Bihaenx ngoenzhaenx, song ranz- nden ndaw mbanj caemh ngoenz seng lwgnyez, song ranz cungj dwg seng lwgsai. Daeg seng gonq heuhguh Aengeng, daeg seng laeng heuhguh Gouhdawh. Songde daj iq guhdoih guhcaemz, guhdoih bae hag, dwg hujgeiq ndei.

25 bi bihaenx, Aengeng aeuyah, mehyah sangreux、yienghsiengq gyaeundei, caemhcaiq unqswnh. Gyoengq hujgeiq ndaw mbanj cungj hozhaenz Aengeng aeu ndaej yah yienghneix.

Gwn laeujaeuyah ngoenzhaenx, Aengeng bongx mbaq Gouhdawh, naeuz:“Gou aeuyah gonq mwngz, gou hingz mwngz lo.”

Gouhdawh ngaekngaek gyaeuj. Aengeng riuhehe.

Bi daihngeih, Aengeng seng dahlwg ndeu, dah neix yienghnaj gyaeundei lumj meh de nei. Gvaq le song bi, Aengeng youh miz daeglwg ndeu. Daeg neix ngoenz beij ngoenz dwggyaez, bi beij bi gvai, boux raen boux haenh. Aengeng angqvauvau, ndawsim gag naeuz: Mingh gou caen ndei, mbwk miz sai miz.

35 bi bihaenx, Gouhdawh lij caengz ra ndaej yah, damzyoux 3 baez gvaq, mbouj miz baez lawz baenz. Aengeng hix lawh de gyozgik, dauq- cawq gaisau mehmbwk hawj de, hoeng, mbouj miz byawz nyienh haq. Gizsaed, Gouhdawh cawz le yiengh- siengq miz di yakyawj, gizyawz lij gvaq ndaej bae, caen mbouj rox gyoengq mehmbwk vihmaz mbouj nyienh haq de? Doeklaeng Aengeng fwt siengj daengz dahnuengxbiuj swhgeij youq mbanj gyae. Dah neix caeuq songde caemhsaemq, yiengh- siengq yakyawj cixbah, lij dasang dem, seizneix gaenq baenz meh- mbwklw ndeu lo.

Aengeng gangj ndei gangj rwix, dauqdaej dawz dahnuengxbiuj caeuq Gouhdawh gap baenz gvanbaz lo.

Gouhdawh gyo’mbaiq Aengeng raixcaix. Aengeng bongx mbaq de naeuz:“Gou guh boh gonq mwngz, gou hingz mwngz lo.”

Gouhdawh ngaekngaek gyaeuj. Aengeng riuhehe.

3 bi ndawde, Gouhdawh seng song dahlwg. De lij siengj seng lwgsam dem, naeuz saekseiz ndaej saek daegsai ndeu daeuj ciep lozyieng. Hoeng, caiq aeu couh mauhseng lo, cwngcwz mbouj hawj seng.

Aengeng bongx mbaq Gouhdawh naeuz:“Gou mbwk miz sai miz, gou hingz mwngz lo.”

Gouhdawh ngaekngaek gyaeuj. Aengeng riuhehe.

Dahlwg、daeglwg Aengeng aeu yiengh miz yiengh, aeu siengq miz siengq, ukgyaeuj coengmingz lingz- leih, song boux lwg cungj gauj ndaej hwnj daihhag. Dayoz bizyez le, dahlwg youq cunghyoz ndaw singz guh lauxsae. Daeglwg engq ak, seizneix gaenq dwg bouxdaeuz ndaw danhvei.

Yienghnaj song dahlwg Gouh- dawh yakyawj cixbah, aen’uk lij moet dem, cang mbouj ndaej geij cihsaw, doegsaw mbouj baenz saw, cengqgengz doeg sat cuhcungh le, couh gonqlaeng maranz riengz bohmeh roengz naz haeuj reih, din samj naez fwngz samj namh.

Aengeng bongx mbaq Gouhdawh naeuz:“Lwgnyez coengmingz roxnaeuz oenj, yienghsiengq ndeiyawj roxnaeuz yakyawj, cungj dwg swnj bohmeh, mbouj miz banhfap lo! Gou hingz mwngz lo!”

