Mbanjrungh, doekyouq ndaw rungh youh iq youh laeg neix, geij gan ranzdaemq hwnq youq laj dinbya, gan dem gan doxrangh doxnem.

Mbanjrungh, seiqhenz deng bya sang humx dwk ndaetndwdndwd, cij miz diuz roen saeq ndeu lumj duzngwz ngutngut ngeungeu con ok bakgemh bae.

Mbanjrungh, miz 5 hoh ranz, 20 lai boux vunz. Ndawde miz 10 boux vunz miz rengz guhhong, gizyawz cungj dwg vunzgeq caeuq lwgnyez. Mbanjrungh reih noix rin lai, muengh mbwn caj fwn. Gyoengqvunz guh dwk noh ndaem noh ndongj, cungj dwg buenq bi lwgsawz buenq bi haeux- yangz, bibi baengh gwn gij haeux- gouqcaeq guekgya gvaq saedceij.

Daegyangz dwg boux lwgnyez ceiq miz caijsoq Mbanjrungh. Bohmeh Daegyangz gaenx guh mbaet yungh, cengqgengz soengq de doeg sat cuhcungh, ngamq ndaej 13 bi couh ma ranz guhhong. Daengx ranz buekmingh guh, cungj dienz mbouj rim 4 aen dungx. 18 bi bihaenx, Daegyangz siengj okrog bae guhhong, de bae iu Daeglij doxcaeuq bae.

Daeglij dwg ndaw mbanj boux hujgeiq caeuq Daegyangz ceiq ndei. Songde doengz bi okseng, doengz bi doeg siujyoz. Ranz Daeglij gungz gvaq ranz Daegyangz, siujyoz caengz doeg sat, couh ma ranz guhhong.

“Daeglij, okrog bae guhhong, bae lwi?” Daegyangz yamq haeuj ranz Daeglij, Daeglij cingq nyaengqnyinyi gueng gaeq.

Daeglij ngiengxgyaeuj ngeizvaeg cim Daegyangz:“Baenzlawz sawqmwh siengj okrog bae guhhong?”

“Bae ndaw singz dajgoeng, ndwenndwen miz cienz lingx, ndei gvaq ciengx gaeq.”

“Gou mbouj bae.” Daeglij gyaeuj ngauzsigsig, “Bae ndaw singz, gou rox guh maz?”

“Bae ne, guhdoih bae cij baenz.” Daegyangz ngaeuq naeuz.

“Mbouj bae.” Daeglij ngaem- gyaeuj laebdaeb gueng gaeq.

“Youq ranz guh baenz maz.” Daegyangz ceij aenranz naeuz, “Mwngz yawj gij ranz raeuz, ndaem- ndadndad cixbah, lij roh fwn coq rumz. Okrog bae guhhong, miz ranz- laeuz youq, cograwz lij ndaej youq ndaw singz cawx ranz.” Daegyangz angqfwngfwng.

“Mwngz guh fangzhwnzloq? Muengh ndaundeiq doek bya.” Daeglij riunyaen hehe.

“Roengzrengz couh ndaej lo. Bae ne, gou okbae le, lw mwngz boux hauxseng dog mbouj mbwq ha.”

“Caen bae ha?” Daeglij miz di hozhumz, “Gou……bae sawqsawq, dwgrengz lai couh dauq.”

Youq ndaw singz buenq bi, Daegyangz caeuq Daeglij mbouj rox vuenh geijlai cungj hong lo. Loed suijniz, gwed daehhuq, swiq vanj swiq byaek cungj guh gvaq. Daeglij miz di gik, vunz mbouj haengj aeu de, hoeng Daegyangz mbouj ndaej vut de mbouj goq, caenh ndaej daz de bae ra hong.

“Daegyangz, dauqranz suenq lo.” Daeglij riengz laeng Daegyangz byaij roen naiqnueknuek.

“Caenh heuh dauqranz, mwngz lij dwg song sam bi lwgnyez ha!” Byaij baenz buenq ngoenz gai, caengz ra ndaej hong, Daegyangz hozndat baenz feiz, nyaenx mbouj ndaej fok naeuz.

