It

Dahlwg naeuz caengya baihhaenx hawj sam fanh maenz ngaenz hawj de bae cawx goenhgim、soijgim caeuq haedfwngzgim, naeuz dieg gyoengqde baenz gvenq, yaek coux bawx couh aeu hawj bawx moq soengq gij doxgaiq neix, heuhguh soengq “sam gim”.

Vangz Boh cojcoeng geijcib daih roengzdaeuj cungj dwg vunz guh reih guh naz, bi miz haeux gwn imq daengz haemh suenq dwg ceiq ndei gvaq, mbouj gangj gim gangj ngaenz.

Gaxgonq Vangz Boh lij iq seiz, de dingq daxgoeng gangj naeuz gim dwg saekhenj, gim youq ndaw laep lij rox fat rongh, gig dij ngaenz, gig nanz ndaej. Gim mbouj dwg bouxlawz naemj miz couh miz, bouxlawz naemj aeu couh aeu.

Dingqgangj ciuh coj Vangz Boh miz goeng he, ngoenz ndeu de bae guh hong, youq gwnz roen bungz daengz duz ngwzhau ndeu, goeng neix gaen duz ngwzhau daeuj daengz aen gamj ndeu le, duz ngwzhau couh mbouj raen lo, cij raen aen lauqmeng he youq doiqnaj. De guhmuengz hai aeu lauqmeng daeuj yawj, ndaw lauqmeng cij miz geij gyoq danqndaem.

De dauqranz le dawz gienh saeh neix lwnh hawj vunzlai ndaw mbanj dingq, vunzmbanj bouxboux vih de doeknaiq. Vihmaz ne? Gyoengqvunz naeuz, goeng laux dwg bungz daengz ngwzgim lo, de mbouj rox guh, gij gim haenx cij bienqbaenz danqndaem. Miz vunz naeuz bungz daengz ngwzgim, wnggai gaej hai aen lauqmeng haenx, sien dauqranz aeu laeuj aeu noh bae baiz, cang yieng gingq laeuj, caiq gvih roengz baiq sam baez le cij ndaej hai lauqmeng, yienghneix gij gim haenx cij mbouj rox bienqbaenz danqndaem. Aen goj neix couhdwg naeuz, gim gig nanz ndaej, gim aeu ndeindei bae gingq cij ndaej.

Vangz Boh gig muengh miz saek ngoenz de hix ndaej bungz daengz duz ngwzhau ndeu, baenzneix de itdingh aeu laeuj aeu noh bae gingqgingq aen lauqmeng cang gim haenx, yawjyawj caen mbouj caen miz gim. Hoeng, muengh gvaq buenq ciuh vunz, Vangz Boh daengz seizneix lij caengz raen gim gvaq, dingqnaeuz seizneix miz gim gai, miz ngaenz couh cawx ndaej, Vangz Boh mbouj miz ngaenz, baenzlawz bae cawx gim, de hix caengz cawx gim gvaq, hix mbouj rox cawx gim daeuj guh maz. Seizneix dahlwg aeu yungh sam fanh maenz ngaenz bae cawx gim, Vangz Boh doeksaet caemhcaiq geizheih, siengj mbouj doeng.

Vangz Boh naeuz:“Raeuz daengx ranz vunz sinsin hojhoj guhhong, mbaet gwn mbaet yungh daengz seizneix ndawranz cij rom mbouj ndaej sam fanh maenz ngaenz. Mwngz baez okhaq neix couh baez ndeu sai sam fanh maenz bae cawx gim, dij ndaej mbouj dij ndaej bw!”

Dahlwg naeuz:“Ndawranz miz ngaenz mbouj itdingh miz gim, ndawranz miz gim itdingh miz ngaenz, ngaenz yied cuengq roengzbae yied mbouj dij cienz, gim yied cuengq roengzbae yied dij cienz. Boh mwngz naeuz vihmaz boux miz ngaenz cungj bae cawx gim, miz gim ndawranz mbouj you goem goek, gim seizseiz cungj dij cienz. Caiq gangj seizneix vunz soengq ngaenz heuh cawx gim, baenzlawz mbouj cawx ne?”

Gyoengq lwgnyez seizneix caeuq gyoengq bouxgeq naemjfap couh mbouj doxdoengz lo, cij ndaej caih gyoengqde lo.

Vangz Boh gag naemj: Caj dahlwg ngoenz lawz bae cawx gim, de aeu bae cawx noh daeuj baiz, aeu yieng daeuj cang, aeu laeuj daeuj gingq, caen lau gij gim cawx daeuj haenx bienqbaenz danqndaem, aenvih gim gig nanz ndaej.

Haemh ndeu, gwn caeuz sat, dahlwg dawz sam aen hab nding okdaeuj, baez aen hab baez aen hab hai daeuj hawj vunz ndawranz yawj, ndaw hab goenhgim、soijgim caeuq haedfwngzgim, aenaen henjrwgrwg, seizneix daengx ranz vunz cij saenq dahlwg caen cawx ndaej gim lo, gij gim neix couhdwg caen gim.

