Daeuhseih mizdi manh、mizdi saep、miz heiq homciengq noengzna. Gij daeuhseih maenhndei saek rongh ndei, naedduh fagmbot, heiqhom noengzna, hamz miz haujlai cungj yingzyangj.

Daj Ciuzcinghcauz duenh Gvanghsi heijdaeuz, Hawgeq Yangzmeij Du’gyahfangj boux guh daeuh- seih daih daih’it Du Gvangjcwngz couh hainduj lienh dinfwngz guh daeuhseih, sien yungh duhndaem ndei ceh ndaej le naengj cug roxnaeuz cawj cug, liuxle ginggvaq oemqfat ndei、swiq ndei dak ndei daengj haujlai mbaek couh baenz, miz ndaengq、cit song cungj, cungj dwg gij liuh ndei cauj byaek, heiq hom noengzna, gwn liux bak hom.

Daeuhseih Yangzmeij aenvih senj liuh yiemz, guh ndaej ndei, miz “sam cungj cingh” couhdwg “cingh sengcingz、 cingh fwngzguh、cingh huqseuq” caeuq “sam ndei” couhdwg “fwngz lumh raen ndei、bak gwn raen ndei、heuj nyaij raen ndei”, baengh gij maenhndei neix mingz cienz doh lajmbwn, neix couh ndaej haujlai vunz gyaezmaij. Ciuzcinghcauz duenh Gvanghsi, de dwg gij liuhboiq daeuz aeu daeuj cawj byaek ndaw ranz vuengzdaeq. Bak lai bi daeuj, daeuhseih Yangzmeij gonqlaeng miz le gij diengzhong gaeuqgeq “Du’gyahfangj” “Gvangj- cwngzhau”“Genvazhau”daengj, duenh ceiq hoengh ne bi cauh miz caet、bet fanh gaen baedauq, gai bae gyae daengz Fuzgen、Sanghaij daengj dieg.

Bi 2010, gij dinfwngz guh daeuhseih Yangzmeij ndaej senj haeuj buek daihsam swcigih gaep feihvuzciz vwnzva yizcanj mingzloeg.

Seizneix, Hawgeq Yangjmeij cijmiz “Du- gyahfangj” lij guh daeuhseih, cungj dinfwngz neix daihdaih swnjcienz, cienz daengz Du Yozfwnh gaenq miz daihhaj daih lo. Du Yozfwnh cingq dwg bouxswnjcienz “gij dinfwngz guh daeuhseih Yangzmeij” swcigih gaep feihvuzciz vwnzva yizcanj haenx. Yienznaeuz deng canjlieng caeuq gyaqcienz hanh, Du Yozfwnh vanzlij dingj aeu dinfwngz cojcienz guh daeuhseih, “hawj vunzlai ndaej gwn daeuhseih miz feihdauh cojcienz”.