Fouxlaz cienzlah youq Denz- dungh Yen Cozdwngh Yauzcuz Yangh Meizlinz、Bingzloz daengj cunh, dwg ndaw Denzdungh Yen cungj cozbinj daibyauj foux ndaw- biengz Bunujyauz ndeu.

Fouxlaz Yauzcuz dwg cungj foux ndawbiengz cojcienz ndeu, youz Denzdungh Yen Cozdwngh Yauzcuz Yangh gyoengqvunz Bunujyauz cauh’ok, mboengq hainduj dandan yungh daeuj guh hozdung ndawbiengz gyo’mbaiq fangzbaed、dajcaeq、cawz fangzrwix daengj, daengzlaeng hwng- fat le bienqbaenz cungj fouxdaeuz angqhoh ciet ciengmoq、dajndaem ndaejsou lai. Moix bi ndwencieng caeuq liggaeuq ngux nyied ngeihgouj, singlaz couh yiengj doh mbanj Yauzcuz, vunzlai haenq ciengq angq diuq mbouj daengx.

Diuq fouxlaz seizhaenx, vunzlai couh youq giz guh hozdung daz geu gaeu ndeu roxnaeuz diuz cag ndeu, roix aenlaz le venj hwnjdaeuj, rox- naeuz venj aenlaz coq gwnz gyaq- faexcuk roxnaeuz gwnz ngafaex, aeu aenlaz liz gwnznamh mij haj baedauq, cungj aeu mbouj gaz diuqfoux cij ndei.

Doenghgij ningdoengh cungj foux neix daj swnghcanj swnghhoz Yauzcuz ndawde hwngfat daeuj. Vunz Yauzcuz daihbouhfaenh youq ndaw rungh byasang youq, neix youq diegbya swnghhoz、guhhong nanz le couh gag baenz di ningdoengh gvenq ndeu. Lumj youq gwnz roenbya ngutngeuj lingqlangq haenx byaij roen seiz, din deng yamq sang, byaidin yunghrengz, vanzlij niuj hwet caemhcaiq suk aek daengj. Gij sibgvenq neix, cungj miz youq gij ningdoengh ndaw foux lumj “vengh ga roq gyong”“song faex gvaq gyaeuj”“song faex roq dauqlaeng”“vaiq cienq diemj laz”daengj. Fouxlaz yienjok le gij gyaeujrieng swnghcanj、swnghhoz、cingzgamj vunz Yauzcuz.

Fouxlaz aeu fouxvunzlai guh- daeuz, itbuen miz sam、 haj boux, hix ndaej miz geij bak roxnaeuz baenz cien boux, ciengzmienh hung- hoengh, bouxhumxyawj hix fwngz vad din diuq, hawj vunz raen daengz gij rengzhaenq sengmingh caeuq gyaeundei yisuz.

Vunz dangdieg gyaez fouxlaz raixcaix, youq diegmizok Meizlinz Cunh, mbwkmbwk saisai geqgeq cozcoz cungj rox diuq, neix dwg cungj vwnzva diegbya Yauzcuz, hix engqgya dwg cungj cezmuz foux ndawbiengz vunz Denzdungh gyaez- maij ndeu. Seizneix, fouxlaz gaenq dwg cungj cezmuz Denzdungh Yen guh hozdung hung cungj aeu yienj haenx.

2014 nienz 11 nyied 11 hauh, fouxlaz Yauzcuz ginggvaq Gozvuyen baecinj, ndaej lied haeuj daihseiq buek guekgya gaep feihvuzciz vwnzva yizcanj mingzloeg.