Duenh seizgan neix daeuj, Yangz Dauh baez roengzban, cungj gyaez boux ndeu bae henz dah youzbyaij gaijmbwq.

Mbwn heuauau, ndithaemh henjgim, unqswnh dwk ciuq doh gwnznamh. Ndaw dah raemx menh- menh coh gizgyae lae bae, seiz mbouj seiz miz saek duz bya diuq ok najraemx daeuj, gwnz raemx doq baenz aen gien baenz aen gien, doeklaeng menhmenh fubfed sanq bae, yied sanq yied gvangq. Haemh- haemh daeuj neix yawj funghgingj, yawj gyoengqvunz byaij bae byaij dauq, yawj seiqlengq va nding faex heu, Yangz Dauh caengz roxnyinh mbwq gvaq, gij simsaeh naekgywg ndawsim de hix ciemhciemh sanq bae caez lo.

Mbouj rox daj seizlawz hwnj, Yangz Dauh raen liz de mbouj gyae miz dahsau ndeu hix ciengzciengz gyaez daeuj henz dah youzbyaij yawj funghgingj. Boux dahsau neix lengjlili, de maij daenj vunj, hoeng saeknaj cix saepsetset, yawj hwnjdaeuj aiq de miz saeh dimz youq ndawsim. Mizseiz Yangz Dauh caeuq dahsau neix song da doxciuq baez le, lwgda baez doxbungq, dahsau neix couh baenq gyaeuj muengh gvaq gizwnq bae lo. Yangz Dauh gig naemj byaij gvaqbae caeuq de dongx saek sing, hoeng, moix baez cungj dwg vah yaek ok bak youh suk roengz hoz bae.

Ngoenz ndeu, dahsau neix daenj geu vunj va hauraez ndeu, gok vunj youq ndaw rumzhaemh mbinfengfeng lumj dahsien roengz lajbiengz daeuj nei, din daenj gouh haiznaeng hau giuj sang ndeu. Yangz Dauh sim diuqbubbub, lumj deng fagcax heh nei, gizsieng aen sim de mbouj roxnyinh youh deng biengjhai lo……

Yenzlaiz, dahyoux Yangz Dauh hix miz gouh haiznaeng hau lumj dahsau neix nei. Yangz Dauh caeuq dahyoux dwg doeg daihhag seiz roxnaj, song vunz daihhag bizyez ra ndaej hong, gwndaenj an’onj le, cingq dajsuenq cingj hek gwn laeuj baeznranz.

Aen mbwn cungj gyaez nyaux- loengh gij vunz mizcingz, Yangz Dauh caeuq dahyoux de liz ngoenz doxaeu cij miz ndwen lai seiz, dahyoux de sawqmwh baenz ciengz binghgip he ciengxlwenx biek de bae lo. Aenvih daiq siengsim, haujlai nanz, Yangz Dauh cungj byaij mbouj okdaeuj, de lumz mbouj ndaej dahyoux. Daj dahyoux mbouj youq le, Yangz Dauh itcig boux ndeu ndang dog, gonqlaeng hix miz geij dahsau doiq de mizeiq gvaq, hoeng, cungj mbouj miz saek dahsau lawz byaij ndaej haeuj ndawsim de gvaq.

Youq gizneix bungz raen boux dahsau soqlaiz caengz doxdongx gvaq neix daenj gouh haiznaeng hau caeuq dahyoux doxdoengz, ndawsim Yangz Dauh fouzfap andingh roengzdaeuj, song da ngaezfwdfwd dinghdingh cimyawj gouh haiznaeng hau dahsau daenj haenx, gij yienghceij dahyoux youh okyienh youq dangqnaj. Dahsau neix hix dinghdingh cimyawj baihlaj, baihnaj couhdwg aen dah laeg, byawz liuh ndaej daengz, de daj aen daengqrin ndwn hwnjdaeuj seiz, baez byad, fwt conj roengz ndaw dah bae.

Yangz Dauh baez raen, doeksaet yat, de caengz naemj ndaej ok dwg maz saeh hawj dahsau neix baenzneix guh, gaenq diuq roengz dah bae gouq vunz lo.

Dahsau neix deng hwk ndaej naj cungj bienq heu caez, daengx ndang mbaeqsubsub saenzdedded:“Gyo- mbaiq mwngz, gyo’mbaiq mwngz, gou mbouj rox youzraemx, caeklaiq miz mwngz, mboujnex gou couh deng raemx dumh dai bae lo. Gyo’mbaiq mwngz!” Yangz Dauh gouq hwnj dahsau neix le, dahsau neix itcig gyo’mbaiq Yangz Dauh.

Yangz Dauh doiq dahsau naeuz:“Mbouj yungh gangj baenzlai ‘gyo- mbaiq’ ne, mwngz ndei di luba, ranz mwngz youq gizlawz, gou soengq mwngz baema ba.”

“Mbouj youqgaenj gvaq lo. Gou haici daeuj ne, gou gag baema couh baenz lo.” Dahsau gangj sat, haici dauqranz bae lo. Yaep ndeu, youq ndaw mokhaemh laepfub couh mbouj raen ngaeuz ciiq de lo.

Dahsau neix lij dwg haemhhaemh daeuj henz dah youzbyaij, miz baez saeh haenx le, de caeuq Yangz Dauh ciemhciemh sugnaj lo. Dahsau lwnh Yangz Dauh nyi, de heuhguh Fu Dingz. Dauhsau couh yienghneix gangjgangj, mbouj gangj geijlai coenz vah wnq, faj naj de cungj saepsetset, nanz ndaej raen de miz riu gvaq. Yangz Dauh cungj roxnyinh miz di geizheih.

