Fouxvaizcin Bouxcuengh Nanz- ningz youq Nanzning Si Gyangh- nanz Gih Gyanghsih、Vuzhih、Suhhih、Yenzanh daengj cin hwnghoengh, daegbied dwg Suhhih Cin ceiq hwnghoengh. Cungj foux neix dwg cungj foux cojcienz ndeu, dwg aendoih vaizcin hohbi youq mboengq gvaqcieng daengz gak mbanj hohbi seiz biujyienj.

Fouxvaizcin Bouxcuengh Nanz- ningz ndawde youz sam bouhfaenh gyoebbaenz. Bouhfaenh daih’it dwg fouxvaiz, gijdaeuz dwg ciuq vaiz ningdoengh. Aenvih bouxyienj cungj dwg nungzminz, gyoengqde gyaez vaiz、maij vaiz, caeuq vaiz haethaemh doxgyawj, sugseg gij daegdiemj ningdoengh、sibgvenq de, neix biujyienj seiz din ning fwngz doengh sug dangqmaz, yienghsiengq lumj caen, sengdoengh dangqmaz, lumj vaizcaen ityiengh, vunzlai gyaezmaij raixcaix. Bouhfaenh daihngeih dwg foux yienj guh hong reihnaz, lumj cae naz、doek ceh、ndaem gyaj、rap haeux daengj. Bouhfaenh daihsam dwg fouxmbaetcaz gvidingh ndei haenx.

Fouxvaizcin itbuen youz song boux vunz yienj, boux ndeu yienj gyaeuj vaiz, bouxndeu yienj riengvaiz, gyaeujvaiz aeu faex roxnaeuz duk guhbaenz, yiengh beij vaiz lai hung boix ndeu, gij yienghvaiz gaeu gaeuzgoz, da hunghung, naeng bwn ndaemndet, ndaeng deng con cag, lumj caen dahraix. Ndangvaiz aeu baengz guh, dangj bouxyienj baih- ndaw haeuj, ndangvaiz caeuq rieng- vaiz youz boux ndeu gaemdawz ningdoengh. Biujyienj gaxgonq,“vaiz”ninz youq henz, sing laz gyong lumj angqvauvau dwk yiengj le, youz bouxgeq ndeu yien vaiz hwnjdaeuj, gvax ciengz byaij geij hop le, caemhcaiq doiq“vaiz”gangj geij coenz vahriu, caeuq bouxyawj dox- loengh guh’angq, ciengzmienh caen dwg vunz youq ndaw foux, yinhloz buenx foux yiengj.

Fouxvaizcin Bouxcuengh Nanz- ningz biujyienj seiz buenx miz fwen, gij fwen neix miz fwen hongnaz、fwengoengheij caeuq fwen haenh vunzndei、vet vunzrwix. Gaendwk gij vahfwen bienqvaq, goengcaz yahcaz faenbied haeuj giek biujyienj, ging- ciengz dwg boux ndeu yienj geij giek, diuq haeuj diuq ok, laemzseiz yienj, baengh gij yienjok ndeiriu haenx, hawj vunzlai bekfwngz hemq- ndei goksasa.

Gij vahciengq fouxvaizcin Bouxcuengh aeu Vahcuengh ciengq. Neiyungz caensaed, yienghsing naek- caem, gamjcingz caensaed, ndawde son’gyauq vunzlai gyaezmaij duzvaiz, gaenx cae gaenx ndaem.