Geij bi neix daeuj, aen cin hag song vah daengx guek miz daeg- saek(dieggoek hengzguh)——Hozciz Si Dunghlanz Yen Vujcon Cin cauhmoq hengzguh haiguh hong hwnjguh song vah huzndei, yungh lai cungj banhfap doicaenh hag yungh song vah coi doxhuz, cingzyauq yienhda.

Doedok song vah doxhuz, vwnzva doxdoeng hwngfat. Giethab yenzdan、ndwencieng、“sam nyied sam Boux- cuengh” daengj ngoenzciet bae mbanj yienjheiq、youq lijyouz gingjgih yienj- heiq daengj, cujciz haiguh yienjheiq、yienj eu fwen daengj vwnzdij hozdung, youq gwnz banj beigingj hozdung、banjbau gvangqlangh yungh Cuengh Gun song cungj saw, youq hozdung yienhciengz fat senhconz swhliu, venj、nem fukbaengz senhconz caeuq mbaw haijbau, yungh song vah （lai cungj vah） bae senhconz gak hangh fuengcim cwngcwz sawvah minzcuz dangj caeuq guekgya.

Giethab saedsaeh aeuyungh, hag yungh song vah. Giethab ndaw cin cien moux dieggoek dajndaem youzcaz、bak moux dieggoek dajndaem makit daengj daegsaek canjnieb, ciuq dangdieg vunzlai aeuyungh, mbouj dingh seiz banh gak loh hozdung fwen minz Gun song vah、son hag gohgi ndaem ciengx. Vujcon baicuzsoj、swhfazsoj、vwnz- gvangjcan daengj cungj boiq miz ganbu song vah Cuengh Gun、Yauz Gun cungj rox, vih vunzlai daeuj cazcam、banh gak hangh yezvu daezhawj song vah fugsaeh.

Son’gyauq Cuengh Gun song vah, hong onjyamq doi baenaj. Vujcon Cin seizneix miz cogaep cunghyoz aen ndeu, miz hagseng 876 vunz; cungsim hag- dangz aen ndeu, vanzcenz siujyoz 2 aen、diemj sonhag 5 aen, miz siujhagseng 1599 vunz, lauxsae Vahcuengh gungh 7 vunz. Ndawde, Gyanghbingz Siujyoz dwg aen dieggoek guhyiengh sonhag Cuengh Gun song vah swcigih gaep, guh sonhag Sawcuengh Vahcuengh song loih vunqsik, it daengz roek nienzgaep cungj hwnj dangz Sawcuengh Vah- cuengh, Vujcon Cin cungsim hagdangz it daengz ngeih nienzgaep hix hai dangz Sawcuengh Vahcuengh.

Vatcimh minzcuz yenzsu, swnj- cienz vwnzva maenhndei. Geij bi neix daeuj, Vujcon gag cauhguh 《Mbanj- ranz Gou Ciuhvunz Gyaez Haenx》《Dunghlanz Gyaeundei Raeuh》 aeu damzraih Vujcon guh giek haenx, aeu go seiz gwzming 《Raeuz Aeu Doxgap》 gaijbien baenz go Cuengh Gun song vah 《Gaenriengz Siz Cungjsuhgi Coh Daengzcog》. Vujcon Cin lij giethab fwen haeuj hagdangz daengj hozdung, gyalai gij ligdoh sonhag conzdungj vwnzva caeuq gij ligdoh hong son vunz, banh gij hozdung ciengjdap cihsiz conzdungj vwnzva maenhndei, swnj- cienz fatyiengz conzdungj vwnzva maenhndei minzcuz.

(Moz Liujgvei Cangh Haijyingh)