Geij bi neix daeuj, Denhdwngj Yen Yinzminz Fazyen ciuq gij saedsaeh bonj dieg caeuq vunzlai aeuyungh, ciuq dieg bae gungganq fazgvanh Cuengh Gun song vah, caemhcaiq gaenxmaenx haiguh “song vah saemjbuenq”“song vah fugsaeh” daengj swhfaz hozdung, roengz- rengz guh hong fugsaeh daegsaek swhfaz hab gij saedsaeh diegbya, ndaej vunzlai dangdieg haenh.

Denhdwngj Yen dwg dieg comzyouq Bouxcuengh, gyaeujvunz Bouxcuengh ciemq 98%, vunz dingzlai gangj Vah- cuengh. Denhdwngj Yen Fazyen laebdin gij saedsaeh Denhdwngj Yen, senj- nyaemh caeuq doxgyau ganbu seiz daeg- daengq senjnyaemh gangingj sugrox vahdeihfueng bonj dieg haenx, seizneix gungh miz fazgvanh yenzngeg 25 vunz, ndawde 23 boux fazgvanh dwg vunz Denhdwngj, sugrox yungh Vahgun caeuq Vahcuengh bonj dieg caeuq boux- dangsaeh doxgangj, vih fazyen guh hong saemjbuenq ndaej swnh roengz giek.

Ciuq gij guhhong daegdiemj yinzminz fazdingz fugsaeh lajmbanj, aen fazyen neix aeu yinzminz fazdingz dang- guh dieggoek youqgaenj gungganq faz- gvanh song vah. Geij bi neix daeuj, aen fazyen neix gangingj bouxcoz ngamq ciu haeujdaeuj haenx aeu faenboiq daengz fazdingz guhhong gonq, hawj gyoengqde haeujgyawj caeuq vunzlai guh saeh, hag yungh vah minzcuz dangdieg, sugrox fungsug, vaiqdi daezsang gij naengzlig fazgvanh bouxcoz yungh Vahcuengh banh’anq.

Aen fazyen neix lij doenggvaq “yungh geq daiq coz” gungganq faz- gvanh song vah. Doiq geij bi neix daeuj mizmbangj gangingj ngamq ciu haeuj- daeuj dwg vunz dieg rog、dingzlai mbouj rox gangj Vahcuengh, aen fazyen neix aeu fazgvanh geq faenboiq daengz gak aen yezvudingz, hawj fazgvanh “song vah” ciengzgeiz youq itsienq guhhong saemjbuenq、gingniemh lai haenx daiq gangingj bouxcoz banh’anq, yungh vah bae son, ndanggaeuq guhyiengh, bang gangingj bouxcoz daegbied dwg fazgvanh bouxcoz rox mbangj fuengsik gaijgez cengnauh、gingniemh guhfap mboujdan hab gij sibgvenq conzdungj minzcuz dangdieg youh hab faplwd gvidingh, hawj gyoengqde vaiqdi baenz fazgvanh song vah.

(Liengz Lezningz)