Bi 2019 ndwen 8 ngoenz 2 banringzgvaq, gicej youq Denzlinz Yen Yinzminz Fazyen yawjraen Lij dingzcangj yungh Vahcuengh caeuq bouxdangsaeh gangjgoj:

Lij dingzcangj: “Neix dwg mbaw lizvwnh cingqmingz mwngz, guenj ndei bw, mbouj hawj doek lonw！”

Bouxdangsaeh：“Baenz, gyombaiq mwngz lailai！”

Laeb’anq、 soengqdaengz、 diuzgaij、haidingz daengj, cienzbouh yungh Vahcuengh caeuq bouxdang- saeh gangj ndaej raeuzrwdrwd, neix dwg gij ndwenngoenz boux fazgvanh Cuengh Gun song vah gihcwngz.

Lij Hungzlieng, bi 1979 ndwen 5 seng youq ranz Bouxcuengh Denzlinz Yen ndeu, daj iq caeuq bohmeh gangj Vahcuengh. Seizneix guh Denzlinz Yen Yinzminz Fazyen Betgveiq Faz- dingz dingzcangj, daengz seizneix gaenq youq fazyen guhhong 16 bi.

Vahcuengh banh’anq gak minzcuz doxgangj raeuzrwd

Denzlinz Yen Yinzminz Fazyen Betgveiq Fazdingz guenj Betgveiq、Nazbij、Luzlungz(vunz senj youq) 3 aen yanghcin, gungh 36 aen hingzcwngcunh 253 aen mbanj 5 fanh lai vunz. Dieg neix miz Cuengh、Gun、Yauz、Myauz daengj minzcuz, cujyau gangj Vahcuengh、Vahgun、Vahyauz. Dangdieg Yauzcuz cawz gangj Vahyauz le, gihbwnj cungj rox gangj Vahcuengh. Vihneix, yungh Vah- cuengh baenz gij fwngzgaem youq- gaenj cawqleix ndei anqgienh. Lij Hungzlieng bingzseiz cawqleix anq- gienh nangqdaengz gij anqgienh yungh Vahcuengh ciemq anqgienh cungjsoq 90% doxhwnj.

Lij Hungzlieng geiq ndaej, baez nduj yungh Vahcuengh saemjleix anqgienh dwg bi 2006 ndwen 5 mwh daengz Betgveiq、Bingzlang aen dingz cunzdauq guh suhgiyenz caeuqfaenh saemjleix aen anqgienh lizvwnh ceng- nauh ndeu. Bouxgauq、bouxdenggauq cungj dwg vunzmbanj Bouxcuengh dangdieg, dan rox gangj Vahcuengh, dingq mbouj rox Vahgveiliuj、Vah- bujdungh, hoeng fazgvanh cawjbanh dwg Bouxgun, dingq mbouj rox Vahcuengh. Seizhaenx de couh fatok gij daegdiemj bonjfaenh Cuengh Gun cungj rox, caeuq gyoengq fazgvanh yungh Cuengh Gun song vah daeuj saemjleix anqgienh, doenggvaq gaenxmaenx doxgangj doxyaeng, dauqdaej hawj song mbiengj ndei dauq. Lij Hungzlieng naeuz:“Dangh- naeuz cungj mbouj rox gangj Vahcuengh, aen anqgienh neix caen dwg saemjleix mbouj ndaej!”

“Youq dieg Betgveiq Fazdingz vunzlai yungh Vahcuengh lai, yungh Vahcuengh saemjleix anqgienh mboujdan fuengbienh vunzlai Bouxcuengh, vanzlij fuengbienh vunzlai Yauzcuz.” Lij Hungzlieng naeuz, “Baez ndeu mwh saemjleix aen anqgienh gvanbaz gyadingz cengnauh nangqdaengz bouxdangsaeh Yauzcuz, bouxgauq、bouxdenggauq mwh yigen mbouj doxdoengz cungj dwg gangj Vahyauz, dou bouxguhhong youq henzgyawj cungj dingq mbouj rox, seizneix couh caenhliengh hawj boux- dangsaeh yungh Vahcuengh daeuj gangj baenzneix bouxguhhong cij rox, aenvih bouxgauq、bouxdenggauq caeuq bouxguhhong cungj rox gangj Vahcuengh, ndigah anqgienh saemj- leix ndaej swnhleih.”

