Ndwen 1 ngoenz 18 banhaemh, aen vanjvei lienzvuen ndwencieng Vahcuengh Cungguek (Guengjsae) youq Nanzningz Si banh. Gaiq vanjvei Vahcuengh neix cawjdaez dwg “Guengjsae gyaeu- ndei cingz minzcuz doengzsim saedyienh loq Cungguek”, miz go、foux、roq gyong roq laz daengj gak cungj cezmuz gig miz daegsaek de. Yungh Fwencuengh danqhaenh seizdaih moq Cungguek, yungh Fouxcuengh langhbaij yienghndei moq Guengjsae; danqhaenh vut gungz gunggeng hengz- doengh, muengh siujgangh daengzcog gyaeundei. Vanjvei guh 2 lai aen cungdaeuz, cezmuz neiyungz fungfouq, ndeiyawj dangqmaz, gij feih coux ciengmoq noengznwd, cauhmoq diemjrongh lai, biujyienj ndeiyawj ndaej bouxyawj haenhnyau- nyau.

Vanjvei daengx ciengz yungh Vahcuengh cujciz caeuq yienjok, faen baenz “danqhaenh seizdaih moq、Guengjsae moq gyaeundei、Guengjsae moq ndei raeuh、caez saedyienh loqsiengj moq” seiq aen biencieng. Fwen goksasa hawj vunz gyaez; yiengh foux ndeiyawj, hawj vunz maij. Vanjvei Vahcuengh doenggvaq gofoux gyaeundei、roq gyong roq laz ndeidingq, daegsaek gyaeundei daengj gak cungj minzcuz yenzsu doxyungz caemhcaiq yienj okdaeuj, yienj baenz daiz heiq daegsaek Bouxcuengh mingzbeg、ndeiyawj、cienz ndaej gvangq ndeu.

Vanjvei lij laeb miz dangciengz caijfangj caeuq hothoh doxdoeng dem, youq mwh mbouj biujyienj, seiq boux bouxcujciz Vahcuengh byaij haeuj ndaw gyoengq vunz bae, yungh “Aeu vahmbanj danq- haenh guekcoj” “Gou aeu vahmbanj lwnh guekcoj” caeuq “Gou vih minzcuz doxgiet okrengz” daengj cawjdaez dangciengz caijfangj bouxyawj, yienznaeuz mbwn nit, hoeng gyoengq bouxyawj yiedcingz dangqmaz, hawj yienhciengz bienq ndaej engq nauhyied.(Liengz Cingz)