It

Bi 2020 ndwen 1 ngoenz 24, singgeiz haj, doek fwnmoenq.

Ngoenzneix ngoenzndaep, nyaengqfoedfoed bi daengz byai, cungjsuenq ndaej cuengqgyaj, ndaej soeng gaemz heiq ndeu lo. Byawz naeuz “youq cunhveij guhhong, ndiengq song ga dingh naengh, mbouj yungh byaij ok gvaengh, naengh- naengh couh gvaq ngoenz”? Hw, de caen mbouj rox lo, “baihgwnz mae baenz bog, fagcim dog dwgrengz” ha!

Banringz, gou daj ndaw roengq gaeb duzgaeq gaeb duzbit okdaeuj yaek gaj, sawqmwh soujgih yiengj lo, dwg cujyin dwk daeuj:“Banngoenz it diemj buenq cung hai hoih gaenjgip fuengzre binghraq……”

Ngamq cuengqgyaj youh heuh haihoih? Gou ngawhngwd yaep ndeu, ndenq duzbit gwnz fwngz hawj mehyah, naeuz:“Meh Dahging, cujyin heuh bae haihoih, mwngz youq ndawranz couh lai dwgrengz di ba.” Gangj sat le couh rax dienhci fili fwdlwd naengh okbae. Mehyah dinghdwd mbouj guhsing, ndawsim de mbouj angq. Gou ngoenzndaep cungj mbouj ndaej leix ranz, doiq mbouj gvaq de ha! Caeklaiq de hix daj gwnz vangj rox seizneix binghraq gyueklah ndaej youqgaenj, rox aen dauhleix “daengxcungq re binghraq, gaujvaq caemh dwgrengz”.

Gou diemheiq fofo ganj bae daengz cunhveijvei, gyoengqvunz gaenq daengz caezcup lo. Gou gvaengxyawj doengh boux daeuj haihoih, raen miz gak bouxdaeuz cunhveij、gak byoz boux cunhminz siujcujcangj、bouxcoz dangjyenz、boux bwh ciepban cunhveij caeuq boux binglaux duivuj miz 20 lai vunz. Daihgya doq ciemcoh daengz hoih, cunhveij cujyin hix doq gangj vah lo.

Cujyin genjdanh cienz gij cingsaenz aen hoih ndaw cin, doengbauq gij cingzgvang binghraq dangqnaj guek raeuz. Naeuz seizneix daengx guek gaenq daihbaj vunz ndaej bingh sinhgvanh feiyenz, caemhcaiq mboujduenh miz vunz deng lah, boux baenz bingh neix ngoenz beij ngoenz demlai. Dangqnaj gij hong ceiq youqgaenj guek raeuz couhdwg fuengzre binghdoeg mbesanq.“Re sinhgvanh binghdoeg, Bouxboux caez okrengz, Vunzlai ceiqheiq geng, Rengz dingj ndaej mbwnlak.”

Caj cujyin anbaiz hong le, gyoengq bouxdaeuz couh baen cuj yungh lahbah iq roengz gak byoz baenz luengqranz baenz gehhongh bae gvangjbo senhconz, dawz gij swhliu baihgwnz fat roengzdaeuj bae fat hawj gyoengq vunzmbanj, caenhliengh hawj ranzranz rox doh bouxboux rox caez. Daengq lwnh doenghboux ngamq daj Vujhan Huzbwz dauqma gvaq cieng aeu gag youq ranz gekliz 14 ngoenz, danghnaeuz raen miz ae dem fatndat sikhaek bae yihyen genjcaz aeu yw. Doengzseiz baij vunz hensouj bak- mbanj, laengz gienq vunzmbanj fouzsaeh gaej haeujok, gimq hawj vunzrog haeuj mbanj, saek roen ndaetdwt bae. Miz vunz naeuz doengh boux hauxseng gag nyienh guhdaeuz guhciengq gaenxmaenx guh gij hong youq fuengzre binghraq itsienq:“Gvaq ndaep mbouj an’onj, Donq cieng gwn mbouj diemz, Dwgrengz mbouj ndaej cienz, Caen hojlienz lairaeuh.” Doenghboux hauxseng cix han naeuz:“Laengz binghdoeg haeuj mbanj, Caez doxcanj okrengz, Coengh vunzmbanj daeuj hen, Dwgrengz cix miznaj.”

