Bouxlaux boihfwngz youq baihlaeng, goemz gyaeuj lumj duj va’ngaeux naiqnueknuek nei. De youq ndaw ranzlaeuz red mbouj laeuh rumz haenx, byaij bae byaij dauq. Lwgda baez mig, diuq gvaq benq dem benq diegnywj、led heu caeuq gizgyae baenz doengh baenz doengh ranzlaeuz. Ciengzhumx gaenh raixcaix, hoeng bouxlaux itcig siengj mbouj doeng, aen ranzlaeuz neix vihmaz baenz gvangq. Mwh raizra mbouj miz rumz, daengngoenz banhaemh loengh dumz gij ndaejgeiq de. Cijaeu najbyak baez nyaeuq, gij saehranz saetnaj haenx, youh diuq ok dangqnaj, lumj duzroegguj ndaw banhaemh, cungj dwg duix gyaeuj cimyawj de, baknaek mbouj caeuq de gangjvah.

Seiz ven sim daengz ndok haenx, lumj gep canzcog yienzbauq, sieng youq ndaw noh, dwg gij indot gwnz ndang ciengxlwenx caenj mbouj ok de. Bouxlaux vanzlij ndaej geiq gij feihdauh cenj laeujmakit haenx, gij haemzhoj gwn yw loek haenx, gij roxnyinh hawj aensim vunz yakrwix daengx ndang mbouj cwxcaih haenx. Bouxlaux ndaej geiq seizhaenx de mbouj bae funghdajswiq, saedsaeh ganj mbouj gib yienghneix guh, hix mbouj miz rengz rueg gij huqfeiq feihdauh gig yaez neix okdaeuj. De hixnaengz naengh daengz lajdieg, naengh youq gwnz daengqraez suenva laeng ranz, gen ga naiqnuek- nuek, aendungx bongqbwt, lwgda hix dwg gik- ganggang, couh lienz gij valup meizgveiq seiqhenz ndaw suen cungj mbouj miz yinxdaeuz mig saek mbat da.

“Gou baeg lo.” De mumjgyumq lij mboujaiq saenq gijneix ne.

Aen gyaeuj de ing haeuj gwnz naeng faexyilanz, gijmaz hix mbouj gvansim. Couh lienz mehmbwk ndeu gvaqdaeuj, seixneix, dah de hauxseng gyaeundei, cangdaenj gyaqciq, dasang ndaengndiengq dangqmaz, caenhguenj gij noh gwnz naj de gaenq soengsad lo. Mehmbwk haenx couh lumj ngamq benz gvaq geij mbaek lae nei, daengx naj hoengz’ujuj, miz di baeg he. Dah haenx byaij gvaq dangqnaj de, riuj dinvunj couh caeuq de caemh baiz naengh roengzdaeuj. Mehmbwk neix heuh Loz Siujhungz. Couh dwg dah daihhagseng raeuz yaek gangj haenx, Loz Siujhungz.

“Miz maz saeh?” De laep da dwk cam.

Loz Siujhungz dangyienz mbouj sikhaek dap vah. De ndwn hwnjdaeuj, yamq coh baihnaj, menhmenh yawjyawj seiqhenz, naengh roengzma, yawj yienghceij lumj dwg baeg lo, roxnaeuz dwg miz di moengx, ndigah ndwn mbouj ndaej lo. Riengzlaeng naengbak haunyo de doenghyubyub haujlai nanz, huj dwk caenhrengz yaek gangj ok vah daeuj.

“Gyausou, aendungx gou raeng lo.” Doeklaeng de cungjsuenq gangj okdaeuj lo, ngiengx gyaeuj yungh cehda hungloet caeuq buengzda nem miz raemxda de cimyawj gyausou.

“Gijmaz?” De singsaeq naeuz, sawqmwh aenhoz daengj soh hwnjdaeuj, song lwgda cengq hai, caengz yawj de saenzdedded, dwglau raixcaix, din fwngz caez caepcat liux. “Gijmaz?” De youh naeuz baez ndeu, ndang saenzdwddwd.

Loz Siujhungz mbouj dawzhaeujrwz dwk daj ndaw daeh mbon ok mbaw ceij ndeu, yaengx sangfwd youq baihnaj gyausou, baenzneix ndaej hawj gij vah de engq miz baengzgawq, engq miz cingzsoq:“Gwnzneix miz song diuz sienq, mwngz mbouj dwg mbouj rox……”

“Ngoenzcog, couh bae yihyen, bae yihyen, bae yihyen ba.” Gij singdiuh gyausou gaenq dingh roengzma lo. Hoeng de mbouj rox, mehmbwk neix baenzlawz sawqmwh bienq ndaej ndaengndiengq lo. Loz Siujhungz gujgvaiq dwk riunyaen, dwg aenvih gij vahhoiz gyausou ngamq luenh naeuz haenx.

“Aen hugouj ndawsingz caeuq danvei guhhong gou baenzlawz yiengh la? Mwngz yaek yienghneix laih gvaqbae, gou bizyez le mwngz couh ndaej duet ndang lo……” De namhbedbed，lumjbaenz ndaenq haemz dwk cimyawj gyausou. “Seizcoz gou cungj sai youq ndaw rungj mwngz lo, vah mwngz lij suenqsoq lwi?”

