Sam

Caengya baihhaenx yaek guh- laeuj cingj hek lo, Vangz Boh geij beixnuengx caeuq gyoengq lwg de guhdoih bae Namzningz dap feihgih bae Fuzcouh Si.

Feihgih dwg banngaiz 11 diemj 20 faen mbin, Vangz Boh gyoengqde 9 diemj lai couh daengz ndaw ranzcaj feihgih. Miz dieg naengh, seizneix youh bouxboux miz soujgih, caj geijlai nanz cungj mbouj raen mbwq, Vangz Boh daengx ranz vunz cuengq doxgaiq ndei le, bouxboux naengh roengzdaeuj caemz soujgih.

Aen daeh iq dahlwg ndawde cang miz gij “sam gim” gaxgonq de cawx, Vangz Boh daengq de naeuz aen daeh neix beij mingh lij naek, itdingh mbouj ndaej liz ndang.

Aen daeh iq neix mbouj naek, gij doxgaiq ndawde naek, ngaenzcienz naek, cingzngeih hix naek, ngoenzcog okhaq noix mbouj ndaej gij doxgaiq neix.

Lij miz buenq diemj cung he couh daengz seizgan hwnj feihgih lo, mehyah Vangz Boh naeuz bouxlawz yaek bae oknyouh okhaex couh vaiqdi bae, mboujnex yaep dem hwnj feihgih le mbaet haex nyouh couh sinhoj lo.

Doenghbaez okdou yaek byaij roen gyae, Vangz Boh gig noix gwn raemx, naengh ruz dap ci cungj mbouj you miz haex miz nyouh, hix mbouj rox yienghneix doiq ndangdaej ndei mbouj ndei, fanjcingq Vangz Boh cungj gag roxnyinh yienghneix ndei, lumj seizneix de couh mbouj yungh sai simgei bae ra diengzhaex lo.

Daengz seiz hwnj feihgih lo, vunzhek bouxboux rag sieng aemq daeh coh bakdou hwnj feihgih haenx byaij bae, seizneix, dahlwg cam miz bouxlawz dawz aen daeh iq de mbouj miz. Vangz Boh naeuz de mbouj dawz, mehyah Vangz Boh naeuz mbouj dawz, dahcej hix naeuz mbouj dawz, gij doxgaiq gaen ndang daiq bae cungj raen, couh dandan aen daeh iq haenx mbouj raen lo.

Vangz Boh doiq dahlwg naeuz:“Aen daeh iq haenx mbouj dwg itcig mwngz gag dawz ha? Dwg mbouj dwg haxbaenh mwngz bae oknyouh seiz lumz ce youq ndaw diengzhaex lo?”

Dingq daxboh yienghneix gangj, dahlwg sikhaek baenq ndang buet haeuj ndaw diengzhaex bae ra, yaep ndeu, de naj hau naj henj okdaeuj, baegfofo yaek daej naeuz:“Haxbaenh gou bae oknyouh, dawz daeh iq duet roengzdaeuj hoij youq gwnz ciengz, okdaeuj seiz lumz dawz hwnj ndang lo, seizneix bae ra gaenq mbouj raen lo.”

Aen seiz neix oksaeh, baenzlawz guh? Vangz Boh daengx ranz vunz bouxboux doeksaet yat caez, bouxboux youq mbouj onj ndwn mbouj an, bouxboux cak lumj duzndwen cak ndit nei. Hwnj feihgih seizgan yaek daengzsadsad, Vangz Boh 8 boux youq ranzcaj feihgih ndawde buet hwnjdaeuj, nyangz vunz couh cam. Cam bouxbaetranz, bouxbaetranz naeuz mbouj raen; cam bouxdwk- raemx, bouxdwkraemx naeuz mbouj rox. Gyoengqde giz gungx giz gox cungj ra doh, daeh iq dahlwg cungj mbouj raen ngaeuz.

Dahlwg muengz bae bauqgingj, gingjcaz nai naeuz:“Mbouj youqgaenj, seizneix dauqcawq miz genhgung, bouxwnq aeu mbouj ndaej nanz, sou ansim cajcaj.” Gangj dwg baenzneix gangj, hoeng Vangz Boh gyoengqde cix ansim mbouj ndaej, gyoengqde naengh mbouj ndaej roengz, bouxboux simgip lumj feiz remj ndang nei.

Miz boux hek he doiq Vangz Boh naeuz:“Sou bae fuzvudaiz cam fuz- vuyenz yawjyawj, lauheiq miz vunz gip ndaej le gaenq dawz bae daengz gizde ce lo.”

Dahlwg baez dingq couh guh- muengz buet gvaqbae, Vangz Boh daengx ranz vunz youq laeng hix cungj buet gvaqbae.

Dahlwg yienghneix yienghneix dawz saeh baedauq lwnh hawj fuzvuyenz nyi, dahsau fuzvuyenz he vix dahsau daenj buhndaem ndwn youq henz daiz haenx naeuz:“Haxbaenh dah sau neix gip ndaej aen daeh iq ndeu gyau daeuj hawj dou, mbouj rox dwg mbouj dwg aen daeh duh mwngz. Ndaw daeh mwngz doek cungj miz maz doxgaiq, mwngz lwnh okdaeuj yawjyawj.”

