij soujsuz cawx ranz, Daegcangj daeuj daengz gunghswh bauqdaengz, daj- suenq ngoenzcog couh hwnjban. Lauxbanj doiq Daegcangj naeuz:“Gou yaek bae gizwnq lingh hai aen gunghswh ndeu, aen gunghswh neix gou siengj hawj mwngz bang guenjleix, daj ngoenzcog hwnj, mwngz couh guenj aen gunghswh neix ba!”

Daegcangj miz di doeksaet, naeuz:“Lauxbanj, gou lau gou gwed mbouj hwnj diuz rap neix ne, mwngz dwg mbouj dwg hawj bouxwnq guenj ha? Mwngz cuengqsim, doeklaeng gou hix nyienh laebdaeb vih gungh- swh okrengz, mbouj miz siengjfap wnq.”

Lauxbanj naeuz:“Geij bi neix, gou caeux couh naemj caiq hai aen gunghswh moq, cungj ra mbouj ndaej boux he ndaej ciepfwngz gou. Gou raen mwngz guh saeh gig nyinhcaen, guh vunz youh roxsoq, mwngz couh- dwg boux vunz gou naemj ra haenx, ndeindei guh ba.”

Daegcangj dingq le gikdoengh ndaej yaek gangj mbouj ok vah bae, yaep he de vah ndat naeuz:“Lauxbanj mwngz cuengqsim, gou aeu cienzsim cienzeiq dawz gunghswh guh ndei, mbouj hawj mwngz saetmuengh.”

(sat)