“Dahvanj, caiq gvaq geij ngoenz couhdwg sam nyied cosam lo, mboengqneix fwn cin moengmoeng, mbawraeu seizneix engqgya heuruem- ruem, sou gyaez gwn haeuxnaengj haj saek, gou yaek guh lubw.”

“O! Ndei ha!” Dingq daxmeh baenzneix gangj, gou couh lumj nyouq daengz gij mbawraeu homfwdfwd nei lo, ndawsim hix riengz dwk maqmuengh hwnjdaeuj.

“Deng lo, sam nyied cosam ciet neix, mehbaj、 bohgux、 boh’au gyoengqde cungj cienz ranz daeuj guh hek bw. Dingqgangj bineix Guengjsae raeuz youh ndaej cuengq geij ngoenz gyaj dem, sou geij mehlwg hix ndaej- hoengq dauqma ba?”

Daxmeh baez haibak, gij vah cungj mbouj dingz mbouj duenh. Gou yienznaeuz mbouj maij daxmeh baenz mboen, hoeng vihliux mbouj hawj daxmeh saetmuengh, hix naihsim dingq de gangj, mbouj dingz “w, w, w” dap de.

Mboujgvaq, dingq dwk dingq dwk, gij vah daxmeh hawj gou miz cungj roxnyinh gangj mbouj mingz he, daj ndawsim conh okdaeuj, hawj gij saeh saepsoiq gou lumj fwnmoenq nei, mbouj rox mbouj nyinh siusanq bae.

Gou gaenq haq vunz lo, gij nienzgeij seizneix mbouj caiq ndei eiqsei lumj seiz iq nei seizbienh caeuq bohmeh guh’unj, cix ndaej daj gij vah roxnyinh bohmeh miz geijlai haeujsim caeuq gvaqniemh gou. Neix aiq couhdwg gij cingz raemj mbouj goenq vunzcaen loba? Gvaiq mbouj ndaej caeuq songde gangj vah, yied gangj sim yied soeng, yied gangj sim yied raeuj.

Baenzranz haujlai bi, dou cungj aenvih gij hong nyaengq lai, lwgnyez youh iq, gaenq haujlai bi mbouj ndaej dauq ranzmeh bae caez angqcomz gvaq sam nyied cosam lo.

Youq ranghdieg Bouxcuengh dou, youq liggaeuq sam nyied cosam ngoenzciet neix, gij hozdung angqhoh lai cungj lai yiengh: Miz banh hawfwen, miz dajcunz caencik, miz daengx gyog caeq cojcoeng…… Gij ciengzmienh nauhyied hoenghhwd caeuq moix bi gvaq cieng ca mbouj geijlai, hawj vunz nanzlumz dangqmaz!

Caen dahraix, moix bi yaek daengz sam nyied cosam, vunz ndaw ranz bouxboux cungj aeu bwh song sam ngoenz seizgan bae soucomz ndei gij mbaw nyumx haeuxnaengj haj saek gonq. Caj daengz sam nyied co- ngeih gyanghaemh couh dawz gij haeuxcid cimq daengz ndaw raemx- mbaw nyumx bae, haetromh couh naengj, gij hom haeuxnaengj haj saek caeuxcaeux couh hom doh daengx mbanj liux bae lo.

Daengz ngoenz sam nyied cosam, Bouxcuengh ranzranz cungj cingj caencik baengzyoux daeuj ndawranz angqyangz comz youq, gwn ngaiz gangjgoj, nauhyied dangqmaz. Gij byaek hwnj daiz dakdaih, cawzliux miz nohgaeq、nohbit caeuq nohbya daengj doenghgij byaek ndei noh ndei, lij miz gij haeuxnaengj haj saek, mizfeih yinx vunz gwn. Daengx mbanj seiqlengq cungj miz gangj miz riu, angqangq yangzyangz. Gwn caeuz sat le, soengq hek seiz, bouxcawj vanzlij daegdaengq cang geij gaiq haeux- naengj haj saek aeu rong suek ndei soengq hawj gyoengq hek daiq baema. Danghnaeuz ngoenzhaenx ranzcawj miz saek boux vunz ndaw ranz mbouj ndaej youq ranz caez gwn ngaiz angqhoh gvaq ciet, couhdwg mbouj gingq bouxhek, ndigah daxmeh couh engq maqmuengh gou baema.

Aenvih ranzmeh hix aeu cingj hek daeuj gwn ngaiz, aeu yungh haujlai mbawraeu nyumx haeuxcid. Bohmeh nienzgeij gaenq laux, gou mbouj cuengqsim songde sinhoj bin bya sang mbaet mbawraeu, vih hawj bohmeh vuenheij, baezneix yaek daengz ciet seiz, gou youq ngoenz singhgizroek, mbouj naeuz bohmeh nyi, caegcaeg haici dauq ranzmeh. Youq gwnz ciiq, baez siengj daengz yaek bin hwnj bya sang bae mbaet mbawraeu heuruemruem, gou couh sim’angq raixcaix.

