Seizciet hawxsij daeujdaengz, mbwn dauq raeuj, doenghgo dokngaz, cingqdwg seizciet ndei guh seizcin dajndaem, vunzguhnaz youq gyang reih gyaeuj naz hainduj nyaengq hwnjdaeuj. Ginhsiu Yauzcuz Swciyen fwngz ndeu gaemmaenh yawhfuengz gaemhanh binghraq, fwngz ndeu cagaenj guhhong, vih daengx bi canjnieb hwngfat、vut gungz gunggeng、vunzlai demsou guh ndei giekdaej, guh ndei haidaeuz, bangrengz lajmbanj saenqhwng.

Geij bi neix daeuj, vih dwk ndei ciengzciengq canjnieb banggungz neix, Giuhsiu Yauzcuz Swciyen baengh gij swhyenz ndei diegbya、diegndoeng lai, giethab aen canloz lajmbanj saenqhwng, vih vunzlai gungzhoj daezhawj dieg souhaeuj onjdingh, youq gij giek cungdenj dajcauh “5+2” canjnieb daegsaek, haenqrengz hwngfat dajndaem youzcaz caeuq ywdoj, okdaiz mizgven gikcoi cwngcwz, maeuzveh yungh 3 bi hwngfat youzcaz、ywdoj gak 10 fanh moux.

(Gauh Yuzginh/高如金)