Laeujsienghsanh dwg cungj canjbinj gih raeuz Cenzcouh Yen gag miz, dwg cungj canjbinj dilij byauhci Cungguek.

Laeujsienghsanh daj ciuhgeq daeuj cungj aeu haeuxnaz ndei guh liuhdaeuz, aeu gij raemx sam ga dah doxcomz haenx naengj laeuj ngauz laeuj, yungh gij guhfap cojcienz ngauz, caemhcaiq caeng coq ndaw gangngvax ce. Neix guh ok gij laeuj “saeklaeuj saw rongh, heiqlaeuj hom ndei, haeuj bak couh raen unq diemz, ndwnj roengz hoz raeuz ndei, heiq hom hawj vunz singjgaenj”, baengh gij daegsaek neix okmingz dangqmaz, miz daegdiemj maenhndei heuhguh“gwn liux mbouj hozhat, fiz le mbouj gyaeuj dot”. Cungj laeuj neix youq bi 1963、1979、1984、1989、1994 laebdaeb haj bi youq gwnz hoih daengx guek hoihbingz- laeuj ndaej bingzguh laeujmaenhndei guekgya gaep, ndaej gaiq ciengj- ngaenz, caemhcaiq laebdaeb bauj dwg gij mingzdaeuz laeuj mizmingz Guengjsae.

Gij Dinfwngz cojcienz guh Laeujsienghsanh daihgaiq ginggvaq doenghgij mbaek lajneix: Genj haeuxnaz ndei、ceh haeux、naengj haeux、langx ndwq、gyaux lwgndo、coq gang、fatnengz、fat ndwq、ngauz laeuj、faen gaep caeng ce、 ce nanz、doxcung、gienjniemh、baucang ok cangj daengj. Ndawde, coq gang- ngvax iq fatndwq aeu miz 10 daengz 12 ngoenz nanz; ngauz laeuz seiz mbouj aeu mboengq laeuj goek caeuq rieng le couh ndaej laeuj baenzndei; laeuj baenzndei gyaeng coq gangngvax hung fung ndei le ce bi ndeu doxhwnj.

2010 nienz 12 nyied 29 hauh, aen gihgou gaxgonq heuhguh Guek- gya Cizgenj Cungjgiz haenx baecinj henhoh“Laeujsienghsanh”guh cungj canjbinj dilij byauhci.

Haujlai bi daeuj, baengh gij dinfwngz cojcienz guhlaeuj, cungj laeuj neix ndaej gai bae ndaw guek gak swngj(gih)、si vanzlij ranghdieg Yanghgangj Aumwnz caeuq rog guek Meijgoz、Sinhgyahboh daengj. Aenvih dwg laeuj maenhndei guekgya gaep, Laeujsienghsanh gai bae lai、gai daengz dieg haemq gvangq, neix youq ndaw guek rog guek miz yingjyangj haemq lai.