Aenvih gvan gou dwg Bouxgun, ranz de mbouj gvaq ciet sam nyied sam, ndigah baez daengz ngoenzciet neix, gou couh daegbied siengj dauq ranzmeh. Aenvih ciet neix miz mbaw- raeu homfwdfwd, miz haeuxnaengj haj saek, miz roeg ciuz va rang, miz doengzdoih seiziq, lij miz gij guh- caemz angqyangz youq rog gyang- hongh laj go faexrenh nanzlumz…… Gyonj daeuj gangj, aen ciet neix, cang rim gij vaiqvued seiz lwgnyez gou, 30 bi daeuj, cungj vut mbouj bae, ndaejgeiq maenhndaetndaet. Baez- baez sam nyied cosam yied daeuj yied gaenh, sim gou hix gaen dawz humznyumnyum, cungj beij seiz wnq engq ngeix bohmeh, engq ngeix ranzmbanj.

Youq ndaw doenghgij neix, gou engq gyaez aeu mbawraeu daeuj guh haeuxnaengj saekndaem. Gij hom haenx dwg gij feih seizcin, youh dwg gij feih ranzmbanj, engq dwg gij feih ndawranz.

Couhcinj bin bya dangh dah, hoeng, aenvih ci mbaeu loh sug, ndawsim vuenheij, roxnyinh hix gig vaiq couh ndaej yawjraen gij bya henz mbanjranz lo. Sawqmwh, gij mbawraeu heuswdswd seiz mbouj seiz couh diuq haeuj ndaw da daeuj. Gyoengqde miz sang miz daemq, mwncupcup caemh- caiq hoenghhwdhwd. Gij mbaw gwnz nga goraeu neix youh mwn youh heu, gogo cingsaenz gvaekgvaek, caeuq faex wnq cungj mbouj doxdoengz. Couhcinj yaep myaeg gvaq, gou hix ndaej sikhaek nyinh ndaej ok go lawz dwg goraeu. Raq rumz he ci daeuj, couh nyouq ndaej daengz gij feihhom daegbied goraeu dem.

Gij hom neix, youh yinx ok gij saeh lij iq nanzlumz daeuj, gienhgienh lumj cuengq denyingj nei, mbouj dingz mbouj duenh baij okdaeuj. Mwhhaenx, seiz yaek daengz sam nyied cosam, ndaw mbanj bouxlaux lwg iq cungj baenzgyoengq guhdoih, aemq lwg ganj vaiz, laebdaeb hwnj ndoi bae mbaet mbawraeu singjsien. Gij lingz venj youq laj hoz vaizlwg, “dinghdingh danghdangh” yiengj mbouj dingz, caeuq gij sing gangjriu gyoengqvunz gyoeb baenz souj go lajmbanj rwenzraeuh ndeu, hawj vunz simmaez……

Mbouj roxnyinh, baenz vaiq couh daengz ranzmeh lo. Lij caengz haeuj ranz gou couh dingq daengz aen doiq “dungdang dungdang” yiengj dwk, gij hom mbawraeu daj ndaw geh dou menhmenh biu okdaeuj, haeujsim haeuj saej, hawj vunz myaiz cungj yaek rih okdaeuj lo!

Yenzlaiz, bohmeh caeux bae mbaet baenz rap mbawraeu singjsien dauq lo, caemhcaiq aeu aen doiq ndaw gyanghongh daeuj daem mbawraeu. Baenzneix daem ok gij raemx faex- raeu, feih youh hom, raemx youh lai. Haeuxcid nyumx roengz bae le, couh lumj gij cehcaw mong nei lwenq- leklek, naengj cug le, couh bienq saekndaem lo. Haeuj bak baez nyaij, heuj bak cungj hom, gwn mbouj nyienh daengx.

Daxboh caij riengdoiq, daxmeh maeuq youq henz gyaeujdoiq fan mbawraeu. Dingq daengz gou hai dou hung, daxmeh dingz roengzdaeuj, riengz sing ngiengxgyaeuj yawjraen gou, doq riunyumnyum hwnjdaeuj. Daxboh hix daengx din ngeux gyaeuj gvaqdaeuj, hix riuhaha hwnjdaeuj:“Daeuj ndaej cingq habngamj, daeuj ndaej cingq habngamj, miz vunz daeuj bang rengz lo.” Gij najriu songde baenzneix soengswt, hoeng gij nyaeuq gwnz najbyak dauqfanj nyaeuq lumj mieng laeg nei.

Gij saedceij bi doek bi gvaq ndaej ndei lo, mbawraeu oiq hix bi doek bi maj hwnj, hoeng gij byoem ndaem bohmeh cix bi doek bi noix lo.

“Daxboh daxmeh, sou cungj nienzgeij laux lo, hwet mbouj geng baenzlai, ndang mbouj cangq baenzlai, da youh myox dem, wnggai caj gou dauqma hwnj bya bae mbaet mbaw- raeu ha……”

Siengj daengz songde cengqgengz hwnj gwnz bya ndaw ndoeng, iet fwngz daj faexraeu sangngaungau mbaet aeu gij mbawraeu, gou cungj simyou dangqmaz.

“Dah huk mwngz neix rox maz, gij ndokndang iqetet mwngz baenzlawz ndaej caeuq dou bouxguhnaz doxbeij ne?” Daxmeh riu gangj.

Youq ndawsim bohmeh, lwgnyez ciengxlwenx dwg lwgnyez, lumj cungj maj mbouj hung gvaq nei. Gou cungj mbouj rox caiq gangj maz ndei lo.

Aiq dwg rumzcin raeujrub lai, roxnaeuz dwg gij heiqrang mbawraeu haenq lai, ndaeng gou baez soemj, raemxda rim gvaengzda lo.