“Haiguh yawhfuengz gaemhanh doxdaeuj, song sengj gih cungj miz vunz daeuj sonyinx guhhong, vunzlai ndaw mbanj song sengj gih cungj gaenxmaenx guh hwnjdaeuj, itheij roengzrengz guh yawhfuengz gaemhanh binghraq!” Ndwen 2 ngoenz 6, youq Sanhgyangh Dungcuz Swciyen Fuluz Myauzcuz Yangh Fuluz Cunh Mbanjdwnghsai, Fuluz Cunh fucujyin Yangz Cinghnenz naeuz.

Dwnghsai Cunh youq dieg gapgyaiq Gveicouh Guengjsae, dwg aenmbanj cabyouq vunzlai Guengjsae Sanhgyangh caeuq Gveicouh Lizbingz song aen yienh, daengx cunh 263 ranz, ndawde 26 ranz dwg Guengjsae Fuluz Myauzcuz Yangh Fuluz Cunh Mbanjdwnghsai guenj, youq ciengz ciengq laengzhoenx yawhfuengz gaemhanh sinhgvanh feiyenz, Fuluz Cunh Mbanjdwnghsai caeuq Dwnghsai Cunh cungfaen fatok gij cozyung lienzhab dangjcihbu, gapbaenz aen cuj lienzhab guhhong, gibseiz daenghgeiq vunzmbanj daj Huzbwz、Guengjdoeng daengj sengj gih dauqranz haenx， gaemdawz gihbwnj cingzgvang; aeu bae mbanj guh senhconz caeuq lienzhab genjcaz dox giethab, guh daengz moix ngoenz cunzcaz 3 baez, hawj vunzlai mbouj doxcomz.

(Gunj Yicungh/滚亿忠)