Goengbingz cingqngeih, dwg gij baujcang youqgaenj vunzlai roxnyinh ancienz caeuq vuenyungz. Youq Gvangjsih Vujsenh Yen, miz boux fazgvanh song vah ndeu, de yungh Cuengh Gun song vah saemjleix anqgienh, hawj bonjfaenh caeuq vunzlai depgyawj; de doenggvaq hong bonjfaenh swhfaz hawj yinzminz ndaej fuengbienh ndaej ndeicawq, yungh hengzdoengh guh’ok wngqcingz hawj yinzminz——Roengzrengz hawj vunz- lai youq ndaw moix aen swhfaz anqgienh roxnyinh daengz goengbingz cingqngeih.

De coh heuhguh Luz Vazdingz, vunz Bouxcuengh, vunz Vujsenh Yen Dungzlingj Cin, seizneix dwg boux- fucwz Vujsenh Yen Yinzminz Fazyen Dungzlingj Yinzminz Fazdingz. De lwnh aen dem aen goj sengdoengh youh ngutngeuj ndaw gocwngz saemjleix anqgienh hawj gicej dingq.

Aen goj daih’it: Aen anqgienh yw bingh cengnauh fukcab

Bi 2017, aen anqgienh cengnauh cwzyin sonjhaih yw bingh Yiz moux gauq Vujsenh Yen Yinzminz Yihyen youz Luz Vazdingz cawjguenj banhleix haenx, dahlwg dog Yiz moux seiz louzyih senglwg ok loeklak dai bae. Daj laeb’anq hainduj, Yiz moux couh gangj ok gak cungj mbouj habhoz hawj fazyen rox, doeklaeng aenvih doiq gij gezgoj aen gihgou giemqdingh giemq- dingh gij yienzaen dahlwg dai mbouj fug, youq fazyen nauh bae nauh dauq, iugouz dauqcungz giemqdingh. Hoeng aenvih mbouj hab diuzgienh dauq- cungz giemqdingh, fazyen mbouj hawj.

Luz Vazdingz siengj daengz Yiz moux bi’ndwen mauhgvaq roekcib, cix aeu dingjsouh gij haemzhoj vunz gyaeujhau soengq vunz gyaeuj- ndaem, bienqbaenz “boux vunzgeq saetbae lwgdog” lo, ndwenngoenz vihneix mbouj miz giz ing giz baengh, hix saetbae giz baengh cingsaenz fuengmienh caeuq gij baujcang ciengxlaux, simcingz gikdoengh mienx mbouj ndaej. Luz Vazdingz doq daj gakdoh Yiz moux nai de, yungh Vahcuengh caensim nai, naihsim gejgangj, gejgangj faplwd hawj de rox, doeklaeng hawj boux vunzgeq neix mbouj caiq doiqdingj; doengzseiz doq yungh Vahgun caeuq bouxdaihleix Vujsenh Yen Yinzminz Yihyen ngaeudoeng, doeklaeng song mbiengj yaeng baenz hezyi diuzgaij, Vujsenh Yen Yinzminz Yihyen mbat dog boiz hawj Yiz moux 56 fanh maenz ngaenz. Aen anqgienh cengnauh yw bingh neix gietanq ndaej baenz, ndaej vaqgej ngaekngeu song mbiengj, guh daengz yaugoj faplwd caeuq yaugoj ndaw- biengz dox doengjit.

Aen goj daihngeih: Aen anqgienh cengnauh lizvwnh coegfwngz

“Vunzlai Bouxcuengh cungj dwg vunz gig cinghseuq lauxsaed, hawj gou gamjsouh ceiq laeg dwg aen anqgienh cengnauh lizvwnh Liu moux caeuq Veiz moux.” Mwh Luz Vazdingz lwnh aen goj daihngeih hawj gicej dingq naeuz.

