第08版:vwnzva ndei raeuz
3上一版
 
Gij Dinfwngz Cauh Ceij Mbanjbajgiz
本报地址
版面导航     
3上一期  下一期4
新闻搜索:  
下一篇4 2020年3月18日 放大 缩小 默认        

Gij Dinfwngz Cauh Ceij Mbanjbajgiz

□ Godoq comz hoiz
▲Canghcauhceij cingq guhhong.
Ranz cauh ceij guh youq henz raemx
▲Ceij Bajgiz.
▲Ranz cauh ceij.
▲Gya raemxcung.
▲Ap raemx ok.
▲Daem liuhceij.
▲Cau ceij.
▲Vunz bae cam canghcauhceij.
 

Youq Lozyez Yen Dungzloz Cin Luzveiz Cunh Mbanjbajgiz, gij dinfwngz cauh ceij gaeuqgeq haenx vanzlij youq gizneix swnjcienz, gyoengqvunz mbanj neix mboujdan rox gij dinfwngz cauh ceij gaeuqgeq neix caezcienz, vanzlij rox yungh faexcuk gyangdoengh cauh’ok ceij- mbaw maenhndei.

Mbanjbajgiz ndawde miz haujlai canghcauhceij, Cangh Dwzgveiz dwg bouxswnjcienz dinfwngz cauh ceij ndaw mbanj neix. Ciuq Cangh Dwzgveiz lwnh, gij gisuz caeuq gij mbaek gonqlaeng gvendaengz cauh ceij Mbanjbajgiz haenx haemq fukcab, ndawde gij mbaek daeuz miz 8 mbaek. Mbaek daih’it dwg raemj faexcuk(aeu doenghgo faexcuk dangdieg guh liuh daeuz). Mbaek daihngeih dwg mboet faexcuk. Dawz gij faexcuk raemj ndei haenx coq haeuj ndaw daemz bae mboet sam ndwen nanz. Mbaek daihsam dwg swiqseuq faexcuk. Faexcuk mboet ndei liux rauz hwnjdaeuj caemhcaiq aeu raemx swiq seuq gij naez、uq caeuq gyamq de, liuxle cuk gyoengqde sanq yaek baenz sei bae. Mbaek daihseiq dwg daem liuhceij. Dawz liuhceij coq haeuj ndaw doiqrin bae daem, daem liuhceij baenz suenz yinz yaek lumj naez nei. Mbaek daihhaj dwg dwkruq caeuq gya“raemxcung”. Coq liuhceij haeuj ndaw“ruqcaemx” bae, coq raemx- mboq haeujbae, caemhcaiq aeu gaiqmboengjfaex gyaux, gyaux gij liuhceij ndaw ruq yinz bae. Mbaek daihroek dwg cau ceij. Aeu gij doxgaiq hongdawz cienmonz haenx guh baenz ceijmbaeq, liuxle dawz ceijmbaeq baez mbaw baez daeb coq gwnz benjfaex. Mbaek daihcaet dwg ap raemx. Daeb ceijmbaeq ndaej 1000 lai mbaw le, goemq 4 mbaw ceijro gvaq gwnz, liuxle aeu haj gaiq“benjgoemqceij”gungh naek 30 lai gaen haenx goemq gwnz, yienghneix ap ceij ok raemx. Mbaek daihbet dwg dak hawq biengj ceij. Ap raemx okbae liux, aeu fagnip roxnaeuz“benqdakceij”faexcuk dawz doiceij baez mbaw baez mbaw biengj ok, cingjcaeq venj coq gwnz gyaq langh ceij, langh hawj ceij gag ro bae.

Seizneix, cungj dinfwngz gaeuq- geq neix ginggvaq cien lai bi nanz le, vanzlij youq ndaw Mbanjbajgiz louz miz caezcienz, neix caen dwg saeh geizheih dangqmaz.

Cien lai bi doxdaeuj, gyoengq lwglan vunz Mbanjbajgiz caemsim swnjcienz gij dinfwngz cojcoeng neix. Seizneix, hongsaeh cauh ceij mbouj beij gaxgonq hoengh lo, danhseih ranzranz cungj hen miz cungj dinfwngz neix, gyoengq vunz daihlaeng Mbanjbajgiz hix maij swnjcienz cungj dinfwngz neix.

 
下一篇4  
 
   
   
   


版权所有 广西民族报

联系电话:0771-5528076 5559552
传真:0771-5528087 电子邮箱:gxmzbw@163.com
地址:广西南宁市桂春路16号 邮政编码:530028
 

关闭