Ranznden gou dwg song boux geq, songde cungj ndaej 60 lai bi, caeuq gou caemh aen danhvei. Songde miz daeglwg ndeu, gaenq baenzranz lo, hix youq yienhsingz youq, hoeng, mbouj caemh aen siujgih. Moix daengz couhmoz, de couh daiq yah daiq lwg gvaqdaeuj yawj bouxgeq caeuq bouxgeq caemh gwn. Song boux geq gig hab’eiq cungj fuengsik doxyouq neix.

Daxgoeng lumj duzvaiz, gaenx guh vah noix, maij caem. Daxbuz cix lumj duzlingz, vah lai, gyaez ning. Hwnjroengz mbaeklae、haeujok dou ranz, gou ciengz ndaejnyi sing gangj daxbuz, cix noix ndaejnyi sing gangj daxgoeng. Baenzlai bi gvaqdaeuj, songde hix gvaq ndaej gig doxhuz, noix doxceng doxndaq.

Miz vunz hozhaenz daxbuz, naeuz de haq ndaej bouxgvan ndei. Daxbuz naeuz:“Ndei dwg ndei, mboujgvaq baeuq neix vah daiq noix.” Hix miz vunz hojlienz daxbuz, naeuz ciuh vunz ndeu, youq ranz mbouj miz vunz caeuq de gangjgoj. Daxbuz naeuz:“Mbouj dwg lumj sou yienghneix gangj, goengbaeuq ranz gou mizseiz hix miz di yinxdaeuz ne.”

Vah doxgangj vunzlai lainoix cienz daengz ndaw rwz daxgoeng, de mbouj leixlangh gij vah neix, ndawsim gag ngeix: Onjonj caemcaem gvaq ndwenngoenz ceiq ndei.

Caemh youq nanz le, daxbuz mizseiz hix hozndat, ienqhaenq naeuz:“Baeuq ngoenhdawz neix ngoenz daengz haemh mbouj gangj saek coenz vah hix youq ndaej, beij gij baed ndaw miuh lai gaemz heiq ndeu ndwi.” Daxgoeng “hwhw” riu han:“Neix couh deng lo, bouxvunz lix couhdwg vih gaemz heiq neix ne.”

Daxbuz heiq gaz, gik ndaej caeuq de ceng.

Daxgoeng naeuz:“Ndwenngoenz seizcoz hawj goengloh caez lo, dawz canj gaem gvak, ndit dak fwn soen, youq gwnz roen hai roen coih roen, guh baenz 30 lai bi, sinhoj dangqmaz. Duiyouh le, baeg lo, aeu caemrwdrwd gvaq saedceij.”

Daxbuz naeuz:“Aenndang baengh ning, mbouj doengh mbouj ning gyaeu mbouj geq nw.”

Daxbuz haethaemh cungj gyaez bae gvangjcangz diuqfoux、ciengq go, miz haujlai baengzyoux. Nanz mbouj nanz caeuq gyoengq baengzyoux okrog bae lijyouz dem. Saedceij de gvaq ndaej nauhnauh yiedyied, angq riu mbouj sat. Daxgoeng cix maij youq ranz, guenj goq di va di faex iq yangzdaiz, saekseiz ngonz densi, saekseiz yawj di saw yawj di bauqceij, saekseiz dinghdingh naengh dwk, mbouj miz maz cabheiq. De nyinh- naeuz saedceij de hix gvaq ndaej miz sing miz saek.

Saedceij songde gak boux gag miz angq, byawz mbouj gaz byawz.

Mboengq ndeu, daxbuz nyinh- naeuz daxgoeng miz di mbouj dox- doengz: Daengxngoenz najnyaeuq, gwn mbouj lai, ninz mbouj onj. Daxbuz ndawsim gag ngeix: Haengjdingh miz maz saeh you lo.

Haetneix romhromh, daxgoeng couh hwnq mbonq lo, youq yangzdaiz dinghdingh naengh dwk, song da yawj coh gizgyae.

