It

Daj Dahyingz haq daengz ranz, Aungux caeuq Simjngux couh yawj de mbouj gvaq da, lumj ndaw da miz diuz oen camx nei, Dahyingz dwg dahbawx dog, gyoengqde hix mbouj ndaej mbouj nyaenj ndaeng nyaenx dwk.

Aungux Simjngux couh seng Daegdwz bouxlwg dog, Daegdwz moix ngoenz caeuxcaeux couh hwnqdaeuj gwn ngaizromh bae guhhong lo, yah de Dahyingz cix ninz daengz daeng- ngoenz dak caekhaex le cij numq- nwtnwt hwnqcongz.

Baenzneix cixbah lo, Dahyingz hwnqdaeuj gwn imq haeuxringz le, maz cungj mbouj dwen bae guh, de gaem aen gingq ndeu, aeu faenj cat faj naj caeuq veh bwn’da couh sai bae buenq ngoenz seizgan.

Dahyingz vunz maj ndaej mbouj sang mbouj daemq, mbouj byom hix mbouj biz, naengnoh hausek. Cungj naeuz saulengj gyaez cangndang, Dahyingz hix mbouj dwg baenzneix. Gij byoem de hix dwg duenh seizgan he nyumx saekhenj, duenh seizgan he nyumx saekhoengz, mizseiz gienj nyungq lumj rongzroeg nei, mizseiz rag soh beij mienhdiuz. Ribdin ribfwngz hix dwg ngoenzneix nyumx saekhoengz, ngoenzcog nyumx saek- lamz. Gyonj daeuj gangj, baenzlawz yawj cungj yawj mbouj ok Dahyingz dwg vunz lajmbanj, baenzlawz yawj cungj yawj mbouj ok Dahyingz dwg vunz guhhong.

Dahyingz moix bi cawx vacangh- binj caeuq ndangdaenj mbouj rox sai bae geijlai cienz, yungh gij vah de naeuz, danghnaeuz sij mbouj ndaej hawj faj naj neix sai cienz, mwngz laihnaeuz gij naengnoh neix seng daeuj couh yienghneix gag hau youh hoengzmaeq ha. Ndaw gvihbuh de, cawz le geij geu buhvaq gaeuq Daegdwz hojlienz riri venj youq gizhaenx, gizyawz cienzbouh dwg buhvaq de, gak cungj yienghsik caeuq gak cungj saek hawj vunz yawj dwk da raiz uk luenh bae, baenz geu baenz geu daeb ndaej cingjcingj caezcaez, caenx ndaej aen gvihbuh hung ndaetfwdfwd.

Dahyingz ranz youq ndaw mbanj, caeuq ranz Daegdwz cij gek geij aen ranz, de moix ngoenz youq ranzdaiq ranzgvan song aen ranz neix baebae dauqdauq geijcib baez, cungj mbouj rox mbwq gvaq. Bohmeh Dahyingz hix cij miz de dahlwg dog, doiq de gyaezgyoh dangqmaz, yienznaeuz ranz youq lajmbanj, hoeng Dahyingz daj iq daengz hung mboujcaengz guh hongreihnaz gvaq. Haq hawj Daegdwz le, Dahyingz engq mbouj naemj bae guh hongreih hongnaz, de gag naemj: Vunz caeuq vunz doxdoengz, vihmaz itdingh aeu bae ndaem reih ndaem naz cij miz gwn ne?

Aungux caeuq Simjngux yawj Dahyingz baenzneix giknyannyan, mbouj gamj gangj maz, cijndei nyaenxheiq youq, caeuq caengya caemh mbanj, gangj lai mbouj baenz soq.

Ngeih

Ndaw mbanj 50 geij hoh, cojcoj coengcoeng cungj dwg ndaem geij go haeuxyangz geij goduh gvaq saedceij, mizseiz haeux mbouj gaeuq gwn couh bouxhung bouxiq hwnj bya bae dwk fwnz gai. Ranzranz aen ranz vaih- vatvat, seizhwngq mbouj ndaej dangj ndit, seiznit mbouj ndaej dangj rumz, baenzneix gyoengq bouxcoz ndaw mbanj couh doxciuz doxiu okbae baihrog dajgoeng, Dahyingz caeuq Daegdwz hix riengz okbae dajgoeng lo.

Aungux caeuq Simjngux gig maqmuengh Dahyingz caeuq Daegdwz okbae dajgoeng laeuq ndaej di ngaenz, geiq dauqranz bangbouj ndawranz, gvaq geij bi couh ndaej hwnj ranzlaeuz moq youq. Ngeix mbouj daengz, mbouj geij nanz Dahyingz caeuq Daegdwz couh maranz lo. Bouxmbanj rox le cungj riu songde mbouj lumj bae guhhong, cix lumj okbae youz guh- caemz nei.

Daegdwz ndaejnyi le han naeuz:“Dahyingz youq rog dingj mbouj ndaej dwgrengz, dingj mbouj ndaej gwnhoj, de deuz le gou mbouj ndaej mbouj riengzlaeng deuz ne.”

