Ngamq daj lajmbanj caijfangj dauqma, bouxdaeuz bause couh gyau hawj gou aen yinvu ndeu, heuh gou bae cimhra dahsau gouqvunz ndeu, naeuz hawj 5 ngoenz seizgan, yaek caijfangj de caemhcaiq raiz bien doengsaenq ndeu. Doiq gou boux gicej laux neix ma gangj, raiz bien faenzcieng yienghneix mbouj hoj, gij hoj de dwg, dahsau heuh maz mingzcoh, mbouj rox; youq gizlawz hwnjban, mbouj rox; ranz youq gizlawz, hix mbouj rox. Dandog ndaej raen gvaq gij yienghceij raeblaeng de. Heuh gou bae gizlawz cimhra?

Geij ngoenz gonq, youq haujlai ndaw veihsinginz, doxcienz miz duenh sibinz ndeu. Ngoenzhaenx banhaet, cingq dwg seiz hwnjban, ciiq、cihung、dienhci、danci, doxcaenx ndaet- fwdfwd. Gwnz roenvunzbyaij henz gai, vunzbyaij baebae dauqdauq. Youq laj goreiz henz gai, caenh raen miz mehlaux caeuq mehmizndang ndeu gvaengxgvax baenqbangh, sim gaenj- riri muengh gvaq doiqmiemh bae. Gvaq yaep he, mehmizndang sawq- mwh gotdawz aen dungxbongz bonj- faenh, najbyak nyaeuqnyat, aenndang bibi buengqbuengq, unqnemnem ing haeuj ndang mehlaux bae. Yawj gij yiengh de, lumj yaek seng lwg lo. Vunzhaw gaenjrienrien byaij loh, mbouj saek boux haeujsim song mehmbwk neix.

Cingq youq seizneix, miz dahsau byoemraez he gwih dancidienh gvaq henz, de nyenggyaeuj yawjraen lo, doq cacoemj roengz ci, ndangmbaeu riengjret buet gvaqbae, iet song fwngz ngamq daiz raeblaeng mehmizndang, aenndang mehmizndang naekgywd- gywd couh daenz roengz laeng de daeuj. Dahsau dingx mbouj ndaej, song gyaeujhoq swnhseiq gvih roengz rinbenj bae, song fwngz cengqgengz umj maenh mehmizndang. Baezneix, gyoengq mehmbwk henz gai hix yawjraen lo, doxriengz foenfoen buet gvaqdaeuj, aeu buh, aeu ceij, aeu baengz humx baenz aen gvaengx. Dahsau hix deng humx youq baihndaw. Miz vunz gaenq daj dienhvah hawj 120, hoeng meh- mizndang gaenq deq mbouj gib, yaep he, lwgnding couh seng okdaeuj. Caeklaiq miz gyoengq mehmbwk bang fwngz, mehlwg cungj ndaej bingzan. Dahsau itcig gvih youq gizhaenx, onjdupdup umjdawz mehsenglwg, cig daengz 20 faen cung cigouqvunz ciepaeu mehsenglwg bae le, caj vunzlai sanqdeuz, dahsau cij song fwngz cengjhwet ndwn hwnjdaeuj. De baez gvez baez vej byaij daengz dancidienh, naiqsisi youh hai ci lizbae.

Hojsik, youq ndaw sibinz, daj gyaeuj daengz rieng mbouj raen fajnaj de saekdi. Daj baihlaeng yawj de, dahsau ndang reuxred, ndang sang mbouj daengz mij roek. Aenvih ngamq haeuj seizcou, de daenj dauq buhmbang ndeu, saek hoengzmeiq. Byoem raez dapmbaq, miz di nyungq. Aen singz neix miz bak geij fanh vunz, lumj gij yiengh dahsau neix, mbouj rox miz geijlai vunz, cimhra de, couh dangq ndaw haij rauz cim.

