Ngoenzneix dwg ngoenzndei, Dahgyaeu ngoenzneix okhaq. Mbouj rox ngoenzlaeng bae daengz ranz vunz gwn youq ndaej mbouj ndaej lumj youq ranz bohmeh yienghneix seizbienh, ndaej mbouj ndaej lumj youq ndaw rug swhgeij maij saet ndaej maij diuq ndaej. Aen sim Dahgyaeu caeuq doengh boux lwgmbwk yaek okhaq gaxgonq doxdoengz, youh angq youh mbouj onj, de naengh youq bien mbonq, ndawsim fanfoek mbouj dingz.

Dahgyaeu bineix ndaej 28, youq lajmbanj aen nienzgeij neix suenq dwg dahsau geq lo. Dahgyaeu vunz sang ndang hung, youq ndaw mbanj gig noix raen yiengh mehmbwk neix, yienznaeuz de mbouj suenq baenzsau, bouxgeq raen daengz de seiz bouxboux cungj haenh naeuz:“Ndaej aeu dah neix daeuj guh bawx seng lwg swnj ciuh geijlai ndei ha.” Vunz couh yienghneix gangjgangj, baenzlai bi gvaqbae mbouj miz daegcoz lawz byaij haeuj ndawsim Dahgyaeu.

Vah bouxgeq naeuz “deuz ngoenz dai mbouj gvaq, deuz ngoenz haq mbouj mienx”. Ngoenzneix couh yaek baehaq lo, Dahgyaeu miz haujlai saeh cuengq mbouj roengz, de gvaq rug ndaw bae yawj daxboh. Daxboh Dahgyaeu baenzbingh ndang gyad, ninz gwnz mbonq cib lai bi mbouj ndaej ndwn hwnq, gwn haeux swiq ndang, ok haex ok nyouh cungj aeu miz vunz bang cij ndaej. Dahgyaeu dwg lwgdog, couh aenvih yienghneix, de mbouj ndaej liz bohmeh bae dieggyae dajgoeng, couh youq yienhsingz bang vunz guh gaicawx, ndawranz miz saeh baedauq fuengbienh.

Daeuj daengz bien mbonq daxboh, Dahgyaeu mbouj rox gangj maz vah, cij rox loenq raemxda. Daxboh naeuz:“Ngoenzneix mwngz okhaq dwg saeh angq, mbouj ndaej loenq raemxda, mwngz youh mbouj dwg haq bae dieggyae, raeuz haethaemh lij ndaej doxraen, ndaej raen mwngz haq bae ranz vunz, gou sim’angq, gou dai da hix ndaej laep lo.”

Dahgyaeu bang daxboh nyaenj- nyaenj faj ga reuq ndaej gaenq mbouj miz geijlai noh, naeuz:“Boh, gou baenzlawz hix mbouj ndaej cuengq ce mwngz, gou daengz gizlawz couh daiq mwngz daengz gizde.”

Youq ndaw singz, miz daegcoz he caeuq Dahgyaeu doxndei gvaq, daeg- coz haenx ranz youq ndaw singz, ndaw ranz de guh seng’eiq, miz ngaenz. Miz haemh ndeu daegcoz daiq Dahgyaeu bae daengz ranz de gwn caeuz, dax- meh daegcoz cam Dahgyaeu vunz gizlawz, ndaw ranz bohmeh baenzlawz yiengh. Dahgyaeu naeuz:“Gou dwg vunz lajmbanj, rungh laeg bya sang, daxboh gou ninz congz cibgeij bi mbouj hwnq lo, ndawranz dwg daxmeh boux ndeu dajleix.”

Haemhhaenx, Dahgyaeu yawj saeknaj daxmeh daegcoz couh rox ranz de mbouj maij de, gangj daeuj hix mbouj ndaej gvaiq vunz, daegcoz haenx dwg boux lwgdog, ndawranz miz daxgoeng daxbuz caeuq daxboh daxmeh 4 boux vunzgeq, danghnaeuz de caeuq Dahgyaeu gap gvanbaz, youh lai song boux vunzgeq dem, diuz rap neix naek lai. Gvaqlaeng daegcoz haenx caen couh mbouj caiq ra Dahgyaeu lo.

Dahgyaeu hix naemj gvaq: Ciuh neix yaek haq vunz, couh aeu ra boux lajmbanj haq, gyaranz hoj mbouj youqgaenj, de itdingh mbouj yiemz bohmeh gou.

Lajmbanj bouxcoz cungj okbae dajgoeng, Dahgyaeu baebae dauqdauq cungj dwg boux vunz ndeu, gig noix bungz daengz daegmbauq lawz.

Mbwn miz lwgda, Daegcangj mbanjnden lij caengz miz baz, bohmeh de cingq dauqcawq bang de ra bawx, caen dwg yienzfaenh daengz le, mwngz mbouj ra, hix gag miz boux he caj mwngz. Dahgyaeu caeuq Daegcangj couhdwg doiq vunz baenzneix.

Daegcangj daihhag bizyez le youq yienhsingz aen gunghswh guh gvangjgau canghvangz he guhhong.

