Nditdoeng baihnamz dieg dou raeujrubrub, neix ndaej hawj dieg dou ndaej cauhfuk, bi daengz byai gve、byaek、mak mbouj duenh. Moix bi seizdoeng seizcin doxgab dwg seiz gve、byaek cingq baenz. Daegbied dwg makyungz iq, rim doengh rim naz, byaij gvaq doengh lawz cungj raen makyungz iq baenz roix baenz rumq, ndingrwdrwd caemhcaiq ndongqrikrik, dwggyaez dangqmaz.

Yienh dou dwg aen gihdi ok “Gij byaek baihnamz coh baihbaek daeh” ndeu, aen hanghmoeg neix youq aen Nungzmau Bihfaz Sicangz ndaw singz dou haidin. Baenzneix, moix bi baez daengz seizneix, baenz cien baenz fanh canghsoubyaekmak、boux- ndaembyaekmak、bouxdajdoeng caeuq cidaehhuq caenx youq aen Nungzmau Bihfaz Sicangz ndaw yienh dou, saek ndaej ndaetdwtdwt bae, mbouj roh di heb lawz, vunz lai vunz daih. Aen sicangz neix gaenq baenz gij gingjsaek daegbied ndaw singz dou lo.

Bouxlaux cungj gangj “bi baez bungq duznou, gvaq cieng mbouj an- ningz”. Bineix cingq dwg bi duznou, binghraq doek roengz gwnzbiengz, Vujhan baenz caihgih. Dangjcungh- yangh roengzlingh, aeu fuengzre binghraq. Dangq boux dangq youq ranz, mbouj ndaej okrog bae cunz bae youz. Fung singz caemh fung mbanj, fuengz binghdoeg cienzlah.

Ndwencieng bineix, gyaj gvaq- cieng ceiq raez lo, baenz ndwen lai bae. Yozyau doilaeng haihag, gak hangz gak nieb hix doilaeng haihong. Binghraq seizgeiz, bouxboux aeu ciuqsouj gij mingling Cunghyangh. Ndigah, cieng gvaq le, cangh- soubyaekmak couh mbouj ndaej daeuj sou byaek mak lo, gij byaek、gve ndaw reih ndaw naz cug le cij ndaej ce daengz loenq, bouxndaem yawj le sim’in caemh fouznaih. Ndaem baenz bi, sai hanh sai lwed, momj ok haemh dauq, sinhoj dwgrengz, maqmuengh ndaej canh di cienzngaenz, liuh mbouj daengz, cingq bungq daengz gij binghraq, mbouj miz vunz daeuj sou deng naeuh youq ndaw suen, baenzneix lienz cienzbonj hix sou mbouj dauq lo.

Bouxndaem miz you, cwngfuj daeuj vih gyoengqde gej you, doengz- eiq geij boux canghsoubyaekmak daeuj haihong. Hoeng, aeu guh ndei fuengzre, engq mbouj ndaej lumj mwhgonq nei comz youq Nungzmau Bihfaz Sicangz soucawx, aeu faenhai gak boux gag dieg. Canghsou- byaekmak hix coengmingz, cigsoh youq henz doengh roxnaeuz henz roen hai diegsoucawx, mbouj baenz gyoengq comz youq ndaw sicangz lo.

Roencibcih ndaw cin dou couh miz song dieg diegsoucawx. Song dieg neix gek diuz roen he doxmuengh.

Dieg ndeu dwg vih cangh- soubyaekmak soucawx.

Lingh dieg dwg vih cwngfuj soucawx. Cwngfuj soucawx le gij doxgaiq neix, couh daeh bae Vujhan, gien ndwi mbouj aeu cienz. Henz dieg soucawx cap gep baiz ndeu, gep baiz neix, gvangq 1 mij, raez 1.2 mij, gwnz baiz raiz: Baih ndeu miz nanh, bet baih daeuj bang, Vujhan nanh naek, mbouj ndaej ngonz ndwi. Dieg neix gij gyaqcienz soucawx: ××× ngaenz.

Aen gyaqcienz soucawx neix beij dieg soucawx doiqnaj noix di.

Ngoenznduj haihong, boux- bangsou dieg cwngfuj soucawx, ndawsim de hix mbouj miz daej, de gag ngeix: Dou cungj dwg vunz bingzciengz, dangqnaj dwg cienz- ngaenz, byawz guh ndwi mbouj siengj canh di cienz ne? Danghnaeuz gyoengq bouxndaem mbouj youq dieg gou gai byaek mak, gou hix lijgaij gyoengqde. Gizsaed, gyoengqde hix mbouj yungzheih, mizseiz dajndaem deng duznon haih roxnaeuz dienheiq mbouj ndei, doenghgo gemjcanj roxnaeuz fouzsou, lienz ngaenzgoek cungj mbouj ndaej dauq. Engq ndeiriu dwg danghnaeuz doenghgo ndaej demsou, nga’nga cungj baenz aen, venjveve dimz ndaej nga daemq yaek namh, gij cienz sou gij mak gij byaek cienh dangqmaz, beij cienzgoek lai didi. Baenz aen noix simyou, baenz aen lai hix simyou. Ndigah, danghnaeuz gai ndaej gyaq, byawz mbouj maqmuengh doenghgo swhgeij ndaem gai ndaej ndei?

Ngoenznduj haihong, gij doxgaiq song aen diegsoucawx sou ndaej, cengca mbouj lai. Aiq dwg gyoengq bouxndaem mbouj haeujsim yawj gepbaiz ba!