Swhfaz vih minz coihawj henzgyaiq minzcuz doxgiet

Denzlinz Yen youq dieg gapgyaiq Guengjsae Yinznanz Gveicouh, swhfaz anqgienh 80% dwg gvanbaz gyadingz cengnauh, anqgienh gizyawz miz ngaenzcienz sonjhaih boiz cienz ceng- nauh、ndangvunz sonjhaih boiz cienz cengnauh、ndawbiengz ciq cienz cengnauh daengj, Lij Hungzlieng caeuq gyoengq doengzsaeh de roxyiuj daengz, roengzsim banh ndei anq- gienh, doiq hawj dieg gapgyaiq doxgiet huzndei miz cozyung youqgaenj.

Bi 2004 ndwen 5, Banh moux Denzlinz Yen Luzlungz Cin Dunzcunh caeuq Veiz moux(mbwk) Gveicouh Swngj vunz Vangmoz mboengq youq Guengjdoeng dajgoeng doxrox, song vunz youq bi 2005 daengz Denzlinz Yen Minzcwnggiz aeu mbawcingq baenzranz. Riengzlaeng miz 2 boux lwg, song gvanbaz louz lwgnyez youq ranz Banh moux, hawj bohmeh Banh moux ciengx, Banh moux caeuq Veiz moux couh gak vunz gak dieg bae dajgoeng. Song vunz aenvih doxfaen youq nanz lai, gig noix caezyouq gangjgoj, ngaiz gamjcingz mbouj doxndei. Bi 2017 mboengq ndwen- cieng, gvanbaz song vunz aenvih gij saeh iq ndaw ranz doxceng, Banh moux daengz Denzlinz Yen Yinzminz Fazyen daezok dajgauq lizvwnh.

Neix dwg aen anqgienh nangqdaengz bouxdangsaeh gapgyaiq song swngj gih ndeu, baenzlawz cijndaej cawqleix ndei? Lij Hungzlieng naemj daengz, bouxdangsaeh cungj dwg youq rog dajgoeng, danghnaeuz baedauq lai baez, neix couhdwg gyalai gij cingz- bonj dajgauq, doengzseiz danghnaeuz ngaekngeu cengnauh cawqleix mbouj ndei, lij yingjyangj daengz gapgyaiq doxgiet. Mwh saemjleix anqgienh, Lij Hungzlieng gaenxmaenx dazyinx song mbiengj lai yawj lai naemj gij ngaek- ngeu cengnauh, hawj bouxdangsaeh doxhuz gaijgez vwndiz, coihawj song mbiengj diuzgaij ndaej, anqgienh ndaej gaijgez ndei, coihawj Guengjsae Gveicouh dieg gapgyaiq doxhuz hwng- fat.

