Heiqmaxloeg dwg cungj yisuz heiq cojcienz ndawbiengz Cangh- vuz, daj foux caeuq gofadloeg bienq baenz, daengz seizneix gaenq miz gyawj 300 bi nanz lo.

Heiqmaxloeg daj fouxmaxloeg ndawbiengz bienq daeuj. Vunzlai Canghvuz Yen gingqbaiq maxloeg, dang de dwg duz miz fuk. Mboengq ndwencieng, vunz aeu gocuk lieb baenz duk, san baenz “maxloeg”yaek lumj maxloeg caen nei, baihrog nem ceijyouz roxnaeuz baengz, caiq veh gij mbanqraiz caeuq yienghsaek maxloeg, liuxle bae daengz gak ranz ei yiengh maxloeg diuqfoux, heuhguh “fouxmaxloeg”, cieplaeng couh ciengq “gofadloeg”, aeu neix daeuj guh angqhoh. “Gofadloeg” baenzlawz ciengq, neix couh aeu ciuq ranzcawj daeuj bien vah angqhoh, danghnaeuz ranzcawj dwg bouxseng’eiq couh ciengq: “Maxloeg daeuj daengz ndaw ranz mwngz, angqhoh mwngz ndaej seng’eiq hoengh; huq haeuj huq ok lumj loek baenq, cienzcaiz rim loengx baenz bouxmiz.” Danghnaeuz ranzcawj dwg bouxndaemnaz, couh ciengq “Maxloeg daeuj daengz ndaw ranz mwngz, angqhoh gak boux ndang maengh ndei; cienz ranz huzndei gaenx guh hong, duz lai duz maj haeux rim cang.” Diuq fouxmaxloeg caeuq ciengq “gofadloeg” ndawde, bouxyienj hag aeu、ciuqei heiqmbaetcaz、Heiqguengjdoeng, ciuq gij gangjriuz ndawbiengz roxnaeuz gojgaeq fangzbaed bien le di heiqdoegsug miz hothoh、miz bouxvunz、miz ciengq ngon haenx, youq duenh ciengq “gofadloeg” liux yienjok, caemhcaiq gaengawq gij cingzgvang ranzcawj mbouj doxdoengz, liuxle senj heiqmoeg mbouj doxdoengz.

Bi 2010, heiqmaxloeg ndaej senj haeuj daihsam buek swcigih gaep feihvuzciz vwnzva yizcanj mingzloeg.