Haetneix, daxbuz mbouj bae diuqfoux, cix haeujsim bae cazyawj daxgoeng, raen daxgoeng naengh baenz aen lai cungdaeuz, mbouj doengh mbouj ning. Doeklaeng, daxbuz sing unq cam: “Baeuq, gou caeuq mwngz gvaq yaek ndaej ciuh lo, miz maz vah roxnaeuz saeh aeu caeuq gou gangj, gaej yo nw.”

Cam bae cam dauq geij baez, daxgoeng cij gazgwd naeuz:“Geij ngoenz gonq bae dijgenj, aen daep gou miz bingh.”

Daxbuz gip lo, naeuz:“Aeu mbaw dandijgenj daeuj gou yawj.” Daxgoeng dawz mbawdan hawj daxbuz yawj, aen daep de caen miz bingh dahraix.

Daxbuz ndawsim gig geizheih: Baeuq neix itcig mbouj dawz dai haeuj sim, ciengz naeuz dai miz maz ndeilau? Vunz cungj aeu dai baez ndeu. Baezneix de vihmaz baenzneix lau baenzneix you ni?

Daxbuz cam:“Di bingh neix youh mbouj dwg maz bingh naek, mwngz you maz ne?”

Daxgoeng naeuz:“Bingh naek bingh mbaeu gou cungj mbouj lau. Gou banneix nienzgeij, dai hix doh ciuh lo. Ciuhvunz gonqlaeng cungj miz ngoenz neix. Hoeng, siengj daengz ngoenz dai guh gij saeh haenx, gou couh lau lo.”

“Maz saeh ne?” Daxbuz youh cam.

Daxgoeng naeuz:“Fungsug dieg raeuz, vunz dai le guh begsaeh cauz- huhu. Yienznaeuz gou dai le maz saeh cungj mbouj rox, hoeng, seizneix siengj daengz ngoenzde, baenzlai vunz humx gou, roq gyong roq laz, boq loxlez, bouxdauh mo, bouxgimq ciengq, cauzhuhu baenz sam ngoenz sam hwnz. Siengj daengz neix gou lau lo, dungxmbouq ninz mbouj ndaek.”

Daxbuz raemxda rih roengzdaeuj, naeuz:“Caencik baengzyoux comz itheij, nauhyied soengq mwngz ya.”

Daxgoeng naeuz:“Mbouj, mbouj ngah! Gou gouz mwngz gienh saeh ndeu, ngoenz dai gou, cawz le vunz- ranz, mbouj cinj cingj caencik baengzyoux, boux ndeu cungj mbouj cingj, engq mbouj cinj roq gyong roq laz, boq loxlez. Hawj gou an’an dinghdingh bae, ndaej lwi?”

Daxbuz gangj mbouj ok vah, cij ndaej ngaekgyaeuj.

Daxgoeng mbouj cuengqsim caiq naeuz:“Mwngz aeu geiq maenh vah gou nw! Ciuq gij vah gou bae guh nw!”

Daxbuz naeuz:“Cuengqsim ba!”

Daxgoeng soeng gaemz heiq raezrangrang ndeu.

Daj seizhaenx hwnj, daxgoeng mbouj dawz bingh haeuj rwz. Daengz seiz gwn couh gwn, daengz seiz ninz couh ninz. Gvaq geij ndwen le, de bae yihyen fukcaz, gij bingh de ndei caez lo.

Ndwenngoenz youh lumj mwh- gonq nei, daxgoeng maij caem, daxbuz gyaez ning, gak boux gag miz angq.

Haemhneix, daxgoeng cawj caeuz ndei le, caj daxbuz dauq caemh gwn. Caj yaep dem yaep cungj mbouj raen dauq, dwk soujgih daxbuz hix mbouj ciep, daxgoeng yied daeuj yied youq mbouj onj lo, sim mbouq baenz maz.

Gvaqlaeng ciep ndaej yihyen denva, naeuz daxbuz hezyaz fwt hwnj sang, haeuj yihyen lo, cingq ciengj- gouq.

Caj daxgoeng caeuq daeglwg lwgbawx ganj daengz yihyen, daxbuz gaenq mbouj rox gangj vah lo, hwnzde couh gvaqseiq lo. Byawz cungj liuh mbouj daengz, daxbuz bae baenz vaiq. Bide daxbuz ngamq ndaej 68 bi. Daxgoeng cuengq sing daej baenz buenq ngoenz, byawz gienq cungj mbouj mbaet.

