Faengxhung Hwngzyen dwg cungj gijgwn vunz Hwngzyen Gvangjsih gvaq cieng aeu miz haenx, Hwngzyen miz cungj gangjfap “mbouj miz faengx mbouj gvaq cieng”. De miz goengheij、baiqcieng、gaicawx、soengqlaex、caeq coj baiq baed daengj lai cungj yungh, miz gij eiqsei gyaeundei、vuenyungz、angqyangz daengj.

Faengxhung Hwngzyen aeu rongfaengx、haeuxcid、duhheu、nohmou doenghyiengh neix suek baenz, caiq gya gyu、veicingh、laeujhaeux ndei、mbahajrang、mbahozceu、hingndip、coeng、dangz daengj, linghvaih ciuq bakngah mbouj doengz lij ndaej gya lwgraeq、nohgungq、haeuxndaem daengj. Ginggvaq ceh raemx swiq seuq、suek baenz cug ndei、dumq biq、yo ndei bauj singjsien daengj mbaek hong, ceiqlaeng baenz faengx ndei.

Faengxhung Hwngzyen saeqsim bae guh、senj liuh saeqnaeh、aende hungloet、saek lwenq rongh ndei、gwn le raen miz daegsaek “heiq noengz hom nanz、unq ndei lauzhaj、singjsien dawzbak、feihdauh nanzlumz”, vanzlij miz gij eiqsei angqhoh ndei, haujlai nanz doxdaeuj vunzlai gyaezmaij baenzmaz bae.

Bi 2010, gij dinfwngz faengxhung Hwngzyen ndaej senj haeuj daihsam buek swcigih gaep feih- vuzciz vwnzva yizcanj mingzloeg.

Faengxhung Hwngzyen baengh aende hungloet、saek lwenq rongh ndei、heiq hom ndeigwn mingzdaeuz cienz doh Guengjsae, laebdaeb song baez ndaej Dunghnanzya Gozci Lijyouz Meijsizcez gimciengj, dwg Guengjsae gijgwn iq cojcienz ceiq mizmingz haenx.

Doengh bi neix daeuj gyoengq hekyouz caeuq canghbuenq deng mingzdaeuz yinx daeuj cawx faengxhung Hwngzyen, guh mbouj gaeuq gai; bingzciengz liggaeuq bet nyied couh miz gai, ndaw cieng cix mbouj gaeuq vunz aeu.