●5 nyied 20 hauh, bi 2020 Cungguek (Gvangjsih)—— Dunghmungz byaekheu binjcungj moq bozlanjvei youq Nanzningz haimuq, ndaw guek rog guek 79 aen giyez danhvei dawz gij binjcungj moq ndei de camgya canjlanj, hawj daengx gih gak dieg gij ciennieb hozcozse、 daihhoh ndaem byaekheu caeuq boux gai cehbyaek comz daeuj “yawj byaek genj ceh”. （Yiz Sienghcenz）

●Bineix doxdaeuj, Hozciz Si Yizcouh Gih haenqrengz gyavaiq doicaenh yivu gyauyuz baujcang canyiz hanghmoeg gensez, gyadaih hwnqguh buek hagdangz ndeu, daezswng gij suijbingz banhhag hagdangz lajmbanj、 hagdangz nyauqnyieg, demgya gunghawj yozvei hagdangz hawsingz, hawj gyoengq lwgnyez youq bakdou ranz couh ndaej haeujhag, doengzyiengj gyauyuz swhyenz ndei, coicaenh Yizcouh yivu gyauyuz bingzyaenx hwngfat.

（Vwnh Yizcunz）

●5 nyied 20 hauh, Binhyangz Yenveij Dungjcanbu (minzcunghgiz) lienzhab Binh- yangz yinsieng youjhan cwzyin gunghswh leihyungh bingzdaiz gwnz muengx haiguh “minzcuz、 cunghgyau cwngcwz fazgveih” senhconz caeuq vangjloz cihsiz miz ciengj ciengjdap hozdung. Gaengawq gyoepsuenq, daengz 5 nyied 23 hauh, gaenq miz 9800 lai bouxvunz camgya hagsib caeuq vangjloz cihsiz miz ciengj doxdax.

（Lanz Sui）

●5 nyied 22 hauh, Liujcwngz Yen Gujcai Mulaujcuz Yangh comz banggungz buensenj hoh minzcuz vunznoix ginzcung 10 lai vunz yawj song hoih cwngfuj gunghcoz baugau. Bouxguenjleix yungh Vahmulauj、 Vahcuengh vih bouxgeq naihsim bae fanhoiz gij neiyungz gunghcoz baugau Lij Gwzgyangz cungjlij gangj haenx, hawj gyoengq vunzlaux dingq mbouj rox Bujdunghva haenx engq rox cingcuj saeh hung dangqnaj guekgya caeuq cwngfuj baenzlawz guhhong, hix engq rox gij cwngcwz duet gungz gunggeng、 cwngcwz minzcuz dangj raeuz guek raeuz.

（Liuz Cingenz）