Gwnz mbwn miz duzbyaj,

Laj deih miz bohmeh,

Sinhoj dwg gyoengqde,

Lwgnyez cij baenz vunz.

Guhdoih youq gwnzbiengz,

Bohmeh dwgrengz lai,

Guh laemx hoemj laemx ai,

Vih daihlaeng mbouj ienq.

Seng boux lwg ok ndang,

Meh sim angq youh you,

Miz bingh naek bingh mbaeu,

Simdaeuz luenhlinlin.

Yaek ciengx lwg majhung,

Bohmeh mbouj yungzheih,

Yienghyiengh cungj aeu ngeix,

Lauheiq ganq mbouj daengz.

Boh okbae dawz cae,

Yied ae yied fad vaiz,

Ganq yaek lix yaek dai,

Haemh gag(biq) myaiz ok lwed.

Meh okbae ndaem haeux,

Gyaeuj ngunh da youh raiz,

Hoz hawq mbouj miz myaiz,

Lumj yaek dai daengz mingh.

Mbouj guh cix mbouj ndaej,

Lwgnyaeq aeu sawj ngaenz,

Mbouj guh cix mbouj baenz,

Yaek ra ngaenz ciengx mingh.

Soengq lwg bae hagdangz,

Langh baedauq aeu ngaenz,

Guh ndaej faen sawj faen,

Mbouj miz ngaenz ndaw daeh.

Soengq lwg bae hagdangz,

Langh baedauq cam cienz,

Bohmeh mbouj miz ndenq,

Sim hix genz bae riengz.

Soengq lwg bae hagdangz,

Langh baedauq fanz sim,

Gyaranz hojndingnding,

Simfanz ninz mbouj ndaek.

Mbouj guh lwg cix cam,

Mbouj ganq lwg cix yungh,

Lwg yied ngoenz yied hung,

Cingq dwg seiz yungh ngaenz.

Ngoenzngoenz baerairai,

Cix mbouj ngaih(heih) a boh,

Ngoenzngoenz bae’ngo’ngo,

Mbouj rox ngoenzlawz soeng.

Ngoenzngoenz baeyingying,

Sim hix in a meh,

Ngoenzngoenz bae’nge’nge,

Sinhoj de mbouj damz.

Ngoenzngoenz baeyingying,

Sim hix in liuxcaez,

Boh mbouj bae mbouj ndaej,

Dungx saej hix yaek gwn.

Ngoenzngoenz baeyengyeng,

Meh dwgrengz dwgrah,

Bae lumj boux gaujvaq,

Ngoenz maz ndaej raen rongh.

Gizlawz miz gunghdi,

Boh doxdiz(ciengj) haeujbae,

Ngoenz fwn doek byaj raez,

Hix bae mbouj ndaej youq.

Ranzlaeuz geijcib caengz,

Boh daengz gwnz guhhong,

Buh gwnz ndang uq mong,

Mbouj miz naj dongx vunz.

Ranzlaeuz geijcib caengz,

Boh daengz gwnz dok ding,

Langh baez ca yamq din,

Nyaenx mingh couh mbouj miz.

Ranzlaeuz geijcib caengz,

Meh rox daengz youheiq,

Gyaranz raeuz mbouj ndei,

Boihseiz hix aeu ganq.

Vih ra ngaenz ra cienz,

Dwgrengz mbouj yietnaiq,

Saek ngoenz bingh baez dai,

Ce caiq bouxlawz boiz?

Ndit ndat hix aeu bae,

Byaj raez hix aeu byaij,

Guhhong mbouj yietnaiq,

Caen yaek dai daengz mingh.

Ndit ndat hix aeu bae,

Byaj raez hix aeu goq,

Gij gyaranz raeuz hoj,

Aeu goq lwg baenzvunz.

Gienq bohmeh yietnaiq,

Mbouj ndaej haih diuzmingh,

Raeuz miz haeux gwn imq,

Lix diuzmingh couh baenz.

Nyienh bohmeh ndang ndei,

Gaej naemj ngaenz baenzlai,

Raeuz mbouj naemj fatcaiz,

Mbouj ndaej dai daengz mingh.

