Gou ngamq ciep vunz guenj aen ban ndeu, baez daih’it bae hwnjdangz, couh fatyienh ndaw ban Siujcouh hwnjdangz mbouj ciensim, gyaez gauj siujdungcoz mbouj duenh. Yienghneix gou byaij daengz henz ndang Siujcouh, lumhlumh aen’gyaeuj de, laeglemx naeuz de nyinhcaen dingq goq. Siengj mbouj daengz gou aen hengzdoengh neix, yinx gyoengq hagseng wnq cungj ndaq Siujcouh.

“Lauxsae, Siujcouh hwnjdangz cungj mbouj haeujsim, maij loengh fwngz.” “De guh cozyez mbouj ciuq- seiz guhsat, gaujsi coengzlaiz mbouj gizgwz.” “Lauxsae, de baklai, hawj de gag naengh ba.” Daihgya cungj gangj Siujcouh mbouj ndei, lumjbaenz Siujcouh dwg “duzmax haih doih” ityiengh, caiq yawj Siujcouh, de mbouj oksing mbouj gangjvah, boemzbub lwgda, lwgfwngz mbouj dingz nu naenx gokbuh. Gou siengj, moix boux hagseng majhung cungj miz menh miz vaiq, hojnaengz Siujcouh ciepsouh lai menh di. Ndigah youq ndaw saedceij ndawde, gou dinghdingh gvansim de.

Miz ngoenz ndeu cuengqhag, gou cingq roengz laeuz, Siujcouh sawqmwh daj baihlaeng mauhgvaq gou, gip- muengz roengz laeuz bae, “Lauxsae caiqraen.”De dongx gou. De buet ndaej gig vaiq, gou mumjgyumq raen ndaw aendaeh henz daehsaw de, miz aen bingzraemxmboq ndeu, ndawde cang miz gij raemx haunyai.

Gou haenq sing heuh de, cam:“Siujcouh, ndaw bingz cang gijmaz ha?”

“Cang cijvaiz.” De doq buet doq han.

“Yo, mwngz vihmaz mbouj gwn cijvaiz ne?” Gou ngeizvaeg le couh cam.

“Dawz dauqbae hawj daegnuengx gou gwn.” De han naeuz.

Gou sawqmwh mizdi gamj- doengh, Siujcouh miz gezdenj caiq lai, de ceiq noix miz aen youhdenj ndeu, couhdwg caensim gyaez daeg- nuengx, gou lumjbaenz ra ndaej le giz hainduj gaijbienq de.

Haet laeng, gou daegdaengq dangqnaj vunzlai cam Siujcouh:“Hagdangz fat cijvaiz hawj moix boux vunz, mwngz mbouj gwn cungj dwg louz hawj daegnuengx ha?”

“Dwg ha, moix ngoenz gou cungj daiq baema hawj daegnuengx gwn.”Siujcouh mizdi mbouj ndei eiqseiq naeuz.

“Mwngz caen gyaez daegnuengx, dwg daeggo ndei. Mwngz dwg daeggo ndei, hix itdingh ndaej dang boux hagseng ndei, lauxsae saenq mwngz.” Gou riu naeuz.

Siujcouh riu dwk mizdi naj- nyaenq, seizneix gou cazyawj gij fanjwngq gyoengq hagseng wnq, gij lwgda gyoengqde daj ngeizvaeg cugciemh bienqbaenz haenhndei, gou siengj wnggai dwg doiq Siujcouh yawjfap mizdi gaijbienq.

Cingqngamj ngoenzde lajbyongh- ngoenz miz boux hagseng ndeu mbouj gwn cijvaiz, soengq hawj gou, gou mbouj gwn, cix caegcaeg heuh Siujcouh daeuj daengz baihnaj gou, sing daemq naeuz:“Siujcouh, gwn faenh cijvaiz mwngz bae, bingz cijvaiz neix mwngz daiq baema hawj daegnuengx mwngz gwn, ngoenzcog geiqndaej daiq bingz dauqdaeuj bw.” Siujcouh ngaekngaek gyaeuj, ciep gvaq bingzcijvaiz oet roengz ndaw daehsaw bae, de mbouj gangj docih, hoeng gou roxnyinh daengz de docih gou.

Youq ndaw saedceij, cijaeu miz gij cijvaiz lai okdaeuj haenx, gou cungj caegcaeg louz bingz ndeu hawj Siujcouh daiq baema, ngoenz daih- ngeih dawz bingz dauq, de mizseiz daiq miz geij aen lwgmaenz roxnaeuz geij faek haeuxyangz hawj gou, gou cix gaemdawz gihvei cam de guh cozyez baenzlawz yiengh, bang de genjcaz cozyez, dazyinx de coihgaij cozyez. Yienghneix doxgyau roengz- daeuj, gou caeuq Siujcouh gvanhaeh yied daeuj yied ndei, de bienq ndaej ndiepgyaez hagsib lo, cozyez cizlieng onjbouh daezswng, gou ciengzseiz youq gwnz ban haenh de. Souh gou yingjyangj, gij doengzhag de hix hainduj doiq de miz yawjfap ndei lo.

Miz gienh saeh ndeu sawj gou geizheih, baez hwnjdaiz aeu bak gangj faenzcieng, Siujcouh boux daih’it cawjdoengh yaengx fwngz hwnjdaiz gangj, de mizdi gaenjcieng, itmienh gangj itmienh yawj gou. Gou youq mbiengj ndeu riunyumnyum yawj de, youq mwh de gangj mbouj roengzbae haenx coengh mbat ndeu, de cungj- suenq gangj sat lo. Mboujguenj gangj ndaej baenzlawz yiengh, hix suenq dwg bien faenzcieng bakgangj caezcingj ndeu lo, de ngoenzneix rox cawjdoengh hwnj daiz bae baijyienj swhgeij, gaenq dwg ngeix mbouj daengz, gou coh de daengj hwnj lwgfwngzmeh.

Seizneix gou daegbied maq- muengh Siujcouh gvaqlaeng biujyienh lai ndei dem, “Siujcouh, mwngz itdingh mbouj hawj gou saetmuengh.”Gou youq ndawsim gag niemh.