Gunghswh mbouj suenq hung, cibgeij boux vunz guhhong, ngaenz- hong dwg guh lai ndaej lai, guh noix ndaej noix, Daegcangj dwg guh sezgi, faenh hong neix, guh ndaej ndei, geij ngoenz couh ndaej souhaeuj geij cien maenz, guh mbouj ndei, geij ndwen hix mbouj miz saek faen ngaenz souhaeuj, miz geij ndwen Daegcangj ra haeux gwn hix hoj.

Daegcangj hwnjban le, yiengh- yiengh cungj dawz hwnj sim, seizneix de roxnyinh haujlai saeh doeg daihhag seiz dwg hag gvaq, daengz seiz caen yungh hwnjdaeuj cix miz di hoj, couh lumj sezgi gienh saeh neix, sezgi ndaej okdaeuj lo, bouxcawj hab mbouj hab’eiq youqgaenj dangqmaz. Boux- cawj hab’eiq lo, sezgi ndaej mbouj suenq ndei hix baenz, bouxcawj mbouj hab’eiq, mwngz nyinhnaeuz sezgi ndaej caiq ndei hix mbouj baenz.

Ngoenz he, lauxbanj dawz aen sezgi fangh’an he gyau hawj Daeg- cangj, heuh Daegcangj sam ngoenz couh aeu guh okdaeuj.

Aen fangh’an neix dwg Daeg- cangj daeuj daengz gunghswh guhhong lauxbanj baez daih’it hawj de gag sezgi, yiengh saeh neix nanz miz, Daegcangj maz saeh cungj mbouj guenj lo, moek gyaeuj guh sezgi.

Ngoenz ndeu lajbyonghngoenz, lauxbanj heuh Daegcangj daengz bangunghsiz de bae, mboengj mbaq Daegcangj naeuz:“Aen sezgi fangh’an neix gig rimhoz bouxcawj, lwgcoz, guh ndaej mbouj loek, ngoenzlaeng mwngz itdingh guh ndaej yied daeuj yied ak.”

Ndaej daengz lauxbanj haenh ndei, Daegcangj gig angq, aen fangh- an neix 5 fanh maenz, ciuq gij gvidingh gunghswh, Daegcangj ndaej fanh maenz ngaenz, neix dwg de youq aen gunghswh neix guhhong sam ndwen souhaeuj ne. Daegcangj sieng- saenq swhgeij miz baezneix le, ngoenzlaeng couh itdingh guh ndaej engq ndei.

Daegcangj roxnyinh diuz roen dangqnaj ronghsagsag, de mbouj daj- suenq bae ranzco lo, roengzban le, de cawx geij gaen makgam, angqvauvau bae ra Dahlouq.

Dahlouq youq yienhsingz aen gunghcangj he guhhong, song bi gonq caeuq Daegcangj roxnaj, it bae ngeih dauq song boux couh miz aen “sim- eiq” haenx lo. Hojsik songde mbouj dwg vunz ndaw singz, cijndei gak boux gag co ranz youq.

Duenh seizgan neix, Dahlouq mbouj angq geijlai, Daegcangj daeuj daengz de hix mbouj lumj seizgonq baenzde ndatsim, couh lumj de miz maz saeh yaek doiq Daegcangj gangj youh mbouj gamj gangj nei, loengh ndaej Daegcangj miz di sim mbouj onj.

Miz baez he, Daegcangj roengz- ban le, couh bae ra Dahlouq. Daegcangj haeuj ranz seiz, Dahlouq naengh youq bien congz caemz soujgih, de raen Daegcangj haeujdaeuj hix mbouj dongx saek coenz vah.

Daegcangj cam:“Mwngz gwn caeuz la?”

Dahlouq naeuz:“Gou gwn gvaq, mwngz caengz gwn couh gag bae cawj.”

Daegcangj naeuz:“Haemhneix gou naemj bae baihrog gwn, mwngz buenx gou okbae nw.”

Dahlouq naeuz:“Gou naeuz gou gaenq gwn gvaq, mwngz daiq rwz mbouj miz congh, dingq mbouj nyi ha!”

Daegcangj roxnyinh miz di saetnaj, swhgeij gag okbae ra gwn, de doq byaij doq naemj: Dahlouq lumj gaenq bienqsim lo, yawj daeuj songde aiq byaij mbouj roengzbae lo.

Ngoenz he banhaemh, Daegcangj iu Dahlouq bae bien dah youzbyaij. De naemj aeu ndeindei caeuq Dahlouq gangj baez he cij ndaej.

Bien dah rumzliengz cifefe, sim vunz singjsagsag, Daegcangj sim baez ndat, gaemdawz fwngz Dahlouq naeuz:“Louq, gou rox gou seizneix mbouj miz maz doxgaiq hawj mwngz, hoeng, gou itdingh roengzrengz ra ndaej gij doxgaiq mwngz naemj aeu haenx hawj mwngz. Haq hawj gou ba, ciuh vunz neix gou itdingh ndeindei gyaez mwngz.”

Dahlouq cengq hai fwngz Daegcangj, cim gvaq baih he bae mbouj guhsing.

Daegcangj ndaejgeiq, Dahlouq naeuz vah gvaq, de naeuz Daegcangj seizlawz ndaej youq yienhsingz cawx ranz youq, de couh seizde haq hawj Daegcangj.

(caengz sat)