Geij bak daih roengzdaeuj, ndaw mbanj caengz miz vunz ciengx gvaq nonsei, Dahyingz caeuq Daegdwz nyaengqnyetnyet bae guh gijneix, Aungux caeuq Simjngux miz di doeksaet, yousim songde guh mbouj baenz, youh lau gangj lai songde doeknaiq couh mbouj guh lo, ndigah cij you youq ndawsim, coenz vah mbouj gangj lai. Vunzmbanj ndaejnyi le hix doeksaet caez.

Vah naeuz fanh saeh haidaeuz nanz, byawz rox baenzlawz yiengh ne? Daeglwg swhgeij dwg gaenx hong gaenx hag mbouj yungh gangj. Dahyingz cangndang beij vunz ndaw singz lij seizhwng, din fwngz hausek, caengz guh hong nazreih caeuq gij hong naek hong uq haenx gvaq, lauheiq daengz seizhaenx le, dan dwg daeglwg swhgeij dwgrengz souhcoih ndwi lo. Aungux caeuq Simjngux caen mbouj gamj lai naemj roengzbae.

Ciengx nonsei, mboujdan Aungux caeuq Simjngux yousim, ndaw mbanj hix mbouj miz geijlai boux yawj ndei gienh saeh neix.

Seiq

Haicin, fwnmoenq doeksese, lij loq miz di nit, Dahyingz caeuq Daegdwz caenndang roengz reih bae ndaem gosangh, gyoengqde nyaengq mbouj gvaqdaeuj couh cingj vunz daeuj bang ndaem. Geij ngoenz gvaqbae, cibgeij moux reih cungj ndaem gosangh caez lo.

Mbwn hai raeuj, ndit ronghsag, bak go hoengh. Doenghnaz doenghgo gogo hoengh maj, mbouj geij nanz gosangh couh maj rag moq did ok nyez oiq heusisi lo. Yawjraen gijneix, Dahyingz lumjbaenz yawjraen maq- muengh couh youq dangqnaj nei, ndawsim diemzsisi.

Gosangh lij iq, mbawsangh hai mbaw caengz hung, saehcingz ngamq hainduj, Dahyingz caeuq Daegdwz yinxdaeuz cingq naemq, gyoengqde nyaengq bae cawx gyaeq nonsei ma did, heuh vunz guh ranz coux nonsei, roengzsim guh ndei gak cungj hong.

Geij ngoenz gvaq le, nonsei iq did okdaeuj lo, non iqetet, youh ndaem youh bwn. Dahyingz yawj gij sengmingh iq youq gyang ndoengj nod doengh, ndawsim angqvauvau, de nyaengq dwk aeu fagcax cab soiq mbawsangh oiq le, vanq hawj nonsei gwn. Gyoengq nonsei neix ngoenz aeu gueng sam donq ni, yied ngoenz gwn yied lai.

Nonsei iq gwn mbawsangh le, ngoenz beij ngoenz majhung, it lingz gaiduenh, nonsei ndangdaej loq bienq saekhenj couh daengj gyaeuj ninz dwk. Dahyingz gig miz naihsim dwk vanq di mbahoi seng hwnj gwnz ndang nonsei iq bae, hawj gyoengqde siudoeg. Ninz hwnz ndeu ndiu daeuj le, nonsei iq couh duet naeng gaeuq bae, vuenh naeng moq hwnjdaeuj. Nonsei gwn imq le ninz, ninz ndiu le gwn, caiq gwn geij ngoenz mbawsangh couh hainduj haiz sei lo.

Riengzdwk gosangh yied maj yied sang, gij mbawsangh hix yied maj ndaej mbaw hung heuswd caemhcaiq mwncup, yienghneix couh ciengx ndaej nonsei engq lai lo, seiz hong nyaengq caencingq daeuj daengz lo.

Ngamq hag dajciengx nonsei, Dahyingz guh moix gienh saeh cungj siujsim riri, de caen lau miz maz loeklak naemj mbouj daengz guh mbouj daengz dieg, de baez ndaej- hoengq couh dauqcawq coh doengh boux ciengx nonsei gvaq haenx hagsib aeu gij ginghyen, gig mbouj yungzheih dingj daengz haj lingz.

Ngoenz he Dahyingz raen nonsei mbouj maij gwn mbawsangh lo, mbangj duz iet ndang raezrengreng ninz youq gizhaenx doengh hix mbouj doengh; mbangj duz daengx ndang bongz foeg, caekhaex miz raemx hau roxnaeuz raemx nding lae okdaeuj, dai naeuh lo; lij mizmbangj yaek dai yaek lix, naiqnueknuek menhmenh raih dwk, gwn mbouj roengz saek gaemz mbawsangh.