Gouhdawh ngaekngaek gyaeuj. Aengeng riuhehe.

Bihaenx, Aengeng youq henz roen gyaeujmbanj hwnj ranzlaeuz. Song hongq sam caengz laeuz. Ndaw rog cungj nem cienmeng, cang ndaej gyaeundei raixcaix, dwg aen laeuz ceiq ndeiyawj ndaw mbanj seizhaenx. Gouhdawh cix lij youq ranznamh gaeuq youq. Haeuj ranz moq ngoenz- haenx, Aengeng heuh Gouhdawh daeuj gwn laeuj. Youq gwnz congz, Aengeng bongx mbaq Gouhdawh naeuz:“Gou daengj ranzlaeuz gonq mwngz, gou hingz mwngz lo.”

Gouhdawh ngaekngaek gyaeuj. Aengeng riuhehe.

Baez yaep da, Aengeng、Gouh- dawh cungj geq lo.

Songde ndaej 63 bi bide, Gouh- dawh youq ndaw suenbyaek bakdou ranz swhgeij fwt laemx roengz, vunzranz dawz de bae yihyen ciengj- gouq. Yienznaeuz gip ndaej diuz mingh dauq lo, hoeng, daj seizhaenx hwnj, de byaij mbouj baenz, ndwn mbouj maenh, gangj vah hix mbouj baenz coenz, baenz gyad lo.

Ok yihyen ngoenzhaenx, Aen- geng daeuj ranz yawj de, raen gij yiengh de, gig sim’in, danqheiq naeuz:“Baenzlawz naeuz laemx couh laemx ne? Mbatneix, ndwenngoenz mwngz youq gwnz congz gvaq ndwi lo. Hujgeiq ha, baenzneix gou youh hingz mwngz lo.”

Gouhdawh ngaekngaek gyaeuj. Aengeng riu mbouj ok lo.

Ndwenngoenz lumj raemx lae, rox bae mbouj rox dauq.

Ngoenzseng 70 bi Aengeng, dahlwg daiq gvan daiq lwg dauqdaeuj yawj bohmeh, lwgbawx hix daiq lwg dauqdaeuj yawj goengbuz. Gyoengq lwglan dauqdaeuj hoh Aengeng ngoenzseng vaiqvued, songlaux haengjheiq raixcaix. Hoeng, Aengeng ndawsim miz di doeknaiq, aenvih daeglwg mbouj raen dauq. Bingzseiz, daeglwg song sam aen singhgiz couh dauqdaeuj yawj songde baez ndeu, cam nit cam raeuj. Baezneix, daeglwg gaenq miz ndwen lai seizgan caengz dauq lo, lwgbawx naeuz de okcai youq rog.

Gwn caeuz gvaq le, gyoengq lwglan yaek dauqbae, Aengeng nyaenx mbouj ndaej youh cam lwgbawx:“Daeglwg gou bae gyawz okcai baenzlai nanz?” Lwgbawx mbouj oksing, guhmuengz ndonj haeuj ndaw ciiq bae. Aengeng youh cam dahlwg:“Daegnuengx mwngz bae gyawz okcai baenzlai nanz?” Dahlwg hix mbouj oksing, vaiqvid hwnj ciiq bae, hix dauqbae lo. Aengeng cienq laeng dauq yawj coh mehyah, cij raen mehyah haeujaw. Aengeng roxnyinh geizheih, cam:“Dauqdaej ok maz saeh?”

Mehyah yaek gangj mbouj gangj. Aengeng youh cam:“Sou miz saeh muenz gou? Mwngz naeuz, dauqdaej dwg maz saeh?”

Mehyah lij dwg mbouj oksing. Aengeng laekgaek naeuz:“Mwngz ngoemx ha? Mwngz yaek gip dai gou ha?”

“Daeglwg…… daeglwg raeuz deng suenggvi……” Mehyah vah caengz gangj sat gaenq hozndaet, raemxda hix rihfefe lo.