Gou dawz gij siusik ra vunz fat haeuj veihsinginz caeuq baengzyoux- gien bae. Caen lingz dahraix, dang ngoenz couh miz vunz daj dienhvah hawj gou. Boux daj dienhvah haenx cingq dwg dah hujgeiq dahsau. Gou vaiqdi cam de aeu dienhvah haumaj dahsau. Gou angq dwk bakriu ndaengriu, ganjvaiq dwk gij haumaj soujgih dahsau. Hoeng, lienzriengz sam ngoenz, dienhvah cungj dwg yiengj duh——duh——duh——

Gou fat gij nyapnyuk gou haeuj veizhsinginz bae. Ndaw ginz mwngz coenz gou coenz gangjnyimnyim. Miz vunz naeuz, seizneix vunz guh saeh ndei, cungj lau deng vunz laihcoih. Bouxdenggouq dingjlingz ok maz saeh, vunz ndawranz de couh laihnaeuz bouxgouqvunz luenh gouq, miz vunz lij deng gauq boizcienz dem. Caen dwg: Byaekroz ciemq byaekheu, duznou hangz duzmeuz. Vunzndei hoj guh ha. Dahsau lauheiq dwg miz yiengh simyou neix, ndigah mbouj siengj hawj vunz rox de.

Cingq aenvih gwnzbiengz miz yiengh rumzrwix heiqsez neix, gou engq miz cwzyin bae cienzyiengz cungj saeh ndei neix. Gou youh daj dienhvah hawj dah hujgeiq dahsau. Gou cam de, dahsau vihmaz mbouj ciep dienhvah. Dah hujgeiq naeuz, dahsau naeuz lo, de guh gij saeh neix, mbouj dwg siengj okmingz, hix mbouj dwg heuh vunz hoizbauq. De cingj gicej gaej ra de lo.

Ra mbouj raen dahsau, boux- daeuz ngoenzngoenz coi gou, gou gip lumj duzmoed gwnz rek ndat. Gou youh seiqcawq fat siusik haeuj veihsinginz bae, gouzgouz bouxak bangcoengh gou.

Cingqcaen, gyanghwnz, gou cingq siengj diemjhai veihsinginz, soujgih yiengj lo. Hoeng dingq sat dienhvah, gou youh muenghndwi doekhoengq lo. Vunz gangj mbouj loek, caen miz yiengh vunz najna simrwix neix. Mbouj boizaen cixbah, lij laihcoih bouxgouqvunz. Dienhvah dwg goeng- gvan mehsenglwg dwk daeuj. De naeuz, mehyah de ngoenz youq rog gai senglwg seiz, diuz lienhhozgim ndeu doek lo. De ngeiz aiq dwg bouxumj mehyah haenx swnhfwngz nyaeb bae lo. De cingj gicej heuh boux de daeuj bause boiz diuz lienhhozgim. Mboujnex, couh youq gwnz fazdingz doxraen. Gou dangseiz doq fok de, guh vunz yaek miz liengzsim, vunz simndei gouq mehyah mwngz, mwngz dauqfanj laih vunz dam bienzngeiz. Neix mbouj dwg gvaq dah gveng dwngx ha. De raen gou fatheiq, youh hozunq naeuz:“Gouzgouz mwngz heuh de okdaeuj raennaj baez he, diuz lienhhozgim neix dijbauj raixcaix.”

Gou youh dwk dienhvah ra dah hujgeiq dahsau. Dah hujgeiq dahsau baez dingq, doq laekgaek han naeuz:“Lajmbwn caen miz cungj vunz dungxvaih neix. Lau maz, gou dauq siengj caenda yawjyawj cungj vunz neix, aennaj miz geijlai na, aensim miz geij naeuh. Heuh de daeuj, ngoenzcog gou itdingh daz dahsau bae.”

Gyanghaet, mehnaenghndwen caeuq goenggvan gyabuz gyagoeng de caeuxcaeux couh daengz bause bangunghsiz. Haujlai vunz hix daj ndaw veihsinginz rox gienh saeh neix, mbouj iu gag daeuj, ndaw sam caengz, rog sam caengz, doxcaenx ndaet- fwdfwd.