“Cienz yaek yungh sat lo, raeuz bae guh gaujvaq suenq lo.” Daeglij raemxda roengzyagyag.

Daegyangz raen de hojlienz lai, nai naeuz:“Yienghneix ba, ngoenzcog caiq ra mbouj ndaej hong, raeuz couh dauqranz.”

Doeklaeng, songde haeuj gungh- cangj bae guhhong. Moix ngoenz hwnjban 10 aen cungdaeuz. Ciuq- yiengh dwgrengz, hoeng ndaej cienz- hong haemq lai, hix ciuqseiz fat hawj. Daegyangz hozrim dangqmaz, Daeglij cix ciengzseiz gyangznaek, naeuz ninz mbouj gaeuq, mboujyawx youq ranz soengse. Cengqgengz guh rim bi, caih Daegyangz baenzlawz lox, de laemx- sim dauqranz lo.

Mbouj rox mbouj nyinh, Daeg- yangz youq ndaw gunghcangj guhhong 5 bi gvaq. Daegyangz gaenx guh coengmingz, lij youq ndaw cehgenh gangj ndaej dahyoux he. Dahyoux heuhguh Dahsiu, caeuq Daegyangz caemh yangh, ranzmbanj hix youq ndaw lueg, doxgek sam goengq bya.

“Yangz, gou siengj……” Youq ndaw gunghyenz, Dahsiu ninz youq ndaw rungj Daegyangz, song gen heuxdawz diuz hoz de, song da cimnyognyog. Daegyangz daep naeng- bak haeujbae:“Mwngz siengj gwn diemz ha.” Dahsiu naj nyaenq- ndimndim:“Gou siengj aeu lwg……” Daegyangz gotdawz Dahsiu:“Gou caemh siengj aeu.” Dahsiu nyinhcaen naeuz:“Raeuz bae co ranz youq ba.” “Co ranz hix ndaej, mboujgvaq……” “Mboujgvaq maz?” “Gou siengj dauq- ranz caiq seng lwg.” “Mwngz fatbag la. Baema aen ranz roh fwn mwngz seng lwg, gou mbouj bae.” Dahsiu fwt naengh hwnjdaeuj, hozgaek naeuz.“Mbouj dwg ma lajmbanj, ma yienhsingz.” “Youq gizneix guh ndaej ndeindei bae, ma yienhsingz guh maz gwn.” “Raeuz rom miz geij fanh maenz cienz, ma baij dan guh gaicawx. Sien co ranz, caiq cawx ranz……” Daegyangz coh gizgyae ngonz bae, lumjbaenz gij ngoenzndei cingq coh de buet daeuj. De sawqmwh got ndaet Dahsiu, angqvauvau naeuz:“Daengz seizhaenx, raeuz youq ndaw ranz moq onjdupdup, seizbienh seng, seng song lwg, seng sam lwg, seng baenz rouh……” Dahsiu deng got dwk baegfofo:“Mwngz guh fangzhwnzloq ba……”

Daegyangz caeuq Dahsiu ma daengz yienhsingz, co fungh ranz ndeu an’gya le, doq nyaengqnyinyi bae cauhnieb lo. Songde sien baij dan gai byaek, canh ndaej di cienz le, youh co bouq gai buhvaq. Yienghneix dwgrengz sinhoj roek caet bi, cengq- gengz youq yienhsingz cawx dauq ranz 60 lai bingzfuengmij ndeu. Gyau soujfu 20 fanh maenz, lij yaek caeuq yinhhangz ciq cienz 30 fanh, moix ndwen boizcaiq 2000 lai maenz. Yienznaeuz atlig daih, hoeng, ndaej youq aen ranz moq yienhsingz, songde mbouj rox geijlai sim’angq, Gij dwgrengz haemzhoj cibgeij bi haenx, cungj hoenz siu fwj sanq lo.