Ciengz hoenxciengq mbouj miz hoenzsiu neix youq Mbanjyaujyenz dou hainduj lo. Gwnz vangj naeuz, seizneix daengx guek ndaw singz lajmbanj gizgiz cungj gaenxmaenx camgya baez fuengzre sinhgvanh binghdoeg, raeuz itdingh dwk ndaej hingz!

Ngeih

Bi 2020 ndwen 1 ngoenz 26, ngoenz singgeiz, mbwnbumz.

Ngoenzneix cieng co’ngeih, haet- romh gou ngamq hwnqmbonq, cunh- cihsuh couh dwk dienhvah daeuj coi gou bae gak byoz baizcaz liujgaij gij cingzgvang doengh boux guhhong youq baihrog dauqranz gvaq cieng. Gou rubrub rabrab cat heuj swiq naj le, couh rag geu buhgingjfuz daeuj daenj yaek okdou. Gou youq ndaw mbanj dwg boux gingjvu culij he, ngoenznaengz mbouj daenj geu buhgingjfuz geijlai, yaek miz maz hozdung roxnaeuz saeh youqgaenj cij daenj.

Mehyah gou cam naeuz:“Bae guh maz nyaenx caeux?”

Gou han naeuz:“Bae baizcaz yawj ranz lawz miz bouxlawz daj baihrog gizlawz dauqma.”

“Ndwencieng daihdaeuz couh cunz bae ranz vunz?” Mehyah youh mbwt coenz ndeu.

Gou naeuz:“Bae ranz vunz miz maz? Ceiq lai deng hemq coenz ‘goengheij fatcaiz’ ndeu lo, hed ndaej ha? Seizneix guek raeuz haujlai deihfueng gyueklah binghraq youq- gaenj, cwngfuj haidoengh gunghgung veiswngh saehgienh it gaep yangjying, caeuq seizgan doxdax buet, caeuq binghdoeg beij goengfou. ‘Fuengzre binghraq, bouxboux miz faenh’. Gou aeu gibseiz bae ranz vunz cazcam gij cingzgvang, gibseiz bauq hawj baihgwnz, gij hong neix nguh mbouj ndaej! Mwngz yawjyawj sinhvwnz gwnz densi, daengx guek gak dieg geijlai bouxgagnyienh、 canghyw mbouj goq yungyiemj cigciep caeuq binghraq buekhoenx, raeuz youq baihlaeng ok saekdi rengz suenq maz!”

Gyoengq vunzmbanj cungj youq ranz nyaengq loengh byaek gvaq cietcieng, heiqrang laeuj noh gyuem- luemz doh luengqranz gyanghongh, daengx mbanj angqangq yangzyangz. Gou caeuq geij boux doengzdoih byoz gvaq byoz ranz gvaq ranz bae cazcam miz bouxlawz mboengqneix ngamq daj baihrog gyawz dauqma, baez boux geiq youq gwnz bonjbouh. Ngoenzneix cazcam, ndaej rox song ranz vunz miz song boux hagseng youq Vujhan doegsaw cuengqgyaj ngamq dauqma, sikhaek bauq hawj baihgwnz, daengq de gag youq fungh rug ndeu gekliz gamyawj 14 ngoenz, mbouj ndaej gyawj bouxwnq, veiswnghyen ndaw cin rox dinghseiz daeuj bang de rau ndangraeuj.

Cig daengz mbwn fuemx yaek laep, dou cij ndaej souhong bae ranz gwn haeux.

Sam

Bi 2020 ndwen 2 ngoenz 8, singgeiz roek, doekfwn.