Yawj daengz gij nonsei dai vangvang raehraeh ninz youq giz- haenx, Dahyingz siengsim raixcaix. Duenh seizgan neix daeuj, de vih nonsei mbouj rox sai bae geijlai simgei, gij buhvaq lengj youh seizhwng gaenq vut gvaq mbiengj ndeu bae, moix ngoenz daenj hwnj gij buhvaq gaeuq roengz reih mbaet mbawsangh, ndit dak fwn rwed, vunz bienq ndaej youh byom youh ndaem, song faj fwngz oiqup bienq ndaej youh co youh nyaeuq lo. Caeuq gaxgonq gij yienghsiengq doxbeij, caen mbouj lumj boux vunz ndeu nei, byawz lij ngeix ndaej hwnj de gaxgonq hix dwg dahsau gyaez lengj youh seizhwng ndeu ne.

Haj

Baez daih’it ciengx nonsei couh yienghneix saetbaih lo, Dahyingz caeuq Daegdwz roxnyinh miz di doeknaiq, daengx ngoenz aeu denz moek gyaeuj ninz. Simjngux naeuz:“Gou caeux couh naeuz lo, sou bouxcoz baenzlawz guh ndaej gij saeh neix, mboujdan dwgrengz, caiqlix ciengx nonsei lij aeu miz gij gisuz dajciengx he, loengh mbouj ndei couh loem seuqsak, sou lijdwg ndeindei bae baihrog dajgoeng suenq lo.”

Daegdwz dingq le, ngaemgyaeuj mbouj guhsing. Dahyingz naeuz:“Neix dwg baez daih’it ciengx nonsei, caengz miz geijlai ginghyen, gou couh mbouj saenq bouxwnq ciengx baenz, gou couh ciengx mbouj baenz.”

Raen dahlwg swhgeij vih ciengx nonsei gij saeh neix mboujdan guh mbouj baenz, lij byom ndaem baenz yienghneix, bohmeh Dahyingz sim’in yaek dai. Meh Dahyingz naeuz:“Lwg ha, yawj mwngz gij yienghceij neix, in daengz ndaw simdaeuz dou bae, mbouj guh suenq lo. Sou lij caengz seng lwg ciengx lwg, hix mbouj yungh geijlai cienz, couhsuenq sou seng saek laeq lwg, sou song gvanbaz baenzneix coz, lau ciengx mbouj ndaej hwnj ha. Danghnaeuz ciengx mbouj ndaej hwnj, lij miz dou 4 boux laux ne, dou lij caengz geq, lij guh hong ndaej, mwngz hix gaej bae gwn baenzlai sinhoj lo.”

Dahyingz dingq daxmeh gangj le, naeuz:“Guh saeh mbouj ndaej gyaeuj guk rieng nou, gou mbouj ndaej yienghneix couh nyinhsaw.”

Dahyingz youq gwnz vangj cazyawj gij cihsiz gvendaengz baenz- lawz ciengx nonsei, caiq bae coh boux ciengx nonsei ceiq miz gisuz caeuq ginghyen hagsib, de roengz gietsim caiq ciengx baez ngeih.

Baezneix Dahyingz caencingq rox daengz, nonsei daj iq daengz hung baenzlawz fuengzre binghraq, baenz- lawz yungh yw, nonsei maj daengz seiz lawz baenz byoq raemxyw daengjdaengj.

Dahyingz baez daihngeih ciengx nonsei le, de engq nyinhcaen guenjleix caeuq siujsim fuengzre. Goengfou mbouj vei boux miz sim, ginggvaq 20 geij ngoenz sinhoj bae ganqhoh, nonsei cungj suenq haiz sei giet reh lo.

Yawj dwk aenaen reh hausak venj youq gwnz gekceij, Dahyingz gikdoengh ndaej gotdawz Daegdwz angq hemq hwnjdaeuj:“Gou guh baenz lo, gou guh baenz lo, duenh seizgan neix daeuj gou bienq ndaem bienq yakyawj hix dij lo.”

Daegdwz vah noix, seizneix cij riunyumnyum mbouj guhsing.

Gai sei ngoenzhaenx, vunzmbanj bouxboux daeuj yawj nauhyied, baez gai sei neix sou ndaej 7000 lai maenz. Vunzmbanj iet linx lo, cungj naeuz:“Ngamq ciengx ndwen lai couh ndaej baenzlai ngaenz, ciengx nonsei caen dij ha!”

Roek

“Caen guh ndaej gwn dahraix bw.” Aungux nanz ndaej loh ok riu, riu ndaej gwnz naj gij riznyaeuq cungj mbehai lo. Simjngux hix riu ndaej lumj duj vagut hai hoengh nei, naeuz:“Boux miz ceiqheiq, itdingh guh ndaej baenz saehcingz, bawx gou Dahyingz caen ak!”

Gyoengq vunz ndaw mbanj raen Dahyingz ciengx nonsi ndaej ngaenz, daihgya bouxboux cungj daihdamj bae ciengx, ndaw mbanj 800 lai moux reih cungj ndaem gosangh, doenghnaz heuswdswd, ranzranz ciengx nonsi. Geij bi roengzdaeuj hohhoh hwnj ranzlaeuz, ndaw mbanj mbouj miz saek boux vunz gungz.

Miz vunz yienghneix eu fwen naeuz:

“Vunz mbouj ndaej yawj rog,

Lwg dog rox majhung,

Daiq boux mbanj duet gungz,

Mbouj lumz cingz Dahyingz.”

（ sat）