Geij bi neix daeuj, Denzlinz Yen gaenxmaenx doeksaed gij cwngcwz leih minzmou minzbinj, rengzrwd bang minzmou minzbinj giyez hwngfat, coicaenh minzmou minzbinj giyez mboujduenh hwngfat guh hung doengz- seiz, gaenxmaenx sonyinx giyez hengz gij cwzyin ndawbiengz, bangdoi hong vut gungz gunggeng, rengzrwd coicaenh gizdieg ginghci ndawbiengz hwngfat、gyalai minzcuz doxgiet.

Guengjsae Denzlinz Hozbingz Dangzyez Mizhanh Gunghswh ciuq gij iugouz baijbouh moix bi yenveij、yen yinzminz cwngfuj fat haenx, haenqrengz senhconz dungyenz gij youqgaenj daj- ndaem oij, doenggvaq aen bingzdaiz saenqsik、veihsin、nem gvangjgau、venj fukbaengzhoengz daengj fuengsik guh senhconz. Doengzseiz, haenqrengz son- gyauq dinfwngz dajndaem oij, bauj- maenh oij sou ndaej lai. Daengz seiz- neix, daengx yienh dajndaem oij faenbouh youq 14 aen yanghcin 127 aen hingzcwngcunh, 11669 ranz dajndaem oij, dajndaem najdieg 18.06 fanh moux, ndawde 4690 ranz ranzgungzhoj dajndaem oij, najdieg daengz 4.73 fanh moux.

Guengjsae Denzlinz Yen Sinh- fuzyenz Youzcazbya Haifat Mizhanh Gunghswh yungh “gunghswh+dieggoek+hozcozse+nungzhoh” hwngfat vunqsik, doenggvaq “bangfuz lienzhab gingh- yingz”, cingjhab swhyenz. Gonqlaeng youq Cejmyauz Yangh lienzhab gingh- yingz dajndaem 2000 moux dieggoek guhyiengh youzcaz biucinj sang、youq Bazdu Yangh Fuzdaz Cunh Mbanj- banhmaj caeuq Aen Hozcozse Ciennieb Dajndaem Mak Byaek Yingzswng lienzhab ginghyingz dajndaem 3000 moux dieggoek guhyiengh youzcaz song sang, gonqlaeng lienzhab ginghyingz 280 lai ranz ranzgungzhoj. Linghvaih, vih caenh’itbouh daiqdoengh nungzhoh gaenxmaenx dajndaem youzcaz, gungh- swh lai baez cingj lauxhangz daeuj son’gyauq dajndaem, son nungzhoh dinfwngz dajndaem, baujmaenh ndaej vut gungz gunggeng.(Dwng Veijsi)