Mbwn rongh le, daxbuz deng dawz dauq ranzmbanj banh begsaeh.

Daeglwg cam:“Boh, begsaeh baenzlawz banh?”

Daxgoeng naeuz:“Meh mwngz gyaez nauhyied, riengz gij gyaez de banh ba, ciuq fungsug dieg raeuz banh.”

Daeglwg lwgbawx mbouj oksing, cij ciuq vah daxboh bae guh. Songde cingj bang vunz daeuj roq gyong laz, cingj song boux daeuj boq loxlez, cingj 7 bouxdauh daeuj mo, cingj yahgimq ndeu daeuj ciengq.

Daxgoeng dawz soujgih daxbuz okdaeuj, cug boux dwk denva hawj caencik baengzyoux, cingj gyoengqde daeuj diuqsang.

Ciuq fungsug dangdieg, begsaeh gonqlaeng guh baenz sam ngoenz sam hwnz, nauhyied dangqmaz. Begsaeh guh sat le, daxgoeng bingh lo, ninz youq mbonq geij ngoenz mbouj hwnq ndaej.

Daeglwg sim’in naeuz: “Boh, ciengz saeh neix, mwngz sinhoj lo.” Daxgoeng naeuz:“Neix mbouj suenq maz, gou lij miz saeh hung wnq daengq sou!”

Daeglwg aenq saeh mbouj ndei, mbouj gamj gangj lai lo. Daxgoeng heuh daeglwg、lwgbawx daeuj henz ndang, naeuz:“Sou aeu geiq maenh, ngoenz dai gou sou mbouj ndaej yienghneix banh begsaeh nw. Mbouj cinj roq gyong laz, mboujcinj boq loxlez, mboujcinj aeu dauh, mbouj cinj heuh gimq, mbouj cingj caencik baengzyoux, hawj gou caemcaem bae. Gou gaenq daengq gvaq meh sou, hoeng de gip lai, bae gonq lo. De vihmaz baenzneix gip ne? Gij saeh dapwngq gou de caengz guh ne……”

Daeglwg lwgbawx naeuz:“Boh, mwngz cuengqsim ba! Dou haengj- dingh ciuq vah mwngz bae guh. Mboujgvaq, mwngz aeu gwn ndei youq ndei, mbouj siengj baenzlai nw.”

Daxbuz gvaqseiq le, daeglwg daxgoeng heuh de bae caemhyouq, hoeng, daxgoeng mbouj ei bae, daeglwg hix mbouj rox baenzlawz guh, cij ndaej daengq gou boux ranznden neix haeujsim daxboh de, raen miz maz mbouj deng, couh hawj de dwk denva.

Gou ca mbouj geijlai ngoenz- ngoenz aeu haemq daxgoeng baez ndeu, mwh gwn ringz roxnaeuz gwn caeuz seiz, gou youq yangzdaiz ranz gaeq coh aen yangzdaiz ranz daxgoeng hemq:“Goeng, goeng, mwngz gwn caengz?”

Daxgoeng han naeuz:“Gwn gvaq lo.”

Couh yienghneix, boux cam boux dap, mbouj sai gangj lai coenz. Ndwenngoenz raez le, neix gaenq baenz cungj sibgvenq lo.

Daxgoeng gyaeu ndaej 85 bi. De gvaqseiq ngoenzde, daeglwg、lwgbawx hix dawz de ma ranzmbanj, hoeng, mbouj guh begsaeh, cij heuh caencik ndaw gyog daeuj caemh gwn donq ngaiz le, couh ram sang hwnj bo bae moek，caiq caemh gwn donq caeuz dem, couh suenq guh sat lo.

Vunzmbanj doiq gienh saeh neix, gangj sam gangj seiq, dingzlai vunz cungj naeuz lwgsai lwgbawx hauq doxmeh mbouj hauq doxboh. Daeglwg lwgbawx dingq le gij vah vunzmbanj, ndawsim nanzsouh raixcaix, hoeng, songde hix mbouj gejnaeuz.