Gvaq 10 lai faen cung, aen dancidienh he “cad” dingz youq gyanghongh. Gyoengqvunz muengh gvaqbae, caenh raen song dah lwgsau daj gwnz ci hamj roengzdaeuj. Song dah sangdaemq ca mbouj geijlai, dah ndeu bizbwd, dah ndeu reuxred. Mbouj yungh ngeix, dahreux couhdwg dahsau gouq vunz haenx lo. Goenggvan mehnaenghndwen naj riunyumnyum coh dahreux nyig hwnjbae:“Cungjsuenq ndaej raen naj mwngz lo.” Dahbiz naj haenrwdrwd, iet fwngz laengz de:“Mwngz siengj haep aeu geijlai cienz? Vaiq aj bak.” Goenggvan lij dwg bakriu najrongh:“Docih mwngz.” Dahbiz mbwnjbak naeuz:“Hw! Gaej gangj vahbyonj, docih de aeu diuz lienhhozgim mwngz ha.” Goenggvan mbajmbwdmbwd ganj mbouj ok vah. Gou lau oksaeh, vaiqdi cap youq cungqgyang song boux, riuhehe naeuz:“Gaej fatheiq, miz vah menhndei gangj.” Mehnaenghndwen byaij gvaqdaeuj, unqswnh gaemfwngz dahsau, raemxda gvaengxloekloek:“Dahnuengx, docih mwngz gouq gou. Ngoenzhaenx mbouj miz mwngz, mehlwg gou……” Dahbiz fwt beng fwngz mehnaenghndwen okdaeuj:“Mwngz siengj aeu maz, doiq gou naeuz, gaej cangguh duznyaen soengq noh hawj duzgaeq.”

Gyoengqvunz hix gangjnyaeng- nyaeng, miz vunz daemxcengj meh- naenghndwen, naeuz dahsau gouq vunz mbouj wnggai swnhfwngz aeu diuz lienhhozgim bouxwnq. Dingzlai vunz cix naeuz mehnaenghndwen gwn raemx lumz mboq, gwn noh lumz mou. Gouq de lij laihcoih dahsau, caen mbouj rox najcouj.

Dingqnyi miz vunz riugae swhgeij, mehnaenghndwen simgaenj raixcaix, doq mbon ok diuz lienh- hozgim he, naeuz:“Dahnuengx, diuz lienhhozgim neix dwg diuz mwngz doek la, gou ngoenzneix cungjsuenq ndaej boiz hawj mwngz lo.” Naeuz sat, doq oet haeuj fwngz dahsau bae. Dahsau ndwnngoegngoeg cim de. Mehnaenghndwen mboujeiqseiq naeuz:“Doiq mbouj hwnj, hawj mwngz dungxcieg lo.” Dahsau dauq miz di najnyaenq. Dahbiz gangjbaeh naeuz:“Mbouj dwg diuz mwngz deng de nyaeb’aeu, heuh de boiz ha, baezlawz bienqbaenz diuz de doek la?” Goenggvan miz di najmong gejhoiz naeuz, vunz ranz de siengj dangqnaj naeuz coenz docih dahsau, youh ra mbouj raen de, couh naemj aen geiqmaeuz neix, yaeuh dahsau okdaeuj raen baez naj he. “Cingj mwngz yienzliengh.”

“Ho!” Gyoengqvunz soeng gaemz heiq he, doengzcaez loh’ok najriu danqhaenh. Mehnaenghndwn youh dawz aen hoengzbau ndeu oet hawj dahsau:“Dou mbouj miz maz dijbauj boizaen mwngz, soengq aen hoengzbau iqet, dangguh gij saenzcingz gitleih ba.” Dahsau naj hoengzuu, bi fwngz vedved:“Gaej……gaej yienghneix. Daxcej, mwngz lij naenghndwen bwnq lwg, yungh cienz lai. Gou……gou mbouj aeu. Ngoenzhaenx, cingqhab bungqraen, gou dwg swnhfwngz la. Ndaej bang couh bang lo.”

Gou yaengx hwnj sienggih, aeu aen gyaeujgingq ciuq coh dahsau. Dahsau baez raen, fwt nyaenq- ndimndim ngaemgyaeuj roengzdaeuj, fajnaj hoengzfifi, lumj duj vadauz singjsien.