Aengeng baez dingq ngunh bae lo.

Aen lai cungdaeuz gvaqbae le, Aengeng cij singj doxdauq, hoeng, de hwnq mbouj ndaej ndang lo, roxnyinh cienz ndang unqnyieg, lumj mbouj miz ndok nei, gangj vah hix mbouj baenz coenz.

Aengeng mbwtmbwt mbwjmbwj, naeuz:“Duz daigaj neix, guh maz saeh baenzneix ne? Mbouj ndeindei guh- vunz! Hawj dou youheiq lairaeuh…… Danghnaeuz Gouhdawh rox gij saeh neix, gou couh deng de riu lo…… Mboujgvaq, Gouhdawh ha, mwngz aeu maz daeuj riu gou? Vahsug naeuz, duzlozdoz byom dai lij beij duzmax hung nw!”

Daj hwnzde hwnj, Aengeng mbouj gwn mbouj ndoet, maz cungj ndwnj mbouj roengz hoz bae. 7 ngoenz gvaqbae le, de cij lw di heiq ndeu. Mehyah yawj gij yiengh de yaek goenqcaw, nyaenx mbouj ndaej baenzneix souhcoih, cijndei simq goekrwz de naeuz:“Haemhlwenz Gouhdawh gaenq bae lo.”

Aengeng dingq le fwt singjsak, naeuz:“Gouhdawh ha, mwngz bae gonq gou, gou youh hingz mwngz lo, gou hingz mwngz ciuh vunz ndeu, hehe…… Mwngz bae le, gou lix roengzbae lij miz maz yinxdaeuz dem? Bae daengz lajyaem, gou ciuqyiengh aeu hingz mwngz!” Gangj sat de couh goenqcaw bae lo.

Gouhdawh dangyienz lij lix. Mboujgvaq mboengqneix ndangdaej de nyieg lairaeuh. Baez ndaejnyi Aengeng bae lo, de heuh mehyah ungj de bae yawjyawj Aengeng baez naj doeksat. Mehyah naeuz:“Mwngz baenzlai geq mbouj hab bae yawj bouxdai. Mbouj bae lo!” Gouhdawh fatheiq naeuz:“Aeu bae! Itdingh aeu……aeu bae……bae yawj de da ndeu.” Mehyah hozndat naeuz:“Gou ungj mwngz bae caeuq de caemh gumz cixbah!” Gangj dwg baenzneix gangj, hoeng lij dwg ciuq gij vah Gouhdawh bae guh.

Daeuj daengz henz ndang Aengeng, Gouhdawh iet song fwngz saenzdedded de bae gaem fwngz Aengeng, fwngz Aengeng youh gyoet youh gyaengj, Gouhdawh hix mbouj yiemz:“Aengeng ha! Mwngz vihmaz bae gonq gou? Mwngz bae gonq gou, gou dauqdaej hingz mwngz baez ndeu lo! Gou dauqdaej hingz mwngz baez ndeu lo” Caen dwg geizheih, seizneix Gouhdawh gangj vah gingqyienz baenz coenz, cingcing cujcuj, gangj sat, de yaep daej yaep riu. Mehyah de muengz ungj de lizhai.

Youq gwnz roen maranz, Gouhdawh youh lumj bingzseiz nei, gangj vah mbouj baenz coenz lo, coenz gwnz mbouj ciep coenz laj, raemhraex mboen naeuz:“Gou dauqdaej——hingz mwngz——baez ndeu lo. Gou dauqdaej——hingz mwngz——baez ndeu lo, hoho……”

Mehyah raen de ajngaeb fofo, couh muengz ganj roen. Baez yamq haeuj dou ranz, mehyah hix baeg caez lo, naengh gwnz sahfaz yietnaiq, seizneix mbouj raen Gouhdawh oksing, sijsaeq bae yawj cij rox de gaenq goenqcaw lo.

Vunzmbanj naeuz, song baeuq neix caemh ngoenzseng, lienz ngoenz- dai lij caemh ngoenz, dauqdaej byawz hingz gvaq byawz ne?