Fouxroeg- dingdiuj Bouxcuengh youq Vujsenh Yen Dungzlingj Cin ranghdieg Bouxcuengh comzyouq neix hwng riuz, de dwg cungj foux ciuqei duzroeg ningdoengh ndeu, Guengjsae gag miz.

Gij doxgaiq aeu daeuj diuq fouxroegdingdiuj Bouxcuengh haenx dwg gij yienghroeg aeu duk san baenz gyaq, baihrog duk baengzcouz heu aeu maeyungz heu nyib dangguh bwn. Vunz dangdieg gyaez roegdingdiuj bwn saek heu singjsat ndei, singheuh singjseuq, unqswnh maezvunz, neix couh dang de dwg duzndei miz fuk.

Youq dangdieg, mboengq gvaqcieng, vunzlai dangdieg gyaez guh hozdung diuq fouxroegdingdiuj angqhoh ciengmoq. Guh hozdung seiz, miz bouxsai ndeu cangguh roegdingdiuj, boux ndeu cangguh bouxgeq, daiq duzroeg riengz bakdouranz bae daengz gak ranz yienjok hohfuk. Yienj fouxroegdingdiuj seiz, bouxdiuqfoux haeuj ndaw gyaqroeg bae, song fwngz gaem roxnaeuz ngaeu dawz gaiqganj ning gyaeuj roeg、da roeg、bak roeg、fwed roeg, diuq foux le, gyaeuj roeg cienq ning, da hai haep, bak fatsing, yienj ok gij ningdoengh ndiepgyaez、doenghsim haenx, lumj duzroeg mbin、ra gwn、gwn raemx、caemx ndang、baeninz daengj. Diuqfoux liux youq gwnz gyaqroeg ciemz ok geu “bwn” ndeu, soengq hawj bouxcawj, hoh ranzcawj vunz lai ranz hoengh. Bouxcawj couh baen laeuj noh、bauhoengz hawj bouxdiuqfoux.

Gij fap biujyienj fouxroegdingdiuj caeuq gij fouxgungjcoz Daijcuz yaek doxlumj, gak cungj gyaqroeg yungz haeuj gij dungxcaiz caeuq cauhmoq vunz Bouxcuengh.

Ciuq fouxroegdingdiuj daihcibsam daih bouxswnjcienz Loz Cicungh lwnh, diegcoj gyoengqde youq Laizbinh Nanzsw Yangh; nga Ranzloz gungh cienzfat le cibroek daih bouxfouxroeg, gij foux neix youz daih’it daih bouxyienj Loz Dauyangh cauh’ok, daengz seizneix gaenq swnjcienz le cibroek daih. Ciuq neix daeuj suenq, fouxroegdingdiuj daihgaiq hainduj miz youq duenhdoeklaeng Ciuzmingzcauz caeuq duenhhainduj Ciuzcinghcauz, gaenq miz sam bak lai bi nanz lo.

Bi 2010, fouxroegdingdiuj Bouxcuengh ndaej senj haeuj daihsam buek swcigih gaep feihvuzciz vwnzva yizcanj mingzloeg.