Ngoenzneix dwg cieng cibhaj. Fwn doeksubsub, daj ndaw mbanj laeb aen dangjyenz senhfungh fuzvugangj neix le, dou itcig cungj ngoenzngoenz youq neix hensouj. Miz ci haeujok dou boux he guh cam boux he guh bitgeiq. Roeb bouxlawz yaek hai ci okbae, couh daengq de naeuz seizneix dwg feihcangz seizgeiz, boux okrog dauqma ndaw mbanj yaek deng gekliz 14 ngoenz, heuh de ngeix ndei le cij okbae. Mwh mbouj miz ci byaij dou couh ndonj haeuj laj bungzliengj ndoj fwn, gag ngon fwen gaij mbwq:

“Bineix mbouj doxdoengz,

Ndawcieng roengz fwnraq;

Caeuxcaeux cix hai byaj,

Binghraq gyuek gwnzbiengz.

Bingh lah namz lah baek,

Boux baenz naek deng dai;

Cwngfuj gip lailai,

Baenz it gaep yangjying.

Hingzsi saed youqgaenj,

Re bingh caemh okrengz;

Beixnuengx gen baengh gen,

Hen dougvaengh bakmbanj.”

Mbanjyaujyenz dou miz 3 diuz roenloh doeng ok baihrog bae, moix aen bakroen cungj laeb aen gvan rehanh binghraq ndeu, moix aen gvan cungj miz 3 daengz 5 boux vunz doxlwnz hen.

Gyanghaet 10 diemjcung baedauq, boux lwgmbwk daj ndaw mbanj haq okbae ndeu hai aen ciiq hausak he dauqma yawj bohmeh. Dou laengz mbouj hawj de haeuj mbanj.

De naeuz:“Dauqma ranz yawj bohmeh cungj mbouj ndaej ha?”

Gou naihsim gej naeuz:“Gij gvigawj dwg mwh feihcangz seizgeiz neix ndaw mbanj dingh roengzdaeuj, dwg vihliux mbouj hawj binghdoeg lah haeuj mbanj, daengx guek cungj doxgiet doengzsim, bouxboux caez ciuqhengz, raeuz mbouj ndaej linghvaih ha!”

De hozgaek eu fwen:“Beixnuengx cix lij laengz, Nyaenx hung caengz raen gvaq, Mbouj hawj saekdi naj, Daeuq vunz ndaq vunz caengz.”

Gou caemh eu hot fwen ndeu han:“Seizneix ceiq youqgaenj, Mbouj ndaej caemhdoih gwn, Aeu dingq vah baihgwnz, Gaej doxcunz baedauq.”

Doeklaeng dah de hix mbouj veiznanz dou, doq cienq gyaeujci lizbae doq eu fwen:“Caih sou laengz couh laengz, Baezlaeng caiq dauq daeuj, Louz ndaej goengq bya youq, Mbouj heiq mbouj fwnzhaz.”

Banringzgvaq, aen cihak ndeu hai daeuj daengz baihnaj dou, goeng hak ndeu roengz daeuj coh dou naeuz:“Sou geij boux sinhoj lo, doengx- ngoenz sou baenzlawz anbaiz gwn- ringz?”

Gou han naeuz:“Dou ranz gyawj, iek le couh doxlwnz bae ranz gwn ngaiz.”

Goeng hak naeuz:“Baenz lai, sou dwg bouxhendou re binghraq, lumj gyoengq canghyw、husw youq cienz- sienq doxdoengz, cungj dwg boux maenh’ak dwk binghraq. Vihliux mbouj hawj binghraq gyuek daengz ndaw mbanj, vihliux ndaw mbanj ndaej onjdingh, sou dwgrengz lai lo. Daihgya caezsim, guek raeuz itdingh ndaej dwk hingz cungjcungj gun- nanz, ngoenz cin raeuj va angj itdingh mbouj nanz couh yaek daeuj daengz lo!”