Haemh ndeu, Fu Dingz youh beij Yangz Dauh daeuj daengz henz dah gonq, de song da hoengzhwdhwd, gwnz gemj hausek haenx lij venj miz geij ndik raemxda ndongqliklik dem. Yangz Dauh cam de dauqdaej fatseng maz saeh, yienzbonj Fu Dingz cij dwg daejfwtfwt, seizneix baez dingq Yangz Dauh baenzneix gangj, engqgya cuengqsing daej hwnjdaeuj. Yaep ndeu de doq uet raemxda doq naeuz:“Gou seiq neix mbouj miz yw gouq lo, byawz hix bang mbouj ndaej gou.” Gangj sat de nyaenx mbouj ndaej boemz gwnz mbaq Yangz Dauh bae laebdaeb daejswdswd.

Yienznaeuz Yangz Dauh caeuq Fu Dingz mbouj miz maz gvanhaeh, cij dwg roxnaj rox aen coh ndwi, hoeng, yawjraen gij yienghceij sieng- sim Fu Dingz, Yangz Dauh lij dwg roxnyinh miz di sim’in.

Sim vunz mbouj dwg rin guh baenz, raen Yangz Dauh mbouj lumj vunzyak, Fu Dingz dawz gij saeh ndawsim de lwnh okdaeuj lo.

Youq bi lai gaxgonq, daxboh daxmeh Fu Dingz doengzseiz baenz- bingh, ndawranz mbouj miz ngaenz, caencik beixnuengx ndaej ciq cungj ciq caez lo, lij dwg comz mbouj gaeuq cienz yw, de simgip yaek dai. Gunghswh lauxcungj rox le, naeuz ndaej ok cienz bang de. Ngoenzde lauxcungj heuh Fu Dingz bae daengz ndaw ranzbanhgoeng, sing iq cam Fu Dingz:“Gou nyienh ok ngaenz bang mwngz yw bouxlaux, mwngz guh dahyoux gou, baenz mbouj baenz?”

Fu Dingz dingq le, doeksaet caemhcaiq simvuengz, caen ngeix mbouj daengz lauxcungj miz aen sim baenzneix. Lauxcungj youh naeuz guh youx de le, mbouj ndaej caeuq gij bouxsai wnq, hix mbouj yungh bae hwnjban lo, miz dauq ranz hung gvangq he hawj de youq, miz ci hawj de hai haeujok, moix ndwen miz cienz hawj de yungh. Danghnaeuz Fu Dingz riengz de ndaej 10 bi, de couh mbat ndeu hawj Fu Dingz 300 fanh maenz, lauxcungj gangj ndaej lumj guh fangzhwnz nei.

Fu Dingz dingq dwk dingq dwk, mbouj rox baenzlawz guh cijndei, de naemj: Danghnaeuz mbouj dapwngq, mbouj miz ngaenz yw bohmeh, swhgeij gaenq mbouj rox caiq bae gizlawz ciq cienz lo. Danghnaeuz dapwngq, swhgeij saedcaih mbouj nyienh lumj duz roeg deng vunz gaem le dawz dauqdaeuj ciengx youq ndaw roengq nei, baenzngoenz aeu daeuq bouxcawj angqyangz. Caiq gangj, bonjfaenh miz daegyoux gvaq lo, vih le ngaenz caeuq de doxbiek, Fu Dingz guh mbouj ok cungj saeh neix.

Ranz vaih youh deng fwn doek raq. Couh youq seizneix, daegyoux Fu Dingz gingqyienz caeuq de doxfaen lo, songde gaenq doxgyaez doxlienh ndaej 8 bi lo.

Fu Dingz caeuq daegyoux doq gunghcoz doq romcienz soengq dah- nuengx daegyoux doegsaw daengz daihhag bizyez. Seizneix daegyoux lizhai de bae, caen dwg heh aen sim de ha, mehmbwk seiqvunz seizcoz miz geijlai aen 8 bi? Seizneix bohmeh youh doengzseiz baenzbingh haeuj yihyen, Fu Dingz mbouj rox baenzlawz gvaq lo?

Gij saeh neix gaemh ndaej Fu Dingz yaek daimbaet bae, de cijndei daeuj daengz henz dah, caen maq- muengh miz boux he ndaej soengq saenqsim hawj de, soengq di raeujrub hawj de.

Dingq gij goj Fu Dingz le, Yangz Dauh sim naekgywggywg, de doiq Fu Dingz naeuz:“Mwngz dwg dahsau simndei simsoh youh hauqswnh ndeu. Lumz gij saeh gaeuq neix bae ba, gou nyienh caeuq mwngz caez byaij diuz loh seiqvunz raezrang neix.”

Fu Dingz cengq hung doiq da youh rongh youh ndaem de muengh dwk Yangz Dauh.

Yangz Dauh laebdaeb naeuz:“Raeuz song boux ndeindei gaem- fwngz baenaj ba, gou itdingh caensim doiq mwngz, caen mbouj saenq miz maz sinhoj dwg raeuz byaij mbouj gvaqbae.”

Fu Dingz riu lo, bi lai gvaqdaeuj, de baez daih’it riu ndaej baenzneix haisim, baenzneix yiengj.