Diuzgaij lai baez baujmaenh gugih doxhuz onjdingh

Gugih doxhuz onjdingh mbouj doxhuz onjdingh, yenzcung yingjyangj daengz ndawbiengz doxhuz onjdingh. Lij Hungzlieng lij diuzgaij baenz aen anqgienh gugih vunz senj youq cengnauh ndeu, rengzrwd baujmaenh gugih doxhuz onjdingh. Bi 2003 ndwen 10、bi 2006 ndwen 1、bi 2011 ndwen 3, bouxgauq Cinz moux、Liengz moux caeuq bouxdenggauq Liz moux、Vangz moux faenbied ciemdingh 《Mbawsaw Hezyi Cienjnyiengh》《Mbawsaw Hezyi Dajndaem Lienz- guenj》 caeuq 《Mbawsaw Hezyi Doxgap Dajndaem Oij》, caemhcaiq iudingh lienzguenj doxbaen. Bi 2011 ndwen 10, Denzlinz Yen Vajcunh Suijdencan hanghmoeg hwnjguh aeuyungh, Denzlinz Yen Gozduj Swhyenzgiz cwngsou diegbauguh bouxdenggauq Liz moux、Vangz moux youq Betgveiq Yauzcuz Yangh Lung- vaj Cunh Mbanjbaznangz haenx, caemhcaiq aeu ngaenzboizbouj dieg、ngaenzbouj anceiq caeuq ngaenz- boizbouj gomiuz fat daengz aen cangqhoh bouxdenggauq Liz moux、Vangz moux bae. Doeklaeng aenvih caeuq bouxdenggauq doxyaeng baen ngaenzboizbouj dieg、ngaenzboizbouj gomiuz mbouj baenz, bouxgauq Cinz moux、Liengz moux couh gauq daengz Denzlinz Yen Yinzminz Fazyen, cingjgouz bouxdenggauq Liz moux、Vangz moux ei habdoengz iudingh aeu mizgven ngaenzboizbouj dieg caeuq ngaenzboizbouj gomiuz hawj bouxgauq.

Ciep ndaej anqgienh le, Lij Hungzlieng gibseiz caeuq song mbiengj bouxdangsaeh roxyiuj cingz- gvang, gaenxmaenx caeuq song mbiengj bouxdangsaeh doxgangj hez- diuz, aeu anqgienh nangqdaengz faplwd gvanhaeh gangj hawj song mbiengj bouxdangsaeh, caemhcaiq cunghab yungh faplwd、cwngcwz daengj soujduenh caeuq gyauyuz、son daengj banhfap, ginggvaq hezdiuz son caeuq diuzgaij lai baez, song mbiengj dauqdaej yaengbaenz diuzgaij hezyi. Lij Hungzlieng diuzgaij bouxgauq Cinz moux、Liengz moux dajgauq bouxdenggauq Liz moux、Vangz moux baen ngaenzboizbouj cwngdieg dieg- bauguh cengnauh ndaej baenz, hawj song mbiengj cengnauh siu bae, coihawj le hong cwngdieg vunz senj youq Vajcunh Suijdencan Gugih ndaej swnhleih guh, hawj vunz senj youq gugih minzcuz doxgiet, doxhuz onjdingh.

“Aen dem aen anqgienh labcab coegfwngz, daengz ndaw fwngz Lij Hungzlieng dingzcangj, de cungj gaijgez ndaej. Neix dwg vihmaz ne?” Denzlinz Yen Yinzminz Fazyen dangjcuj cwngzyenz、fuyencangj Cinz Gez naeuz, “Lij Hungzlieng caeuq doengzsaeh de youq mwh banh’anq yungh cingz、simndei caeuq gij hengzdoengh saedsaeh bae vaqgej ngaekngeu cengnauh vunzlai, coihawj minzcuz caeuq minzcuz doxgiet, hawj vunzlai doxliz gyawj le, doengzseiz vunzlai saenq ndaej caeuq haeuj- coengh, neix dwg fazgvanh song vah gihcwngz yungh hengzdoengh guh swhfaz vih minz leixniemh.”

Ndaej daengz Lij Hungzlieng daiqlingx, Betgveiq Fazdingz bingzseiz gaenxmaenx haiguh senhconz fazci, daezhawj faplwd camcaz. Aeu senh- conz gyauyuz dangguh gij rengz hawj minzcuz doxgiet, youq ngoenzhaw、ndwen minzcuz doxgiet、ndwen senh- conz cunghci、ngoenz fapguek daengj seiz youqgaenj, cujciz fazdingz gangingj guh gak loih faplwd senhconz hozdung, daezswng diegguenj vunzlai faplwd yisiz caeuq gij naengzlig ei fap baujhoh bonjfaenh. Bi 2018 ndwen 12, Betgveiq Fazdingz ndaej aen cwng- heuh “aen cizdij guhyiengh minzcuz doxgiet cinbu baez daihbet swcigih” Swcigih Dangjveij、Cwngfuj hawj haenx.