Hawj gunghminz minzcuz vunz- noix hengz gij gienzleih yungh vah minzcuz bonjfaenh dajgauq, hawj lwgminz Mbanjcuengh youq moix aen swhfaz anqgienh roxnyinh daengz goengbingz cingqngeih, hawj gij ndit swhfaz raeuj daengz dieg minzcuz lajmbanj bae. Neix dwg gij caensaed “fazgvanh Cuengh Gun song cungj vah” gih raeuz gamj rap caenguh、gamj cauhmoq fugsaeh vunzlai laj- mbanj.

Miz boux fazgvanh “ban 86” laeng baenzneix ndeu, de caprag lajmbanj, gvansim Mbanjcuengh, daiq aendoih Vahcuengh saemjbuenq gaenxmaenx damqra, cugyamq byaij ok diuz roen Vahcuengh cunzdauq saemjbuenq hab gij saehsaed minzcuz Ginhbwz Gih caemhcaiq gig miz daegsaek Mbanjcuengh ndeu.

De dwg boux fazgvanh yenzngeg song cungj vah Ginhcouh Si Ginhbwz Gih Yinzminz Fazyen、boux fucwz Dasw Yinzminz Fazdingz Lij Ginh- cwngz.

Caprag lajmbanj: Damqra gij vunqsik Vahcuengh saemjbuenq daplaeb diuz giuz song cungj vah ngaeudoeng

Bi 2014 ndwen 9, Lij Ginhcwngz daj Bwzhaij Si Hozbuj Yen Yinzminz Fazdingz senjdiuh daengz Ginhcouh Si Ginhbwz Gih Yinzminz Fazyen Dasw Yinzminz Fazdingz guhhong.

Dasw Yinzminz Fazdingz guenj Dasw、Daciz、Nazmungz、Gveidaiz seiq aen yanghcin, diegguenj gyaeujvunz daengz 31 fanh vunz, ndawde gyaeuj- vunz Bouxcuengh ciemq 70% dox- hwnj, dwg Ginhcouh Si dieg cujyau comzyouq Bouxcuengh, Vahcuengh dwg vah doxgangj cujyau dangdieg. Vih engq ndei gvancez guekgya minzcuz cwngcwz, doed ok gij banhfap bienhleih lwgminz ciuq daegsaek swhfaz、damqra hab dieg minzcuz daegdiemj, Ginhbwz Gih Yinzminz Fazyen youq gij giek sawqdiemj damqra cingqsik youq bi 2017 ndwen 3 ngoenz 28 youq Dasw Yinzminz Fazdingz daiqdaeuz laeb aen faz- dingz cunzdauq Vahcuengh Guengjsae caiqlij daengx guek aen nduj.

“Gou dwg vunz Fangzcwngzgangj Si, vahmbanj gou hix dwg Vah- cuengh, yaem caeuq Vahcuengh bonjdieg Ginhbwz Gih mbouj ca geijlai, doxgangj ndaej.” Daj laeb- baenz aen fazdingz cunzdauq Vah- cuengh doxdaeuj, Lij Ginhcwngz cungfaen fatok gijndei vah ndang- gaeuq, daiq aendoih Vahcuengh saemjbuenq youq mwh guhhong Vahcuengh cunzdauq saemjbuenq gaenxmaenx damqra、mbeihung cauh- moq, ginggvaq song bi lai saemjbuenq saedguh, cugyamq damqra ok aen vunqsik Vahcuengh cunzdauq saemj- buenq hab gij saehsaed minzcuz Ginhbwz Gih caemhcaiq gig miz daegsaek Mbanjcuengh ndeu.

Seizneix, Ginhbwz Gih Yinzminz Fazyen gungh miz 5 boux fazgvanh Cuengh Gun song cungj vah, gyoeb- baenz haj aen doih Vahcuengh saemjbuenq, vih gaijgez gij vwndiz vunzlai lajmbanj dajgauq roen gyae, aen fazyen neix lij youq mbanj、gihveijvei laeb miz aen funghranz guhhong fazgvanh, daiqdaeuz aeu song cungj vah saemjbuenq ietraez daengz cunhveijvei、mbanj, hawj gij ngaek- ngeu cengnauh vunzlai youq bakdou ranz couh ndaej gaijgez.

Dingjmaenh cingqngeih: Song vah gangj fapleix song din cunz minzcingz

“De guekgya swhfaz gaujsi gauj ndaej 454 faen, dou haenh de dwg boux ‘hag ak’, lijlun suijbingz haemq sang caeuq saemjbuenq saedhengz gingniemh fungfouq.”Ginhbwz Gih Yinzminz Fazyen fazgingj Dwng Vanhoz lwnh gicej, Lij Ginhcwngz dwg ciennieb hag faplwd, gwnz aen daiz guhhong de cawz vwnzgen le, lij daeb miz haujlai saw faplwd, de cungj dwg giengzdiuh aeu mbouj dingz hagsib vuenhmoq faplwd cihsiz cij ndaej riengz hwnj yamqdin seizdaih.

