“Lauxmaet! Lauxmaet, mwngz byaij loek dieg luba?” Bouxbangsou raen cisamloek Lauxmaet hai haeuj- daeuj couh sing hung daezsingj de.

“Lauxmaet” dwg coh vamingz. Lauxmaet dwg boux vunz maetmi ndeu, maz saeh cungj faenfaen geiqsuenq, cungj lau bonjfaenh deng gwnvi, caenhsim ngeix dam bienzngeiz ndwi, mingzdaeuz de haeu doh ndaw mbanj rog mbanj. Naz reih de gyawj byawz, byawz couh boihseiz lo, de gyaez dawz diuz haenzgek gyod gvaq baih bouxwnq bae. Vunz ngamq coq bwnh roengz naz, daengz gyanghwnz de couh laeglemx youq gwnz haenz vat congh, dawz raemxnaz ngamq coq bwnh yinx haeuj naz de bae.

Ngoenz daihngeih, gyoengqvunz fatyienh le naeuz de, de dailix mbouj nyinh, lij naeuz raemxnaz dwg daj congh nou lae gvaqdaeuj dem. Moix baez byaij gvaq reihbyaek vunz, de gyaez swnhfwngz dog aeu gaem byaek ndeu dawz maranz, lumjbaenz mbouj ndaej di ndei couh yaek dai nei. Caezgya cungj caemhyouq aen dieg ndeu, couhsuenq rox dwg de guh, hoeng, hix mbouj rox doiq de baenzlawz.

“Baenzlawz? Sou mbouj siengj sou gij byaek mak gou? Roxnaeuz byaek mak gou, mbouj hab’eiq sou?” Lauxmaet sing sang cam.

“Cungj mbouj dwg. Gou simndei daezsingj mwngz, gij gyaq soucawx dieg dou beij dieg doiqnaj noix di ndeu.” Bouxbangsou naeuz.

“Guenj de lai rox noix, ngoenz- neix gou couh youq giz mwngz neix gai.” Lauxmaet naeuz.

“Hauhneix gyo’mbaiq mwngz lo.” Bouxbangsou naeuz.

“Vah gyo’mbaiq raeuz mbouj gangj. Gou cij maqmuengh ciengz binghraq sinhgvanh feiyenz neix ndaej vaiqdi gvaqbae, binghdoeg caeuxdi deng siumied bae caez. Mwngz yawjyawj bicieng neix, baenz maz cieng? Fung singz fung mbanj, fung roen fung loh, mbouj ndaej okdou ok mbanj, mbouj hawj bae haw, mbouj ndaej cunzranz, gak ranz vunz gag mboet youq ranz, caencik baengzyoux mbouj ndaej baedauq, lwgmbwk lwg- gwiz gou hix mbouj ndaej dauqdaeuj yawj gou. Doenghbi ndwencieng, gyoengqde dawz laeuj ndei ien ndei dauq hauqgingq gou, bineix miz maz ne? Ndwencieng caemcubcub, gij binghdoeg dwglau dwgvueng neix, hawj dou mbouj ndaej guh gwn byaek noh daiq lai, aenvih mbouj miz vunz gwn ndaej liux, guh lai cungj deng lw; mbouj guh youh mbouj rox aeu maz bae baij daiz caeq coj, gij saedceij neix caen dwg……” Lauxmaet namq- byoebbyoeb.

Bouxbangsou dajduenh vah de naeuz:“Cuengqsim ba! Miz gyoengq canghyw husw、cansw、conhgyah、gyoengq vunzlai bingzciengz bae caeuq binghraq buetmingh, miz Cunghyangh lingjdauj daiq raeuz lwgminz bae fuengzre, caezgya boux- boux cungj guh gij saeh bonjfaenh ndei, cungj ndaejgeiq ok di rengz, gou saenq mbouj geij nanz, ciengz binghraq neix couh ndaej gaemhanh lo.”

“Maqmuengh lumj mwngz naeuz nei couh baenz lo.” Lauxmaet naeuz.

Gvaq caengh, geq ngaenz, hawj ngaenz. Bouxbangsou din fwngz riengjret. Lingh song boux lajfwngz de roengz huq buen huq, lij miz boux lajfwngz ndeu hawj gyoengq boux daeuj gai byaek mak rau ndangraeuj, 4 boux vunz guh ndaej gig suglienh, caemhcaiq boiqhab ndaej haemq ndei.

Lauxmaet ciep aeu cienz, fwngzgvaz gaem ngaenz yaengx ndaej sangsetset, youq gyang mbwn vanghvax hop ndeu, simhai naeuz:“Dauqbae lo.” De saet hwnj ci, fatdoengh ci, gya youzmwnz, ci hai baenaj lo.

Bouxbangsou yawj coh gij ngaeuz de naeuz:“Ndaek Lauxmaet neix……”

Lauxmaet din gonq ngamq okbae, din laeng youh miz bouxndaem ndeu hai ci haeujdaeuj. Boux neix aiq ndaej 60 lai bi, ndang byom vunz daemq naj fonx. Gwnz ci de miz song loz makyungz iq, mak de nding lwenq ndongqrik. Lij miz song loz lwggve, naeng gve heurwd ngaeuzngub. Baez yawj, couh rox gij mak、gve de huq ndei saek ndei.

“Daxau, dou gizneix dwg cwngfuj soucawx le soengq hawj Vujhan, gij gyaqcienz soucawx beij doiqnaj giz- haenx noix di, mwngz bae doiqnaj gizde gai ba.” Bouxbangsou naeuz.