Ngeih

Dahlwg bineix yaek okhaq lo, boux daegyoux de dwg vunz Fuzgen Swngj Fuzcouh Si. Ngoenz ndeu, caengya gvanbaz caeuq gyoengq lwgmbwk ranz de 5 boux vunz caenndang daeuj daengz ranz Vangz Boh bauq ngoenzndei.

Bouxcuengh cungj dwg maij bouxhek, bouxhek daj gyae daeuj daengz cungj aeu ndeindei ciepdaih. Vangz Boh ndawsim angqvauvau, youh gaj bit youh gaj gaeq, noh mou noh bya loengh daiz byaek rimmbwtmbwt ndeu daeuj ciepdaih caengya gyoengq ranz vunz.

Gwn caeuz seiz, gyoengq caengya cungj mbouj gwn geijlai byaek, noh bit noh gaeq engq mbouj miz geijlai boux gwn, caengyagoeng naeuz mbouj dwg mbouj aeueiq Vangz Boh, dwg dieg gyoengqde gig noix gwn noh, bingzseiz couh gwn di bya、gungq、baeu gij doxgaiq ndaw haij neix, lumj daiz byaek neix caen gwn mbouj gvenq, daegbied dwg gij noh bit noh gaeq ronq hau haenx, bi daengz haemh gyoengqde cungj mbouj gwn gvaq. Gyoengqde naeuz nyaij youq ndaw bak mbouj miz feih, gwn mbouj roengz hoz.

Vangz Boh raen ndeiriu, gag naemj: Baenzlawz miz cungj vunz ndeu、miz aen dieg ndeu mbouj maij gwn noh ni? Dou song donq mbouj miz noh gwn couh dungx get da raiz, guhhong mbouj miz rengz. Caen mbouj rox gyoengqde mbouj gwn noh baenzlawz ndaej lix roengzdaeuj!

Cawj mbouj gwn cawj ged, hek mbouj gwn hek bamz, mboujguenj gyoengqde gvenq mbouj gvenq, mbouj leixlangh gyoengqde maij mbouj maij gwn, Vangz Boh daengx ranz vunz ciuq gangj ciuq gwn, hemq saemx hemq sax.

Gwn haeuxcaeuz gvaq le, song ranz vunz cibgeij boux doq gwn caz doq gangjgoj, caengyameh naeuz:“Dahlwg sou couh yaek haq bae daengz ranz dou lo, daj baezneix doxbae, song ranz couhdwg ranz ndeu, lwg dou couhdwg lwg sou, lwg sou hix dwg lwg dou. Coux bawx haq lwg mboujguenj youq seizlawz mboujguenj youq gizlawz cungj dwg saeh hung, raeuz aeu ndeindei doxyaeng, maz guh mbouj deng, maz guh mbouj daengz, aeu song baih ndeindei doxnaeuz, miz maz iugouz couh caenhliengh daez okdaeuj, mbouj yungh najmong. Danghnaeuz dou guh ndaej daengz, itdingh ciuq guh.”

Vangz Boh naeuz:“Dahlwg gou yaek haq bae cien leix fanh loh, dou hix mbouj miz maz iugouz daiq lai, dou hix mbouj miz maz doxgaiq soengq hawj dahlwg, ngoenzndei daeuj daengz raeuz guhdoih gwngwn laeuj, nauhnauh yiedyied baez ndeu couh baenz lo.”

Caengyameh naeuz:“Raeuz ranz ndeu couh mbouj gangj vah song yiemh lo, ciuq dieg dou coux bawx, lailai noixnoix cungj aeu soengq ngaenzlaex, mbouj rox dieg sou baenzlawz sou ngaenzlaex, sou naemj aeu geijlai ngaenzlaex ne? Sou gangj mingzbeg gangj cingcuj le, dou lij aeu seizgan bae bwh ngaenzlaex cij baenz!”

Caengyameh gangj daengz neix, Vangz Boh fwt roxnyinh daengz seizneix gyoengqde aeu coux bawx cix lumj boux gai cwz gai max aeu gangj gyaq nei, ndawsim de gig mbouj cwxcaih. Caiq gangj, vunz Guengjsae coux bawx haq lwg dwg lwgnyez miz sim miz eiq couh baenz, dingzlai vunz mbouj yawj naek ngaenzlaex.

Baenzneix ngeix dwk, Vangz Boh couh gangj lo:“Dieg dou baenz gvenq, mbouj gangj maz ngaenzlaex, sou miz couh seizbienh hawj di guh yiengh couh baenz, mbouj miz couh suenq. Dou mbouj heuh sou hawj, engq mbouj caeuq sou gangj gyaq. Lwg raeuz song boux saedceij gvaq ndaej vannyumnyum, rox hauqgingq bohmeh couh baenz.”

Gvaqlaeng, daegyoux dahlwg hawj 5 fanh maenz ngaenz hawj Vangz Boh, naeuz dwg gij sim’eiq bohmeh de, heuh Vangz Boh mbouj yiemz noix, itdingh aeu sou roengzdaeuj.

Vangz Boh gaem dab ngaenzlaex youq gyang fwngz, mbouj rox gangj maz cij ndei, roxnyinh dab ngaenz neix gig naek, youq dieg bonjfaenh, faenh laex neix gaenq dwg faenh ceiq hung ndeu lo.

（caengz sat）