Mboengqneix, Buzliuz daengx ngoenz mbouj raen saekdi najriu gvaq, de mbouj dwg danqheiq lae raemxda, couhdwg gag boux ndeu naengh youq bakdou, song da maezfwd muengh coh mbiengj ndoi doiqmienh haenx.

Mbiengj ndoi haenx, dahlwg de Dahsiengh song ndwen gonq couh dinghdingh ninz youq gizhaenx lo.

Dahsiengh lizbae, lumjbaenz mbouj miz saekdi ciudaeuz, lumj raq rumz nei ci daeuj couh saet bae mbouj raen ngaeuzingj.

Ranz Dahsiengh ciengx nonsei, ngoenzhaenx ndit ndat lumj feiz, gyaegyae muengh bae, gwnznamh feizyiemh hwnjyubyub, Dahsiengh caeuq gvan de Daihnywj bae mbaet mbawsangh ma gueng nonsei, dauqma seiz cingq dwg banringz 12 diemjcung. Dahsiengh naeuz ndat lai youh hozhawq, daeglwg de Vuzvuz muengz daek vanj souh haeuxyangz ndeu ndenq hawj de. Dahsiengh doq ci denfunghsan doq ndoet souh, de ndoet vanj souh haeuxyangz le, roxnyinh ndangdaej gig naetnaiq, gyaeuj ngunh raixcaix, hix gig raninz, byawz rox de hwnj congz baez laepda, caiq hix ndiu mbouj gvaqdaeuj lo.

Boux byoemhau soengq boux byoemndaem, meh Dahsiengh Buzliuz siengsim ndaej yaek siengj goenq saihoz caez dai bae riengz. Buzliuz ndaej 70 geij bi lo, de caeuq gvan de Goengliuz ca mbouj lai yaek gaenh 40 bi cij seng Dahsiengh dahlwg dog neix. Nienzgeq seng lwgnyez, angq lij caengz rox gaeuq, Goengliuz cix youq Dahsiengh ngamq okseng mbouj geij nanz couh gvaqseiq lo, ce Buzliuz song mehlwg yahmaiq lwgdog doxbaengh gvaq saedceij.

Dahsiengh maj daengz nienzgeij hab haq le, Buzliuz baenzlawz sij ndaej haq Dahsiengh bae ranz vunz ne? Couh ciu lwggwiz daeuj hwnjdou, boux neix cingq dwg Daihnywj. Daihnywj ranz youq ndaw bya rungh, ranz Dahsiengh yienznaeuz mbouj fouqmiz, cungj beij youq ndaw rungh baez hai dou couh raen bya ndei lai lo, caiq naeuz Daihnywj doiq Dahsiengh hix gig miz cingzeiq. Dahsiengh caeuq Daihnywj doxndiep doxgyaez, caengz najhoengz doxceng gvaq, hojsik song boux ngamq guh gvanbaz ndaej 8 bi couh ciengxlwenx doxbiek lo, ndek ce daeglwg Vuzvuz ngamq rim 7 bi.

Dahsiengh gvaqseiq le, Buzliuz siengsim nanzgvaq, Daihnywj hix mbouj ndeigvaq, de dwg bouxsai, raemxda caenh lae coh ndawsim bae. Vuzvuz hix mbouj lumj gaxgonq yienghhaenx gyaez gangj gyaez riu lo, lumjbaenz baez yaepda couh majhung roxsoq haujlai, caemdingh ndaej lumj bouxlaux nei.

Mboujguenj baenzlawz siengsim nanzgvaq, saedceij lij aeu laebdaeb gvaq roengzbae, bouxgeq lwgnyez lij aeu ciengx. Daihnywj ndaem ndei daeuzmiuz le, aemq daeh bae baihrog dajgoeng lo. Daihnywj baez lizhai, Buzliuz ndawsim engq fanz engq nyapnyuk, gak cungj gak yiengh naemjfap hawj aen sim de luenhlablab.

Buzliuz naemj: Danghnaeuz Daihnywj daiq daeglan dog de dauqma ndaw rungh youq, roxnaeuz lingh bae gizwnq aeu yah baenzranz, swhgeij gaenq geqlaux, baengh bouxlawz gvaq saedceij? Caiq gangj daeglan Vuzvuz, de baenzneix dwggyaez, baenzneix nomj, Buzliuz ningznyienh vut diuz mingh swhgeij, hix sij mbouj ndaej hawj Vuzvuz lizbae. Danghnaeuz Daihnywj lingh aeu yah, mehmbwk haenx doiq swhgeij song buzlan mbouj ndei, daengzcog youh baenzlawz guh ne? Mbouj naemj cixbah, maz cungj naemj caez hawj vunz simfanz, mbouj geij nanz, Buzliuz couh byomroz haujlai lo.

Liggaeuq ndwenloeg, ndit dak haenq baenz feiz, haeuxyangz yaek baenz sou haeuxnaz hix yaek gvej lo, gyoengqvunz dajsou dajndaem guhhong nyaengqfoedfoed. Seizneix, Daihnywj ganj ma daengz mbanjranz lo, de yamqdin haeuj dou, Vuzvuz couh angq hemq coemj haeuj ndaw rungj de bae.