“Ai! Mwngz baenzlawz yiengh- neix gangj ne? Mwngz sien naeuz gij byaek、mak gou baenz mbouj baenz? Sou hab’eiq mbouj?” Daxau naeuz.

“Mak ndei! Gve ndei!” Boux- bangsou daengj mehfwngz naeuz.

“Ndei! Miz vah mwngz gou couh cuengqsim lo. Mboujgvaq, ngoenzneix gou daeuj mbouj dwg gai, cix dwg soengq.” Daxau naeuz.

“Gaej! Au, raeuz lij dwg gvaq caengh, lwnh gaen lwnh gyaqcienz hawj mwngz ba.” Bouxbangsou raen song faj fwngz coyod dekngab daxau saedcaih mbouj nyaenxsim. Gve caeuq mak baenzneix ndei, boux daxau neix itdingh dwgrengz haeujsim bae ndaem lo.

Daxau naeuz:“Daegcoz ha, mwngz gaej doi lo. Gou yawj densi rox: Hoznamz miz aen gunghcangj ndeu, ciep ndaej Hojsinzsanh Yihyen dingh aeu goujcau, bouxdaeuz sikhaek heuh gunghyinz dauq hai hong, ngaenz huq faen ndeu cungj mbouj aeu. Gij gunghswh daeh huq hix riengz dwk, mbouj aeu cienz dajyinh soengq bae daengz Vujhan. Caeuq gyoengqde doxbeij, gou di gve di mak neix mbouj dij saek faen.”

“Au, mwngz baenzneix nienzgeij, ndaem gve ndaem mak hix mbouj yungzheih.” Bouxbangsou yienq naeuz.

“Gou caiq sinhoj hix sinhoj mbouj gvaq gyoengq canghyw husw、cansw youq it sienq caeuq binghraq buekmingh haenx.” Daxau naeuz.

“Yienghneix gou couh lawh cwngfuj、lawh lwgminz Vujhan gyo- mbaiq mwngz lo.” Bouxbangsou raen daxau neix baenzneix genhciz, cij ndaej sou roengz gij huq daxau soengq daeuj lo.

“Gaej gangj gij vah gyo’mbaiq baenzlai, gij vah neix dingq le hawj gou mbouj cwxcaih, gou mbouj guh maz daih gungyen ne. Raeuz roengz huq ba.” Daxau naeuz.

“Gyo’mbaiq daxau!” Boux- bangsou doq naeuz.

“Mwngz daegmbauq neix, caen raemhraeh.” Daxau gyajcang hozndat, “Yienznaeuz ndang gou lij cangq, hoeng, guh mbouj ndaej hongnaek hong lai, ndigah gou sam ngoenz mbaet gve、mak ranz gou baez ndeu, danghnaeuz sou lij youq, baezlaeng gou lij daeuj.”

Yawj gij ngaeuz daxau, boux- bangsou nyinhnaeuz de fwt bienq ndaej lumj ranzlaeuz baenzneix sang, youh lumj faq ciengz baenzneix naek, dangj gij rumznit youq rog.

Gij hek daeuj diegsoucawx cwngfuj lai raeuh, boux dem boux haeujdaeuj, mbouj dingz mbouj duenh. 4 boux bouxbangsou guh hong nyaengq ndaej dangq nyouh yaenj hix mbouj ndaejhoengq bae ok gvaq.

Canghsoucawx doiqnaj dieg- soucawx cix mbouj miz maz hek, fwzrikrik. Baenz buenq ngoenz cij miz bouxndaem ndeu haeujbae gai makyungz, cingq caengh mak seiz, mbouj haeujsim baez yawjraen gepbaiz doiqnaj, couh mbouj ndei eiqseiq naeuz:“Doiq mbouj gvaq, gou……gou siengj dawz mak bae baihhaenx gai.”

“Baihde gyaqcienz noix gvaq baih dou di ndeu nw.” Canghsoucawx naeuz.

Bouxndaem naeuz:“Noix couh noix ba! Seizniex mbouj goq ngaenz lo.”

Canghsoucawx naeuz:“Ndaej! Ndaej! Mbouj youqgaenj, mwngz dawz bae ba.”

Yawj doiqnaj dieg haenx nyaengqfofo, geij boux canghsoucawx mboujdan mbouj hozhaenz, hix riuhoho gvaqbae bangfwngz.

Geij boux bouxbangsou cungj danqhaenh: Gyoengq bouxndaem simsoh caemhcaiq saedcaih. Yienz- naeuz gyoengqde mbouj rox gangj gij vah maenh vah ak, hix mbouj guh ndaej maz saeh hung gingdoengh mbwn deih. Hoeng, gyoengqde, rox guh gij saeh iq swhgeij guh ndaej bae bang bouxwnq, sim’eiq gyoengq- de caen dijbauj, dijbauj gvaq gim- ngaenz.

Ngamq song ngoenz seizgan, cwngfuj couh soucawx ndaej 100 dun mak、gve、byaekheu, ndawde miz 85 dun makyungz iq, 10 dun lwggve, 5 dun lwgmanh, onjdangq guh baenz gij yinvu soucawx.

Ndwen 1 ngoenz 30 bi 2020, 7 aen ci hung cang huqgwn huqyungh, cang gij sim’eiq lwgminz Denzyangz Yen coh Huzbwz Vujgan hai bae……

（sat）