Duzciengh nyinhnaeuz bonjfaenh dwg doenghduz ceiq hung gwnzbiengz, daekeiq raeuh. De baez bungz byawz couh naeuz:“Gwnzbiengz mbouj miz duz lawz hung gvaq gou lo!”

Ngoenz ndeu, duzciengh daeuj daengz sadan henz haij, bungz duz gvihaij ngamq daj ndaw haij ruenz hwnjdaeuj.

Duzciengh doiq de naeuz:“Gvihaij iqiq a, mwngz yawjyawj gou vei! Gou dwg doenghduz ceiq hung gwnzbiengz, gwnzbiengz caiq mbouj miz duz lawz beij gou hung lo!”

Gvihaij naeuz:“Yienznaeuz ndang mwngz hung dangqmaz, hoeng mwngz mbouj dwg doenghduz ceiq hung gwnzbiengz. Ginghlamz ndaw haij couh beij mwngz hung.”

Duzciengh dingqnyi le, cix mbouj haeujsim:“Gou rox ndaw raemx mbouj miz duz lawz hung. Hozmaj haemq hung di, hoeng hozmaj mbouj beij gou ne.”

“Yienghneix ba! Mwngz youq gizneix caj, gou bae heuh ginghlamz daeuj, mwngz baez raen couh rox byawz hung byawz iq lo.”

Gvihaij naeuz le, couh ruenz haeuj ndaw haij，youz coh gizgyae gizlaeg bae. Duzciengh youq henz haij caj baenz 7 ngoenz, cij raen gvihaij ma.

Duzciengh muengz cam:“Ginghlamz daeuj luba? Gou baenzlawz mbouj raen de ne?”

Gvihaij naeuz:“Ginghlamz daeuj lo, hoeng de mbouj ndaej dep haenzhaij, de hung lai lo, baez daengz gizfeuz couh deng goed lo.”

“Gou youq ndaw raemx mbouj rox diemheiq, bae mbouj ndaej gizlaeg ndaw haij, baenzlawz guh ne?”

“Gaej simgip! Gou miz aen banhfap ndei ndeu. Mwngz yawj gyoengq roeghaij gwnz mbwn mbin neix, yaep he gou hawj gij roeghaij doek longz gwnz ndang mwngz caez, geqgeq gwnz ndang mwngz miz geijlai duz roeghaij. Yienzhaeuh hawj gingh- lamz daj ndaw raemx fouz okdaeuj, caiq yawjyawj geijlai duz roeghaij cij ndaej longz baihlaeng de caez. Duz roeghaij gwnz ndang byawz lai, byawz couh hung lai lo.”

Duzciengh ngaekgyaeuj naeuz:“Aen banhfap neix ndei raixcaix!”

Gvihaij baez roengzlingh, gij roeghaij couh foenxfoenx doek roengz- daeuj, mbangj duz doek youq gwnz gyaeuj duzciengh, mbangj duz doek youq gwnz baihlaeng duzciengh, mbangj duz doek youq gwnz song diuz heuj duzciengh. Duzciengh iet ndaeng okdaeuj, youh miz mbangj duz doek youq gwnz ndaeng raezrangrang de. Doeklaeng, bak lai duz roeghaij ndwn longz baenz ndang duzciengh.

Duzciengh gagsaenq naeuz:“Yawjraen luba? Gwnz ndang gou miz duz roeghaij baenzlai ne.”

Gvihaij naeuz:“Baenzneix gou couh hawj ginghlamz daj ndaw haij fouz okdaeuj.”

Gvihaij youz dauqma ndaw haij. Mbouj geij nanz, ndaek “rin” hungloet ndeu couh daj gwnz haij gyae menhmenh fouz okdaeuj lo. Gij roeghaij doek youq gwnz ndang duzciengh cungj mbin bae coh ndaek “rin” hungloet cingq swng hwnjdaeuj. Seizneix, gvihaij youh youz ma haenz haij lo.

Gvihaij doq vix doq naeuz:“Mwngz yawj, daj gwnz haij gyae fouz okdaeuj haenx couhdwg baihlaeng ginghlamz.”

Yenzlaiz, mbouj dwg ndaek rin, dwg baihlaeng ginghlamz. Gij roeghaij gaxgonq doek ndwn baenz ndang duzciengh, seizneix cungj doek youq gwnz baihlaeng ginghlamz, hoeng, cij ndwn bae gaiq dieg iqetet ndeu. Gij roeghaij youq gwnz mbwn gvaenxgvax haenx hix foenxfoenx doek roengz- daeuj, geij cien duz roeghaij cij menhmenh ndwn rim baihlaeng ginghlamz.

Duzciengh doeksaet yat, muengh duz ginghlamz gizgyae, boep roengz ndaeng raezrangrang, najmong naeuz:“Haeux bauz biufefe, haeux fag dauq gaeuz gyaeuj. Doenghbaez gou baenzneix dasang, caen mbouj wnggai, yienzlaiz gwnzbiengz lij miz haujlai gij saeh gij doenghduz gou caengz raen gvaq rox gvaq!”

Gvihaij naiq de naeuz:“Duz- ciengh, mbouj youqgaenj ne! Ngoenzlaeng mwngz gaij ndei couh baenz lo!”