Ngoenz haeuj ranz moq, Daegyangz danq naeuz:“Mbouj rox Daeglij seizneix baenzlawz yiengh?” Dahsiu riu naeuz:“Mwngz caen dwg sim duzyou, lij ndaejhoengq siengj bouxwnq.” “Daj iq lohgangh couh baenz hujgeiq ndei, youh doxcaeuq bae Guengjdoeng guhhong gvaq, ngeix daengz de seizneix lij youq gij ranz roh fwn laeuh rumz, gou miz di cojgvaq de.” “Mwngz heuh de okdaeuj be. Seizneix yienhsingz ra hong yungzheih.” “Gou daj dienhvah geijlai baez, de caenh naeuz, de mbouj miz gij mingh youq ndaw singz.” “Gak vunz gak mingh, de youq lajmbanj gvenq lo, caih de lo.” Dahsiu nai Daegyangz naeuz.

Ngoenzneix lajbyonghngoenz, Daegyangz daj baihrog maranz, gaem aen cenjraemx ngamq daep haeuj bak, cij dingqnyi aendou yiengj- dogdog. De cienq ndang hai dou. “Ya! Daeglij.” Daegyangz angq hemq, “Ngamq siengj cingj mwngz daeuj ranz moq gwn laeuj, mwngz daeuj cingq hab lo.”

Daeglij riuhehe naeuz:“Gou cam vunz, cij rox ranz mwngz youq gizneix. Yienzlaiz couh youq doiqdou gou.” “Doiqdou mwngz?” Daegyangz moengjdoengj lo. “Ne.” Daeglij fwngz ceij doiqmienh, “Gou ngamq buen daeuj aen ranz moq neix.” Daeglij naj ronghruru laebdaeb gangj:“Caen ngeix mbouj daengz, song hujgeiq raeuz lij ndaej guh ranznden.”

Daegyangz yamq haeuj ranz moq Daeglij, byaengq da doeksaet yat: Ndawranz ciengz hau benj mong seuqsadsad, geij hongq rug youh gvangq youh doeng rumz, daiz daengq moq, dienhdaeng rongh, densi yiengj…… “Va! Caen gvangq, miz bak bingzfuengmij bw.” Daegyangz danqhaenh, dajbak cubcub, “Hujgeiq, gou baezgonq yawjcuij mwngz lo, mwngz cawx ndaej ranz moq, caen ak!” Daeglij miz di najmong:“Gou mbouj ak lawz, dauq ranz neix dwg cwngfuj soengq hawj. Baihgwnz raen Mbanjrungh gungzndoq, mbouj hab youq vunz, couh heuh senj okrog daeuj. Daengx mbanj 4 hoh cungj faen ndaej ranz. Deng lo, cwngfuj lij bang raeuz ra hong, gou gvaq geij ngoenz couh bae gunghcangj hwnjban.” Daeglij ndwnj gaemz myaiz he, ciep naeuz, “Hojsik, dahnuengx mwngz haq lo, bohmeh mwngz youh gvaqseiq bae. Mboujnex, seizneix ranz mwngz caemh ndaej dauq ndeu lo.” Daegyangz naj fwt bienq saek, din fouzfubfub ndwn mbouj onj. Daeglij vaiqdi rexdawz de:“Guhmaz la?” Daegyangz bibi fwngz, riumbw naeuz:“Ngoenzneix deng ndithaenq cik, miz di gyaeuj ngunh, gou maranz yiet yaep he.” Daeglij youq raeblaeng sing goksasa daengq de:“Gou loengh byaek cug le, gvaqdaeuj ndot laeuj bw.”

“Caenh ndot laeuj, mbouj gwn byaek, baenzlawz mbouj fiz.” Rex Daegyangz maranz, Dahsiu damz- byoedbyoed. Daegyangz naj hoengz- godgod, da laep da hai, song fwngz luenh vad:“Gou mbouj……mbouj fiz.” Dahsiu aeu sujbaq bang de uet naj:“Hozhaenz bouxwnq luba.”

“Gou mbouj …… mbouj hoz- haenz, gou caiq buekmingh guh 10 bi, hix cawx dauq ranz bak……bak bingzmij……”