Miz gwn donq gvaq donq,

Sim hix onj a boh,

Gyaranz hoj couh hoj,

Ndang mbouj yoq(bingh) couh baenz.

Gyaranz hoj couh hoj,

Hix aeu goq ndangdaej,

Gyoengq lwg sou lij nyaeq,

Goq ndangdaej cij baenz.

Boh naeuz gangj dwg ndei,

Baedauq cungj yungh ngaenz,

Saek ngoenz fat cougaen,

Mbouj miz ngaenz bae yw.

Meh naeuz gangj mbouj loek,

Feiz doek ndang cij rox,

Miz lwg couh aeu goq,

Goenq saihoz hix bae.

Lwg yawj boh mbouj daengz,

Lwg caengz meh mbouj dij,

Mwh raeuz nienz lij iq,

Meh yawj dij lumj gim.

Gaxgonq gou lij nyaeq,

Ciengzseiz daej gwn noh,

Raeuz gyaranz gungzhoj,

Noh mbouj miz roengz daiz.

Gaxgonq gou lij nyaeq,

Daej caeuq boh bae haw,

Yienghyiengh nauh boh cawx,

De song da gawz(gvaengz) raemx.

Gaxgonq gou lij nyaeq,

Daej caeuq meh bae daiq,

Vunz daenj mad daenj haiz,

Meh duetdin byaij loh.

Gaxgonq gou guh’unj,

Youq gyang rungj meh ninz,

Meh umj gou swiq din,

Daejlinlin gvaq hwnz.

Gaxgonq gou guh’unj,

Youq gyang rungj boh ninz,

De gwn mboujcaengz imq,

Gou cing(rag) de bae youz.

Gaxgonq gou lij nyaeq,

Meh mbouj hawj guhhong,

Daengz seiz hung ok rongz,

Ce meh gongz ndaw ranz.

Gaxgonq gou lij nyaeq,

Meh lumh bae lumh dauq,

Seizneix raeuz hung laux,

Mbouj siengj dauq raen meh.

Gaxgonq gou lij nyaeq,

Boh coenz ae mbouj ndaq,

Seizneix raeuz hung maj,

Cungj ndaq boh mbouj baenz.

Gaxgonq raeuz lij nyaeq,

Boh sim mbouj ndaej soeng,

Seizneix ciengx raeuz hung,

Cungj mbouj lumz daxboh.

Bohmeh gou sinhoj,

Mbouj rox yienghlawz gangj,

Gou mbouj haq ndaw mbanj,

Sim cix fanz dahraix.

Gou mbouj haq ndaw mbanj,

Sim hix fanz a boh,

Donq miz laeuj miz noh,

Mbouj raen boh daeuj daengz.

Gou mbouj haq ndaw mbanj,

Sim hix fanz a meh,

Donq miz haeux miz nyeq(noh).

Mbouj raen meh haeuj henz.

Gaxgonq daengz ndwencieng,

Bouxboux daenj buh moq,

Boh naeuz hoj dwg hoj,

Cawx buh moq gvaq ciet.

Meh guh hoj guh heu,

Mbouj miz geu buh moq,

Naeuz raeuz hoj dwg hoj,

Mbouj ndaej yoq(ca) gvaq doih.

Bohmeh guh sinhoj,

Raeuz gag rox cij baenz,

Seiz miz gwn miz daenj,

Aeu naemj daengz bohmeh.

Bohmeh guh sinhoj,

Raeuz goj mbouj ndaej lumz,

Soengq daenj caiq soengq gwn,

Boiz mbouj hwnj bohmeh.

Ngoenz bae haw bae mbanj,

Cang ndei di hawj boh,

Byaij gvaq roen gvaq loh,

Vunz haenh boh raeuz mbauq.

Ngoenz bae haw bae mbanj,

Cang ndei di hawj meh,

Vunz gvaq roen yeye,

Haenh meh raeuz baenzsau.

Bohmeh raeuz sinhoj,

Mbouj rox baenzlawz lumz,

Goq daenj caiq goq gwn,

Gyaeu lumj vunz lumj doih.

Bohmeh raeuz sinhoj,

Mbouj rox baenzlawz lumz,

Raeuz lix youq lajmbwn,

Aeu hauqswnh cij baenz.