Ginghcuz dwg Guengjsae 12 aen minzcuz cojyouq ndawde aen ndeu, hix dwg guek raeuz aen minzcuz vunznoix dog comzyouq henzhaij、baengh haij guhgwn ndeu. Dungh- hingh Si Gyanghbingz Cin Vuhdaeuz、Vanveij、Sanhsinh sam aen dauj vunzraeuz heuhguh “Ginghcuz sam dauj”, dwg gizdieg 2 fanh lai beixnuengx Ginghcuz comzyouq.

Ndangdaenj Ginghcuz cojcienz dwg aen bingzdaiz daeuz swnjcienz vwnzva cojcienz Ginghcuz. Ndang- daenj Ginghcuz aeu baengzcouz guh liuh, unqnemq soengsup, saedyungh youh ndeiyawj, yienjok gij daegdiemj minzcuz dwkbya dwknyaen noengzna haenx.

Bi 2010, gij dinfwngz guh ndangdaenj Ginghcuz ndaej lied haeuj Gvangjsih Bouxcuengh Swcigih daihsam buek feihvuzciz vwnzva yizcanj mingloeg, Fanz Aiyingh ndaej dingh guh bouxswnjcienz. De dwg Bouxgun, danhseih de dwg cangh rox dinfwngz guh ndangdaenj Gingh- cuz ndeu, neix ndaw guek raeuz mbouj miz geijlai boux; de hix dwg boux daih’it gaijndei ndangdaenj Ginghcuz.

Fanz Vwnzyingh seng youq 20 sigij 60 nienzdaih, de 20 bi hainduj hag guh ndangdaenj Ginghcuz, seizneix 30 lai bi gvaqbae lo, ndawde yienznaeuz miz seiz mbouj swnhleih, danhseih de cungj dingjguh roengz- daeuj.“Gij yienzaen dingjguh roengzdaeuj miz song aen, it dwg gyaezmaij ndangdaenj Ginghcuz; ngeih dwg vunz Ginghcuz gyaez ndangdaenj Ginghcuz.” Fanz Vwnz- yingh naeuz. De seiziq couh gyaez guh hong caiznyib daengj hongfwngz, daj de caeuq saefouh hag guh ndangdaenj Ginghcuz le, engqgya ndek mbouj ndaej lo, sim caem youq ndaw, sim maez youq ndaw.

30 lai bi daeuj, Fanz Vwnzyingh mbouj dingz mbouj duenh hagsib、yenzgiu gij dinfwngz guh ndangdaenj cojcienz Ginghcuz, de doq swnjcienz doq gaijndei, guhbaenz le “ndang- daenj Ginghcuz Fanzsi” daegsaek noengzna. Caeuq ndangdaenj coj- cienz Ginghcuz doxbeij, “ndangdaenj Ginghcuz Fanzsi” engqgya yawjnaek gij gyaeundei sienqdiuz、baengzcouz lai mbang lai mbaeu, engqgya lai hawj vunz raen gyaeundei. Ndang- daenj Ginghcuz dingzlai aeu couz guh baengz, aeu fwngz nyib guh, neix cijndaej engq ndei yienh’ok gij maenhndei de. Ndigah haujlai bi doxdaeuj Fanz Vwnzyingh dingjguh aeu fwngz rau ndang dingh guh ndangdaenj, mbouj baenz buek guh.