Liu moux caeuq Veiz moux bonjlaiz dwg song gvanbaz doxgyaez, seng ciengx miz song boux lwg dwggyaez, hoeng doeklaeng Veiz moux sawqmwh baenzbag, caemhcaiq yw ndaej haujlai nanz hix mbouj raen ndei. Gaengawq gij gvidingh diuz daihsam《Geij Aen Yigen Ciengzsaeq Gvendaengz Yinzminz Fazyen Baenz- lawz Nyinhdingh Gvanbaz Gamjcingz Caen Gaenq Mbouj Doxndei》 Ceiq- sang Yinzminz Fazyen, cungj cingz- gvang neix hab gij diuzgienh lizvwnh, hoeng diuzgienh cenzdiz dwg itdingh aeu anceiq ndei mbiengj mehmbwk. Luz Vazdingz youq ndaw gocwngz soengq faenzsaw dajgauq bae daengz rox daengz, ranz Liu moux dwg ranzgungzhoj, ranzmeh Veiz moux hix dwg ranzgungzhoj, danghnaeuz cawq- leix mbouj ndei couh yaek ok ngaekngeu gyadingz caeuq vwndiz ndawbiengz.

Baenzlawz cawqleix ndei aen anqgienh coegfwngz neix? Luz Vaz- dingz siengj daengz itdingh aeu guh ndei gij hong neix, de caeuq gyoengq doengzsaeh bae daengz Ginhsiu Yauzyih Cinghsinzbing Yihyen liujgaij gij cingzgvang bingh Veiz moux, canghyw ndaw yihyen naeuz, Veiz moux geij ngoenz gonq ciep ndaej denva daxboh de, rox daengz Liu moux dajgauq lizvwnh le, gij cingzgvang bingh gig mbouj onjdingh.

Seizneix, Luz Vazdingz roxnyinh daengz, seiz caeuq Veiz moux gangj aeu louzsim fuengsik caeuq yungh cungj vah lawz, aeu yungh caensim hawj de gamjdoengh. Ngamq hainduj, Veiz moux yawjraen dan miz Luz Vazdingz caeuq gyoengq doengzsaeh de daenj buh fazgvanh daeuj, couh fajnaj saetmuengh naeuz: “Gvan gou mbouj daeuj ha?” Luz Vazdingz yungh Vahcuengh lwnh de, gyoengqde seizneix dwg daeuj liujgaij cingzgvang, siengj banhfap bang de gaijgez vwndiz.

Mwh Veiz moux ndang youq diegrog dingqnyi Luz Vazdingz yungh Vahcuengh mbanjranz caeuq de gangj, simcingz gaenjcieng yaepyet couh gemj noix, gwnz naj hainduj riu lo. Gangj daengz doeklaeng, Veiz moux yungh Vahcuengh caeuq Luz Vazdingz naeuz: “Go fazgvanh, gou siengj gvaq gij saeh lizvwnh, gvan gou vunz dog ra ngaenz ciengx song boux lwg caeuq vunzgeq, lij aeu ra ngaenz hawj gou yw bingh, gou hix mbouj siengj hawj de baenzneix dwgrengz, hoeng gij bingh gou fanfan foekfoek mbouj onjdingh, bohmeh gou geq lo, ndaw ranz diuzgienh hix mbouj ndei, maqmuengh de anceiq ndei gou.”

Luz Vazdingz youq mwh guh gij hong swhsiengj mbiengj bouxsai Liu moux, Liu moux doiq Luz Vazdingz naeuz, yienznaeuz bohmeh bi’ndwen geq ndangdaej nyieg, gij rap gwnz mbaq naek, hoeng de itdingh haenqrengz hawj mbiengj mehmbwk sim’onj. Doeklaeng ginggvaq lai mbiengj siengj banhfap rom ngaenz ciq ngaenz, Liu moux mboujdan gyau gij ngaenz yw bingh Veiz moux youq yihyen liux, lij mbat dog aeu 15 fanh maenz ngaenz hawj Veiz moux gvaq ndwenngoenz caeuq yw bingh, caemhcaiq gij cienz neix dwg ngoenz lingx saw diuzgaij haenx couh hawj lo.

