Caij daengva Bouxcuengh Bingzgoj dwg cungj foux cojcienz hung cunghab ndeu, dwg Bingzgoj Yen aenban bouxdauh comz miz ciengq、nam、damz、foux、yinhyoz itheij, daj Ciuzdangzcauz Ciuzsungcauz hainduj cienz daengz seizneix.

Bingzgoj gyoengqvunz Bouxcuengh seizneix vanzlij hen cungj sibgvenq gaeuqgeq neix, moix bi iucingj gyoengq bouxdauh daeuj ndaw miuh caeuq daengxcungq vunzmbanj doengzcaez dajcaeq、gaj gaeq gaj bit caemh gwn caez angq, maqmuengh fangzbaed bauj ranzranz bouxvunz caeuq doenghduz youh lai youh ndei、ndaem maz ndaej maz, neix ndaw biengz heuhguh“cietdajcai”. Gak haw gak mbanj seizrawz banh“cietdajcai”mbouj doxdoengz, gingciengz banh sam ngoenz, bouxokrog hix dauq ranz camgya hozdung, ndaw miuh rog miuh siuyieng cit bauqciengh mbouj dingz mbouj duenh, vunz cien vunz fanh, nauhyied dangqmaz. Ndaw “cietdajcai” aen cezmuz ceiq daeuz——caij daengva dwg cungj foux gagdog youz Bouxcuengh dangdieg cauh’ok haenx.

Caij daengva Bouxcuengh doenggvaq“cuengq daengva”“caij daengva”caeuq“caeq you”sam dauq fouxgvidingh neix, caij gvaq 108 aen daengva（ndawde 100 aen daeng faen baenz cib coij nda baenz cwngfanghhingz, lij lw 8 aen daeng ne baihdoeng coq 5 aen, baihnamz、sae、baek coq aen ndeu）; youz 12 daengz 16 boux dauh daenj buhhoengz haenx, gyaeuj daenj mauhdauh, fwngz gaem gyongfwngz、lazluengz、lingzgyaeuh、loxlez、aendig daengj, daj rog daengz ndaw hopheux 108 aen daeng, nam ging, con gvaq gyang daeng diuq bae diuq dauq, gyoengqde fwngz、da、ndang、fap、yamq doxboiq caemh ndei, saeknaj naekgwd, hawj bouxyawj caem youq ndaw dangqmaz bae.

Caij daengva yienjok gij cingsaenz vwnzva daudwz cunghgyau cojcienz Bouxcuengh, couhdwg hauqgingq bouxlaux gingq saefouh、daihfueng coengh vunz、gouz fuk cawz cai.

Bi 2010 Bingzgoj caij daengva Bouxcuengh ginggvaq Gvangjsih Bouxcuengh Swcigih Yinzminz Cwngfuj doengzeiq, ndaej lied haeuj daihsam buek swcigih gaep feihvuzciz vwnzva yizcanj mingzloeg.