Raen vunzmbanj riu daeggvan de, Dahyingz ndatheiq gag naemj: Sou caengz okrog dajgoeng gvaq rox maz ne? Youq ndaw gunghcangj guhhong, moix ngoenz aeu ciuqseiz hwnjban roengzban, daengz seizgan hwnjban gvaiz faen cung ndeu roxnaeuz daezgonq roengzban faen cung ndeu, couh deng fad 10 maenz ngaenz, song faen cung couh fad 20 maenz ngaenz. Danghnaeuz miz saeh roxnaeuz baenzbingh mbouj ndaej bae hwnjban cingjgyaj ngoenz he, mwngz laihnaeuz ngaenzhong ngoenzde mbouj ndaej ndwi? Cingjgyaj ngoenz ndeu couh fad sam ngoenz ngaenzhong. Mbouj siujsim di, gij cienz guhhong ndaej cungj mbouj gaeuq fad.

Caiqgangj, hwnjban mbouj ndaej luenh gangj vah, lij aeu youq gvidingh seizgan ndawde ganj guh ok doxgaiq daeuj. Danghnaeuz guh mbouj gaeuq soq, couh ngaiz bouxguenj vet ndaq. Guh mbouj gaeuq soq, miz di lauxbanj simndaem simnduk haenx lij heuh boux guh hong mienxfeiq gyaban dem. Mwngz mbouj nyienh gyaban, de lij laih mwngz gik guhhong caenh siengj aeu cienz ndwi. Daengx aen doih cungj gyaban, dan mwngz boux dog mbouj guh, cungj deng gyoengqde da’myonz, doeklaeng cij ndaej bae gyaban.

Hix gaej gvaiq Dahyingz, youq baihrog dajgoeng, miz di gunghcangj iq, hwnjban seizgan mbouj ndaej seizbienh byaijdoengh, danghnaeuz bae cwzsoj lij aeu baizdoih raek cwnglizgangj youq naj aek, miz gvidingh bae geij faen cung couh dauq dem. Danghnaeuz bouxlawz nyouh gip haex rad, mbouj deq bouxwnq dawz cwnglizgangj ma daengz couh gag bae cwzsoj, dauqma mboujdan deng ndaq, lij deng fadcienz dem. Gijneix fad- cienz gijhaenx fadcienz, moix ndwen cienzhong ca mbouj geijlai cungj deng fad sat lo.

Caemhcaiq gij ngaizbyaek ndaw fandangz gunghcangj, saedcaih yak yaez lai lo, mbouj gangj miz saekdi noh, mizseiz lienz di youz cungj mbouj miz, sosatsat ndwnj mbouj roengz hoz bae.

“Mbouj gangj sou mbouj rox, sou bouxlaux laihnaeuz bouxcoz youq rog vaiqvued ndei youq ha? Dou danghnaeuz rox dajgoeng yienghneix dwgrengz, gaxgonq couh lai doeg di saw lo. Youq baihrog, bouxwnq ndaw dungx sawmaeg lai youh guhhong gvai, soengset dangqmaz; boux mbouj rox geijlai saw youh guhhong huk, dwgrengz mbouj gangj lij souhheiq raixcaix.” Dahyingz naeuz.

Couh yienghneix, Dahyingz caeuq Daegdwz bi daengz haemh okbae dajgoeng cungj fanjfuk maranz geij baez, moix baez maranz youq ndwen song ndwen yungh cienz yaek sat le youh okbae. Simjngux doiq songde naeuz:“Sou doxaeu hix ndaej song sam bi lo, nienzgeij hix mbouj iq lo, cienz ra mbouj ndaej couh suenq lo, sou aeu seng saek laeq lan hawj dou bouxlaux umj cij ndaej ha.”

Daegdwz dingq daxmeh gangj le, byaij gvaq mbiengj he bae mbouj guhsing, Dahyingz naeuz:“Mbouj gip mbouj gip, caj dou lai ra ndaej di cienz caiq naemj gij saeh neix, gou mbouj saenq dou ciuh neix guh mbouj ndaej saek yiengh okdaeuj, rom mbouj ndaej cienz.”

Dahyingz gangj gij vah neix, Aungux dingq le gag cit ien ngauz gyaeuj, Simjngux dingq le cix mbwnj bak, ndawsim naemj: Aen bak leih, saej dungx heux, yawj gij yiengh gik neix, guh ndaej baenz maz saeh okdaeuj?

Sam

Dajgoeng diuz loh neix mbouj swnhleih, Dahyingz gig naemj maranz guh saehnieb, de youq baihrog dajgoeng seiz raen vunz ciengx nonsei ndaej ngaenz vaiq, nyinhnaeuz youq mbanjranz de ciengx nonsei itdingh beij ndaem gohaeux ndaej ngaenz. De dawz gij naemjfap neix lwnh hawj Daegdwz nyi, Daegdwz swhgeij gaenq roxnyinh youq baihrog dajgoeng caen mbwq lo, dingq Dahyingz yienghneix gangj, de doq ngaekgyaeuj doengzeiq lo.

Bouxcoz ndang mbaeu, gangj daengz guh daengz. Dahyingz caeuq Daegdwz doq gienj buhvaq maranz le, couh aeu gij reih ranz de caeuq ranz Daegdwz daeuj ndaem gosangh. songde doq heuh vunz aeu vaizdiet daeuj cae reih soeng namh, dap ranz ciengx nonsei, doq bae ndaw singz hagsib baenzlawz ciengx nonsei.

（caengz sat）