“Meh, mwngz baenzlawz la? Ndangdaej mbouj ndei ha, raen mwngz byom haujlai lo.” Daihnywj cam naeuz.

“Mbouj miz maz, vunz geqlaux lo, ngoenz beij ngoenz reuqroz lo.” Buzliuz ndawsim yienznaeuz luenh lumj ndaij nyungq nei, baez dingq gij vah Daihnywj, dauq hix roxnyinh miz di raeujrub.

Sou haeux, ndaem miuz, guh hong reihnaz le, Daihnywj youh aemq daeh bae baihrog guhhong lo.

Seizcou, rumzliengz ci daeuj sangjswdswd, doenghnaz seiqlengq haeux henj lumj gim, aen geiqciet fungsou he youh daeuj daengz lo. Daihnywj ganj maranz lo, baezneix cix mbouj gag de boux ndeu dauqma, lij miz dahsau nienzoiq youh lengjlili he riengz de maranz.

Henz ndang Daihnywj lai miz dahsau neix, Buzliuz caeuq Vuzvuz cungj roxnyinh ngeizvaeg caeuq doeksaet, song buzlan dinghdingh ndwn youq gizhaenx mbouj rox baenzlawz guh cijndei.

Dahsau gig daihfueng doiq gyoengqde song buzlan naeuz:“Meh, gou dwg dahyoux Daihnywj, heuhguh Dahsiu, vunz Mbanjfuk.”

Buzliuz dingq le, gwnz naj cengqgengz loh ok di riu he, Vuzvuz ndoj haeuj baihlaeng daxbuz, cengq hung doiq da rongh ndaem, muengh le muengh Dahsiu, mbouj guhsing.

Buzliuz ndawsim naekgywggywg, de naemj: Seizneix Daihnywj ra ndaej dahyoux dwg saehndei, hoeng gyoengqde song boux cungj dwg lwg rog dungx, mbouj rox daengzcog doiq swhgeij caeuq Vuzvuz baenzlawz yiengh. Naemj daengz neix de “ai” danq gaemz heiq raez he.

Roxnaeuz vunz naemj saeh lai le, ndangdaej naiqnuek cingsaenz mbouj cuk. Laebdaeb geij ngoenz, Buzliuz mbouj gangj hix mbouj riu, gag guh gag gwn, sim hix mbouj onj saekdi.

Ngoenzhaenx singgeiz ngux lajbyonghngoenz, Buzliuz bae hagdangz coux Vuzvuz. Song buzlan vang gvaq maxloh seiz, aen ciiq he sawqmwh fwt cung gvaqdaeuj, Buzliuz caeuq Vuzvuz cungj deng bungq laemx lo, song buzlan deng sieng, miz di naek.

Bouxlaux bouxnyaeq youq yihyen yw sieng, Dahsiu gig mbouj onj, de caeuxcaeux couh hwnq congz, cawj ndei ngaizromh couh soengq bae yihyen. Buzliuz sieng naek, mbouj ndaej doengh fwngz, Dahsiu naihsim bwnq de gwn souh gwn dang, ciepdaeuj hawj songde swiq naj mad ndang, nanz mbouj nanz lij gangj saekdi vahriu daeuq songde.

Dahsiu naeuz:“Meh, gou rox mwngz vihmaz sim mbouj onj, mwngz gaej ngeix lai lo, gou nyienh daeuj caeuq Daihnywj guh ranz ndeu, couhdwg vunzcaen mwngz caeuq Vuzvuz. ”

Geij ngoenz gvaqbae, Dahsiu haethaemh mbouj liz gvaq ranzbingh, Buzliuz caeuq Vuzvuz yied daeuj yied maij Dahsiu lo. Buzliuz roxnyinh Dahsiu yied yawj yied lumj dahlwg swhgeij nei, mizseiz mbouj roxnyinh cungj heuh coh loeng bae, Dahsiu hix mbouj hozndat, riunyumnyum dapwngq.

Vunz simcingz ndei maz cungj ndei, Buzliuz caeuq Vuzvuz gizsieng ndei ndaej gig vaiq, mbouj geij nanz couh ndaej maranz lo. Buzliuz gaemdawz faj fwngz Dahsiu ndaetndaet bae, song hangz raemxda lae roengz najgemj daeuj, naeuz:“Siu, mwngz caeuq Daihnywj cungj dwg lwg ndei gou, gou caiq hix mbouj yousim mbouj miz dieg baengh lo. Raeuz hix yawjyawj ngoenzndei, banh gij saeh sou.”

Dingq gij vah Buzliuz, Dahsiu naj hoengzfefe muenghyawj Daihnywj. Daihnywj riu naeuz:“Meh, raeuz seizneix cungj dwg vunz ranz ndeu gvaq, caiq gangj ranz raeuz seizneix hix mbouj miz geijlai ngaenz, banh mbouj banh saeh mbouj youqgaenj, raeuz daengx ranz ndeindei gvaq saedceij couh baenz lo.” Buzliuz dingq le, engqgya sim angq sim maez.

“Meh.” Youq ndaw ranzbingh Vuzvuz, Vuzvuz ing haeuj rungj Dahsiu bae sing iq heuh baez ndeu, Dahsiu miz di doeksaet, Daihnywj hix miz di doek- saet, roxnyinh daeglwg bienq roxsoq lo.