Aen goj daihsam: Lohfwngz vanq hoi gaijgez cengnauh

“Gij saehcingz vunzlai dangh- naeuz dangngoenz gaijgez ndaej, baenzlawz cungj mbouj louz hawj ngoenz laeng!” Luz Vazdingz youh lwnh aen goj de loh fwngz bae vanq hoi, aen anqgienh cengnauh reihnaz couh sikhaek gaijgez ndei.

Bi 2014 ndwen 6, Vujsenh Yen Dunghyangh Cin miz aen cengnauh reihnaz gvendaengz Liuz moux 1、Liuz moux 2、Liuz moux 3 ndeu. Liuz moux 2、Liuz moux 3 dwg song beixnuengx caen, yienznaeuz song boux de bi- ndwen hung gvaq Liuz moux 1, hoeng gangj daengz baizban, Liuz moux 1 dwg boh’au song boux de, sam boux aenvih reihnaz gvi bouxlawz doxceng mbouj dingz, doeklaeng Liuz moux 2、Liuz moux 3 song boux daengz fazyen dajgauq.

Luz Vazdingz liujgaij gij cingz- gvang aen anqgienh neix le, gibseiz cujciz song mbiengj diuzgaij, yungh Vahcuengh hawj sim caeuq sim liz gyawj, maqmuengh song mbiengj doxnyiengh, vaqgej ngaekngeu ceng- nauh ndeindei bae. “Song daeg lan mwngz bi’ndwen cungj hung gvaq mwngz, roek caetcib bi lo, dangguh boh’au mwngz wnggai naemjnaemj gij hoj song daeg lan, nyiengh ndaej couh lai nyiengh di, hawj gyoengqde sim’onj gvaq nienzlaux ha.” Ginggvaq Luz Vazdingz naihsim gienq, Liuz moux 1 sim hix miz di doengh ndeu, hoeng de maqmuengh yungh gaiq reihnaz wnq caeuq song daeg lan doxvuenh. Luz Vazdingz baez dingq fwt roxnyinh ra raen giz cungbyoengq. Yienghneix de bae ra daengz Liuz moux 2、Liuz moux 3 song boux neix, gangjmingz gij siengjfap Liuz moux 1, youq laj Luz Vazdingz naihsim gienq, song boux de nyienh vuenh reihnaz.

Bi 2014 ndwen 6 ngoenz 27, Luz Vazdingz caeuq vunz bouhmonz doxgven doxcaez daeujdaengz yienh- ciengz cengnauh dag reihnaz. Vihliux vaiqdi gaijgez ngaekngeu cengnauh, Luz Vazdingz raen henz ndang miz doengj mbahoi ndeu, de mbouj goq yungyiemj aiq deng log sieng, sikhaek lohfwngz gaem mbahoi hwnj, yungh daeuj veh sienq. Dag reihnaz veh sienq ca mbouj geijlai song aen cungdaeuz, song ranz vuenh reihnaz ndaej baenz, anqgienh gaijgez ndaej ndei.

Luz Vazdingz youq gwnz gangjvei guhhong nyinhcaen guhhong, lai baez aeundaej gak cungj mingzdaeuz. Bi 2015 ndaej bingz baenz bouxvunz nienzdoh senhcin Vujsenh Yen Yinz- minz Fazyen, bi 2016 ndaej bingz baenz bouxvunz senhcin “ndwen caephengz” daihngeih fazyen daengx si, bi 2017 ndaej bingz baenz “bouxvunz senhcin hozdung cien- hangh bak ngoenz cingleix anqgienh” fazyen daengx gih, bi 2018 ndaej bingz baenz “bak boux bouxak gangjvei” fazyen gihcwngz daengx gih……