Dahlwg naeuz ndaw daeh de doek miz gijneix gijneix, dahsau gip ndaej daeh haenx dingq le, iet linx youh doeksaek naeuz:“Mbwn ha, gou caen siengj mbouj daengz gip ndaej aen daeh baenzneix naek, gou caen siengj mbouj daengz miz ngoenz he gou gingqyienz gip ndaej baenzlai gim!”

Dahsau naeuz de dwg vunz Fuzcouh Si, seizneix youq Namzningz Si guhhong, yaep dem hix naengh feihgih dauqbae Fuzcouh Si yawjyawj bohmeh.

Vangz Boh danq ngoenzneix caen dwg ngoenzndei nyangz vunzndei lo, cien docih fanh docih mbouj rox aeu maz doxgaiq daeuj boiz gij cingzngeih dahsau neix. Vangz Boh dawz cien maenz ngaenz he okdaeuj ndenq hawj dahsau, naeuz:“Mbouj rox aeu maz boiz aen sim ndei mwngz, aen sim mwngz beij gim lij bengz, beij gim lij ndei, neix dwg di sim’eiq ndeu, muengh mwngz sou roengzdaeuj.”

Dahsau riuriu naeuz:“Ngaenz couh mbouj aeu lo, bouxlawz bungz daengz gij saeh neix hix dwg yienghneix guh, raeuz lij dwg vaiq bae hwnj feihgih ba, mboujnex ganj mbouj gib lo.”

Dahsau rox dahlwg Vangz Boh yaek okhaq, hoh geij coenz vah ndei le, couh coh bakdou hwnj feihgih haenx buet bae, nyup byoem raez de youq baihlaeng de bi bae bi dauq, aen ngaeuz de caen gyaeundei.

Seiq

Caengya ranz youq bien haij, gyae’gyae couh mup daengz gij heiq bya heiq gungq ndaw haij, gizneix laeuz sang aen rangh aen, ndaw haw faex loeg va angj, gwnz roen gwnz gai cungj dwg seuqfwtfwt.

Doiqnaj ranz caengya mbouj geij gyae couhdwg daihhaij, haij gvangq- lieglieg, raemxhaij heuauau, bakdou siujgih caengya guh aen dougungj saekhoengz ndeu, gwnz dou sij miz “angqhoh ××× ××× doxaeu” geij cih saw hung, vunz ndaw siujgih haeuj- haeuj okok cungj rox dwg bouxlawz bouxlawz doxaeu gienh saeh neix. Miz aen dougungj neix, siujgih bienq ndaej angqyangz youh miz cingzngeih, raen daengz aen mingzcoh dahlwg sij youq gwnz dougungj, Vangz Boh fwt roxnyinh aen dou neix couh lumj daegdaengq guh daeuj angqcoux gyoengqde daeuj daengz nei, dieg bonjfaenh vunz doxaeu caengz baenz- neix guh gvaq, Vangz Boh roxnyinh sim raeujrubrub, miznaj dangqmaz.

Dingq vunz gizhaenx naeuz, dieg gyoengqde miz vunz doxaeu, siujgih cungj youq bakdou guh aen dougungj yienghneix. Siujgih miz geijlai aen bakdou couh guh geijlai aen dou- gungj, doxaeu dwg saeh angq, yienghneix guh gaenq baenz gij sibgvenq dieg haenx.

Daeuj daengz ranz caengya, song ranz vunz doxcam doxnai geij coenz le, caengya couh heuh Vangz Boh gyoengqde haeuj daiz bae gwn doxgaiq.

Gwnz daiz baij miz 8 aen vanj, ndaw vanj cang miz raemxdang caeuq sam、 haj aen gyaeq dumq yienghneix, caengya heuh gij doxgaiq neix guh danggyaeq, dang dwg aeu dangznding cawj baenz, it boux it vanj. Mbwn ha, Vangz Boh youq ranz ndwen he hix mbouj gwn daengz song aen gyaeq dumq, bingzseiz yaek gwn gyaeq, mbouj dwg cien couhdwg cawj dang cij gwn, seizneix aeu baez ndeu gwn 5 aen gyaeq dumq, aeu mingh lo, gyoengqde bouxboux cim doxcoh riu dwk, mbouj gamj roengz dawh.

Caengya raen Vangz Boh mbouj doengh dawh, couh naeuz:“Cang dwg cang baenzlai, sou mbouj gwn sat hix mbouj youqgaenj, dwk bak couh gwn lai di, mbouj baenz gwn couh cimzcimz.”

Caengya mbouj gwn, gyoengqde mizmbangj naengh mizmbangj ndwn youq bien daiz yawj Vangz Boh gyoengqde gwn. Caengyameh naeuz:“Sou mbouj rox, youq dieg dou miz haujlai sibgvenq, lumj yaek aeu boux bawx ndeu, ngaenzlaex ceiq noix aeu soengq sam seiqcib fanh maenz, ceiq lai soengq haj roekcib fanh, miz mbangj vunz aeu laex sang daengz 80 fanh bae. Aeu dahlwg Guengjsae guh bawx caen ndei, ngaenzlaex cungj mbouj aeu, ndaej caeuq sou guh caen dwg mbwn soengq hawj dou, aen sim sou beij gim lij dij cienz bw!”

Caen dwg gag dieg gag miz goj, gag coj gag miz laex. Vangz Boh mbouj oksing, ndawsim gag naemj: Yienznaeuz gou miz song dahlwg, hoeng caeklaiq vunz Guengjsae dou mbouj miz gij sibgvenq neix, mboujnex dahlwg gou daengz seizlawz cij haq ndaej okbae?（sat）