Gicej roxyiuj daengz, Lij Ginh- cwngz banhleix anqgienh soqlaiz mbouj lujlaj roengz gietlwnh, gietlwnh okdaeuj le lij fanfoek lwnhcingq, ceng’aeu caenh rengz ndanggaeuq, hawj boux dajgauq hingz rox cingcing cujcuj, hawj boux dajgauq saw sim fug bak fug bae, youq bi 2019 ndwen 1 miz aen anqgienh mouseng dai yinxfat habdoengz gaicawx cengnauh ndeu,bouxdenggauq Nungz moux dajgauq saw le mbouj roxyiuj, daiq geij boux baengzyoux caez bae fazdingz ra Lij Ginhcwngz fazgvanh aeu gangjfap, simcingz gikdoengh raixcaix. Lij Ginhcwngz yiedcingz cingj gyoengqde haeuj funghranz diuzgaij, caemhcaiq aeu mbawsaw buenqgiet caeuq mizgven faplwd gvidingh okdaeuj, ciuq anqgienh nyinhdingh saedsaeh、soucomz baengzgawq、buenqgiet yienzaen、faplwd habyungh caeuq saemjbuenq cwngzsi yungh Vah- cuengh gejgangj hawj Nungz moux, caemhcaiq baenz aen baenz aen vwndiz gejdap hawj gyoengqde. Couh yienghneix fanfoek yungh Vahcuengh gejgangj faplwd diuzvwnz, mboujdan Nungz moux roxyiuj le gij yienzaen dajgauq saw, baengzyoux caeuq Nungz moux caez daeuj haenx hix roxyiuj lo. Doeklaeng, Nungz moux naeuz fug lo caemhcaiq dangciengz aeu gij cienz mbawsaw buenqgiet gvidingh haenx hawj, anqgienh ndaej gietsat lo.

Bi 2018, Lij Ginhcwngz gungh banhleix anqgienh 253 aen, saemjgiet 253 aen, gietanq cingzsoq 100%, youq ndaw anqgienh buenqgiet gietanq dan miz 75 aen, anqgienh mbouj miz saek aen loekca.

Lij Ginhcwngz lij roengzrengz raiz mbawsaw caizbuenq, gyaepgouz mbawsaw caizbuenq siengjfap yiemz- maed, doengsug rox ngaih, mbawsaw buenqgiet minzsaeh (2015) Ginhbwz minzcuhsw daih 28 hauh de raiz haenx ndaej bi 2016 daengx gih fazyen mbawsaw caizbuenq maenh- ndei sam daengjciengj; mbawsaw caizbuenq (2018) Gveiq 0703 minzcuh 118 hauh ndaej bingz baenz bi 2019 daengx gih “bak bien mbawsaw caiz- buenq maenhndei”. Aenvih guhhong ndei, de lij youq bi 2019 ndaej bouxvunz sam daengjgoeng.

Ginhcouh Fazyen：Laebdin aen fazdingz cunzdauq Vahcuengh swhfaz vanq nditrongh

“Geij bi neix daeuj, aen fazyen dou yungh cauhmoq、hezdiuz、saekloeg、hailangh caeuq giemhaw huzndei、saemjbuenq siujsim、simndei leixniemh guh dazyinx, baengh minzcuz cwngcwz dangj, yungh bienh minz leih minz、gaijgez cengnauh guh moegbiu, laeb aen fazdingz cunzdauq Vahcuengh, haiguh baenzroix hong Vahcuengh saemjbuenq caeuq swhfaz fugsaeh miz daegsaek, aeundaej ndawbiengz yaugoj ndei, hix ndaej daengz gihgvanh gaep baihgwnz caeuq ndawbiengz gak gyaiq haenh.” Ginhbwz Gih Yinzminz Fazyen dangj- cuj suhgi、yencangj Cauz Gozhingh gaisau naeuz.

Cauz Gozhingh naeuz, Ginhbwz Gih Yinzminz Fazyen aeu hong Vahcuengh cunzdauq saemjbuenq dangguh aen gunghcwngz diemjrongh ndeu, mboujduenh giengzvaq gij ligdoh hong aen hangh neix, cwngcwz nyenggonz gungganq fazgvanh song cungj vah, yawjnaek hwnjguh aendoih vunzcaiz, goengrengz doxgaiq boiq- hawj caeuq dakdaih nyengqgonz coh aendoih song cungj vah, dajcauh gij vanzging guhhong ndei.

Ginhcouh Si Cunggaep Yinzminz Fazyen dangjcuj suhgi、cwngcibu cujyin Cinz Leiz naeuz, daj binggeq song cungj vah “Laujsuh”daengz bouxcoz Lij Ginhcwngz, Dasw Yinzminz Fazdingz itloh aeu song cungj vah saemjbuenq dangguh gij dieg caphaeuj coihawj minzcuz doxgiet cinbu, lai soujduenh lai bouhmonz lienzhab doidoengh, guh- hong cingzcik yienhda, aen fazdingz neix hix baenz dieg Ginhcouh Si Cunggaep Yinzminz Fazyen gungganq vunzcaiz song cungj vah. Cinz Leiz naeuz, youq coglaeng guhhong, Ginhcouh Si Cunggaep Yinzminz Fazyen yaek caenh’itbouh gyagiengz sonyinx Ginhbwz Gih Yinzminz Fazyen, guhndei aen gihci guhhong caeuq aen gihci gikcoi, aeu hwnjguh aen fazdingz cunzdauq Vahcuengh Dasw guh baenz dieg guhyiengh aen fazdingz cunzdauq Vahcuengh Guengjsae, cungfaen fatok gij cozyung Vahcuengh saemjbuenq, hawj gij nditrongh swhfaz ciuq ndaej engq gvangq, raeuj sim lwgminz Mbanj- cuengh.