Gyausou aeu fwngz lax byoemgyaeuj dah de. Dah de ngauzngauz gyaeuj ndoj deuz. Seizneix, dah de lumjnaeuz engqgya haeujsim yawj gyausou yaek baenzlawz guh. Loz Siujhungz sawqmwh baenzneix cam， gyausou laux saekseiz mbouj rox yaek baenzlawz guh lo.

“Hoeng.” Gyausou vuengmuengz dwk naeuz.

“O, gou cungjsuenq mbouj nanq loek.”

“Hoeng, gou itcig banh gienh saeh neix ho.” Gyausou sawqmwh gig mbouj naihfanz dwk ndwn hwnjdaeuj cimyawj de naeuz. “Mwngz cungj dwg yienghneix fanz gou. Mwngz roxyiuj gou youq cungj dienheiq baenzneix bae ra gvaq geijlai aen bouhmonz geijlai boux lingjdauj lwi, gou baeg lai bw? Gou gouz bouxwnq geijlai aeuqheiq? Mwngz dauqdaej vih gou siengj gvaq lwi?” Gyausou gikdoengh ndaej ca di couh daemh din lo, youhcaiq vad fwngz dajbeij. Gaendwk youh dwg ngoemxngwd. De geuj fwngz youq ndaw suen byaij bae byaij dauq; sawmwh youh muenghloengloeng yawj Loz Siuj- hungz, mbouj rox de yaek guh ok gijmaz saeh dwglau dem.

“Gou mbouj dwg yiengh vunz neix, cij dwg gvaqbouh gvansim roennaj bonjfaenh, aenvih, lijmiz buenq ndwen, couh yaek bizyez lo.” Loz Siujhungz ngaem gyaeuj dwk gej naeuz.

“Ndaej lo, gaej daeuj gizneix mazfanz gou baenzlai lo.” Gyausou byaij gvaqdaeuj bek mbaq- laeng de. “Raeuz bae yihyen ba.”

Dwen daengz yihyen, Loz Siujhungz couh ngauz gyaeuj. De caemswg naemj dwk. De gaenq majhungz lo. De mbouj siengj bae yawj canghyw. De baez naemj daengz boux sicangj ndeu gaxgonq yungh mbaw cwngqmingz guhhong cauhgyaj yaeuh ndaej dah cejsae ndeu; boux fugohcangj ndeu, dapwngq hawj dah hagseng cunghyoz ndeu dang misuh, song boux couh ndaej doxumj doxgot lo.

“Baengh gijmaz hawj gou saenq mwngz.” Gangj sat de daejnga’nga lo. De gaenq ienqheiq mbouj wnggai saekseiz cungdoengh, aeu gaiq baiz seizcoz daeuj guhdoj lo, de caemhcaiq roxnyinh utheiq. De siengj daengz sam bi gaxgonq miz bouxgaicawx ndeu daengzhoengq cingj de bae Aumwnz lijyouz, couh daej dwk engqgya goksadsad lo.

Dougamxdiet hai lo, ndaek vunz ga’gvez ndeu ngukngek byaij haeujdaeuj. Loz Siujhungz vuengmuengz uet raemxda hawq, gyausou ngeux ndang gaem dawz gij gaenz fag daetrongfaex, cangguh gig nginhcaen dwk daet mbaw va. Boux haeuj dou daeuj neix najsaek henj lumj makgam, yamqdin hix gig gaenj, dwg daeglwgdog gyausou. De raen Loz Siujhungz le, cij guhhek dwk cam coenz vah mwngz ndei ndeu, couh daemh dwngx gvax haeuj ndaw rug bae. De yaek cawj haeux la? Hoeng sing densi sikhaek goksagsag.

Gyausou gig habhoz dwk yawj aen conghcueng ndaw ding, couh lumj roxnyinh daeglwg bonjfaenh gig roxsoq nei. Ndaw fungh cingq yawj sinhvwnz guekrog. Miz vunz aeu gyaeqgaeq gvengq Gwz- linzdun cungjdungj guek Meijgoz. Miz ndaek vunz dawz cungq myab youq henz ndang Siujbusiz. Songde cungj mbouj leixlangh sinhvwnz cwngci, ukgyaeuj singjsak cienj dauqma. Loz Siujhungz haxbaenh yawjraen mbaq gvangqyub youh rengzdwd daeglwgdog gyausou byaij haeuj dourug, cungj roxnyinh viyiemz caeuq dasang vunz ndawsingz ciuqyiengh louz youq ndawsim de.

De yienznaeuz ndanggyad, gvez bae buenq cik ga, hoeng daengx ndang miz gij heiq ndawsingz, beijlumj, hugouj. Yienghndang de yawj mbouj dij, hoeng gij hoenz de dwg ndaej hawj vunz roxnyinh daengz. Couhlumj aen singz hung ceiq gangj mbouj cingcuj neix, hoj geiq hoj siengj, hoeng roxnyinh gig gyaeundei, hawj vunz gikdoengh.

(1)