Dinfwngz dajdiz Hungzliengz dwg cungj dinfwngz ndawbiengz Bouxcuengh daengx ranz swnjcienz haenx, cienzlah youq ranghdieg Lungzanh Yen Yengyangh Cin Hungzliengz Cunh, baengh cojcoeng daih dam daih swnjcienz roengzdaeuj yaek ndaej 200 bi nanz, vunz ndawbiengz heuh aen cunh neix guh“aen cunh canghdajdiz”.

Hungzliengz Cunh Bouxcuengh aeu fwngz dajdiz dwg cungj cauhguh yungh fwngz youz daengx ranz cojcienz haenx, guh ok doenghyiengh diet gak cungj gak yiengh cungj miz haujlai, ndawde gijdaeuz dwg hongdawz dajndaem iq、hongdawz ranzyungh iq caeuq gij doenghyiengh lingzgen boiq gihgi hung lumj dohlahgih、diuceh daengj, canjbinj diz ndaej youh deih youh maenh, ce gyoet ndaej ngamj, doenghyiengh diet ndongj youh naihyungh, gij cax bakcax nyangq youh raeh, cizlieng ndei dangqmaz.

Gijdaeuz mbaek gonqlaeng caeuq fuengfap dajdiz miz sam aen fuengmienh. Daih’it, diz diet、 veh yiengh. Yaek diz baenz maz doxgaiq ne, dawz gaiqgang roxnaeuz gaiqdiet coq haeuj ndaw lozfeiz baeu daengz oq le dawz okdaeuj diz mbang bae, liuxle coq gwnz banjdiet veh yienghdoz, aeu aengvej(fagsuuqcamx) gvej(camx) ok gaiqyiengh, liuxle caiq coq ndaw lozfeiz baeu hoengz le dawz ok, aeu fagcuizdiet diz, diz ndei liux caiq coih baenz yiengh, cieplaeng dawz hwnj sahlwnz, muz lwenq bae. Daihngeih, hawj de gyoet ndei. Aeu siengfung beiz rum haeuj ndaw lozfeiz bae hawj feiz bauj oq, dawz gij gaiqdiet muz ndei haenx cap haeuj ndaw feizoq bae, caj gaiqdiet bienq hoengz ndei le aeu faggimz nep hwnjdaeuj, (beijgangj diz cax) dawz bakcax coq haeuj ndaw raemx bae, dangseiz couh cazyawj, langh bakcax hau lai, couhdwg gaiqdiet ndongj lai, yungh couh deng vangq ngaih lai, heu lai couhdwg unq lai, yungh couh mbwnj ngaih lai. Daihsam, aeu caxdauz dauz gaiqdiet wenj bae, couh guhbaenz gienh doxgaiq ngamjndei lo.

Bi 2010, Dinfwngz dajdiz Hungzliengz ginggvaq Gvangjsih Bouxcuengh Swcigih Yinzminz Cwngfuj doengzeiq, ndaej lied haeuj daihsam buek swcigih gaep feih- vuzciz vwnzva yizcanj mingzloeg.