Daengngoenz menhmenh swng, geij diemj fwjhau dawz aen mbwn lamz gvangqlangh cang ndaej rongh- sag caemhcaiq gyaeundei. Aen daengngoenz gwnzmbwn unqswnh, nditdoeng raeujrub mbouj ndat. Ngoenz moq youh daeuj daengz lo. Ngoenzneix, aen diegsoucawx cwngfuj romhromh couh nyaengq hong lo.

“Bohloz, dieg gou dwg soucawx cwngfuj bw, gij doxgaiq yaek daeh bae soengq hawj Vujhan, baenzneix gij gyaqcienz soucawx beij doiqnaj dieg haenx noix di, mwngz mbouj dwg byaij loeng, caen youq dieg gou gai ha?” Bouxbangsou baez raen dwg cisamloek Bohloz hai haeujdaeuj, doq lwnh hawj de, doq gangj doq coh gepbaiz fwngz vix.

“Gou dingq vunzmbanj gangj gvaq lo. Gou hai ci haeuj neix daeuj, couhdwg youq mwngz gizneix gai.” Bohloz haengjdingh naeuz.

“Hoeng, yah mwngz rox lwi? Doengzeiq lwi? Mboujnex, vihneix gvanbaz baenz doxceng, mbouj ndei bw.” Bouxbangsou naeuz.

Bohloz dwg boux vunz lauxsaed ndeu, hix dwg boux “bouxlauyah” mizmingz he. Yah de bak yak, heuhhemq daeggvan lumj heuhhemq duzvaiz nei, ndaq hat youz de maij. Yah de gaem cienz ndaet, lumj fangz gaem haeuxnaengj nei, mbouj hawj sied saek naed. Guenj cienz guenj ndaej haenq dangqmaz, mbouj hawj daeggvan gaem cienz gvaq, couhcinj dwg 10 maenz 8 maenz hix cungj mbouj hawj youq daeh bouxgvan gvaq.

“Mbouj guenj de, saeh neix mbouj youz de naeuz. Ngoenzneix gou guhcawj.” Bohloz naeuz, “Gou boux beksingq bingzciengz ndeu, hix mbouj rox gangj maz dauhleix hung, cij rox guekgya miz nanh, Vujhan miz cai, gou ndaej bang couh bang di, engq mbouj dawz di gyaq neix haeujrwz! Youh mbouj dwg gai mbouj ndaej cienz dauq, noix di ndwi, de mbouj rox gangj maz!”

“Baenzneix, gou lawh cwngfuj、lawh yinzminz Vujhan gyo’mbaiq mwngz lo.” Bouxbangsou naeuz.

“Gyo’mbaiq maz ne? Di saeh iq neix mbouj dwg saeh baenz gyo’mbaiq ndwi.” Bohloz naeuz.

Dauq daengz ranz, Bohloz laeglemx dawz ok gij cienzrei de okrog bae guh di hong nanz ndaej rom roengz dem roengz ngaenz gai mak ngoenzneix bae, caiq dawz bae gyau hawj mehyah. Naeuz sij ndaej gij ngaenz de sinhoj rom de, caen dwg gyaj, hoeng mehyah maenh lai lo, mbouj miz banhfap. Baez daih’it baenzneix guh, Bohloz ndawsim diuqbubbub.

Siengj mbouj daengz mehyah ciep cienz le doq geq cienz doq cam Bohloz:“Dingqnaeuz roencibcih miz song dieg diegsoucawx, ngoenzneix mwngz bae dieg lawz gai ne?”

Bohloz baez dingq, naj fwt bienq hau, sim engqgya diuqbubbub, lumj naeuz yaek diuq ok conghhoz daeuj nei. De gag ngeix: Dai lo, aiq dwg gyoengq vunzmbanj caemh bae gai byaek roxnaeuz dwg byawz gvaq roen yawjraen le laeuhbak hawj de rox lo. Yaep dem youh deng ndaq baez he lo. De bik swhgeij damzdingz, sup gaemz heiq naeuz:“Gou dauq siengj gai hawj dieg cwngfuj soucawx baihde, hoeng, mwngz mbouj oksing, gou baenzlawz gamj? Caiq gangj, mwngz geq ngaenz yawj deng mbouj deng soq?”

Mehyah aeu lwgfwngz gyuj goekrumz Bohloz, gyuj ndaej gyaeuj de ngengq bae, naeuz:“Duz ma geq mwngz! Uk haeu uk naeuh, uk ma rin mwngz vihmaz mbouj gon saek di ne? Ngoenzcog mbaet makyungz dawz bae gai hawj gyoengqde! Rox lwi?”

“W! W, hoeng, gij gyaqcienz gizde cienh gvaq dieg doiqnaj nw, mbouj gai ba!” Bohloz cienh’eiq daeuq de.

Mehyah naeuz:“Gou naeuz gai couh gai!”

“Gai! Gai! Gai!” Bohloz riuhehe naeuz.

Gij bouxndaem bae diegsoucawx cwngfuj hai gai mak gai byaek yied daeuj yied lai, gyoengq bouxbangsou nyaengqfofo, nyaengq daengz hanh conh buh dumz caez. Gij cienz boux neix caengz suenq ndei, boux de gaenq youq laeng ram mak ram byaek roengzdaeuj yaek daeh hwnj caengh lo.

（caengz sat）