“Aeu dingq dangjcwng dazyinx guh, mbouj guh vahgyaj mbouj cienz gyaj; daengx guek yiemzfuengz binghdoeg lah, hoenxhingz binghdoeg gvaq ngoenzndei.” Ndwen 2 ngoenz 20 banhaet, youq Lozcwngz Mulaujcuz Swciyen Swbaj Cin, aendoih gwed geizdangj, rag aen yaemsieng, dawz vahdoengz ndeu, ciengq fwen bae gak mbanj henzgyawj cunz. Sing fwen goksasa yinx ndaej haujlai vunzmbanj haeujgyawj dingq.

Aendoih fwen neix yienzlaiz dwg aendoih diuq fouxgvangjcangz Swbaj Cin Dimwnz Cunh, aenvih binghraq yingjyangj, seizneix mbouj ndaej diuq fouxgvangjcangz lo, vihneix gyoengqde gag bien gag yienj fwen fuengz raq, yungh fwen daeuj senhconz gij cihsiz fuengz raq. Fwen dwg gij vwnzva Mulaujcuz, hix dwg gij soujduenh youqgaenj gaxgonq gyoengqde yungh daeuj cienzndenq saenqsik.

“Yungh fwen daeuj senhconz fuengz raq, gou nyinhnaeuz ndei dah- raix. Haujlai vunzgeq ndawmbanj mbouj rox saw, hoeng gyoengqde dingq rox fwen, hix geiq ndaej neiyungz, miz- mbangj lij rox ciengq dem, gyoengqde haengjgyaez dangqmaz.” Vunzmbanj Dimwnz Cunh Liu Sidenz haenh aen- doih fwen neix naeuz. Caeuq fat mbaw dan senhconz doxbeij, fwen fuengz raq ndeidingq youh hawj vunzlai haengj- gyaez, vunzlai cungj gyaez dingq, mizmbangj lij doiq fwen dem, mboujdan ndaej cienz gij cihsiz fuengz raq hawj gyoengq vunzgeq, lij hawj mbanjbya Mulauj aenvih binghraq caemrwdrwd haenx gyalai haujlai nauhyied.

(Vuz Meijyungz Cinz Yenzdauh/吴美蓉 陈元涛)