Mboengqneix, Nanzningz Swhfan Dayoz Bouxcuengh Vwnzva Hezvei daegbied youq gwnz vangj banh aen cawjdaez hozdung “fuengzre gaemhanh binghraq, Bouxcuengh Vwnzva Hezvei caez okrengz” ndeu, hozdung cungsim dwg “doengzcaez okrengz, hoenx hingz binghraq”, vih hawj daengx hagdangz lauxsae caeuq hagseng guh ndei gij hong boiqhab fuengzre gaemhanh binghraq, doenggvaq ingj siengq、vehdoz、sij sawlig daengj mizgven “Lwghag Nanzswhda caez hengzdoengh, aeu vwnzyi cozbinj dingj binghraq” cauxguh、 yungh Sawcuengh roxnaeuz Sawgun sij ndei ngoenzgeiq fuengzre gaemhanh binghraq、aeu vahdoj daeuj loegguh fuengzre gaemhanh binghraq sibinz dinj daengj lai cungj hingzsik, yungh caensaed hengzdoengh baij ok gij yienghsiengq daihhagseng Nanzswhda gamj guh、rox guh、guh ndaej baenz, gaenxmaenx cienzboq naengzliengh cingq, caemhcaiq gingq boux guh hong dingj binghraq, caeuq Vujhan caeuq Cungguek caez haenqrengz.

Vueddoengh daj 3 nyied 8 hauh hainduj doxdaeuj, gyoengq lwghag Nanzswhda doxcanj camgya, gaengawq gij conhyez daegsaek bonjfaenh, hopheux cawjdaez fuengzre gaemhanh binghraq, bae dajcauh gij cawjdaez cozbinj lai cungj hingzsik. Mizmbangj dwg geiqloeg gij saehgienh gamjdoengh caeuq gij swnghhoz gamjsiengj swhgeij mwh fatbingh, mizmbangj cix dwg doenggvaq gij cozbinj veh dozveh gangj ok le gij gietsim cizgiz fuengz dingj binghraq, lij miz- mbangj yungh vahdeihfueng loegguh fuengzre binghraq mizgven cihsiz sibinz dinj daengj ciuheuh vunz henz ndang, caezsim doengz guh, itheij hoenx binghraq, doenghgij cozbinj gig miz minzcuz daegsaek caeuq ganjyenj naengzlig neix, cungj doenggvaq gij gunghcunghau Bouxcuengh Vwnzva Hezvei doisoengq fatbiuj, hawj engq lai vunz caez yiengjsouh, dawz gij sim gij rengz doxgiet doxcomz hwnjdaeuj, sawj vunzlai engq miz saenqsim hoenx hingz binghraq.

(Fanz Yijsuij/樊雨水 Cwngz Danhyingj/成丹颖 Cinz Meijgyah/覃美嘉)