Eu fwen ciengqgok “sam nyied sam”, fwenvuengz gwnz muengx doxdax, dujva minzcuz doxgiet angj hai, ngaiz binghraq yingjyangj, bineix “sam nyied sam” caezgya mbouj ndaej doxcomz eu fwen. “Caez eu Fwencuengh sing rwenzhap minzcuz doxgiet dem rengzak——bi 2020 Gvangjsih ‘ndwen senhconz minzcuz doxgiet cinbu’ gwnz muengx eu fwen doxdax” youz Gvangjsih Minzcuz Bause lienzhab Gvangjsih Sam Nyied Sam Cazcise、Nanzningz Si Minzcunghveij、Liujcouh Si Minzcunghveij、Gvangjsih Gyauzsi Vwnzva Cauh’eiq Mizhanh Gunghswh daegbied maeuzveh banh haenx, 12 boux fwenvuengz Mbanjcuengh, youq gwnz muengx caez eu fwen, yienjok ndeiyawj. Mboengq ndwen 3 ngoenz 26 daengz ndwen 4 ngoenz 26, gak boux beixnuengx mbouj yungh ok dou, couh ndaej youq gwnz muengx doxcomz yawj eu fwen, roxnyinh gij yinx gwnz muengx eu fwen.

Gaiq “gwnz muengx fwenvuengz” doxdax neix yaek youz “Yah Vujsenh” Goz Siulenz、Banh Lungzhaij、Vangz Ligingz、Veiz Cihbauj、Liengz Cuiyungz、Ciengj Cwngz、Loz Couhlanz、Siz Cwngz、Loz Vwnzvei、Veiz Ciuhcinz、Vangz Gozgvanh、Liu Cangznenz daengj 12 boux canghfwen ndawbiengz mizmingz, hopheux “cin raeuj va hai Betgveiq doxhuz” cawjdaez, doenggvaq fwen cauhnduj cungj fuengsik miz minzcuz daegsaek neix yienjok hawj caezgya yawj.

Doxdax yaek youq ndwen 3 ngoenz 26 banhaet 10 diemj youq Gvangjsih Minzcuz Bause guenfueng veihsin bingzdaiz（gxmzbwx）、guenfueng vangj- can ciendaez yiebmienh（http://www.gxmzb.net/node_298.htm） daengj cenz- meizdij itheij guh gwnz muengx cigboq. Ndwen 3 ngoenz 26 daengz ndwen 4 ngoenz 26, Gvangjsih Minzcuz Bause guenfueng veihsin bingzdaiz yaek lienzdaemh boqcuengq gij sibinz eu fwen 12 boux fwenvuengz Mbanjcuengh, doengzseiz haidoeng youq gwnz muengx gangjgoj, damqra 12 boux fwenvuengz baenzlawz guhfwen, caeuq ciuhvunz gyoengqde mbouj doxdoengz. Gyoengq beixnuengx mboujdan ndaej doenggvaq Gvangjsih Minzcuz Bau Vangj（http://www.gxmzb.net/node_298.htm）、Gvangjsih Minzcuz Bause guenfueng veihsin bingzdaiz（gxmzbwx） yawj cigboq, lij ndaej haeuj yiebmienh boqcuengq bae douzbiuq, douz hawj canghfwen bonjfaenh gyaez haenx.

（Bonjbauq）