Aen haggeiz youh yaek byaij daengz byai lo, ndaw ban gyoengq hagseng cungj ceng faen ciengj miux gaenjcieng un gij cihsiz hag gvaq haenx, roengz dangz le hix gig noix raen gij ngaeuz gyoengqde youq lajroq doxgyaep lo.

Danz lauxsae yienh ndaej gig simhai, aenvih mboengqneix de fatyienh aen yienhsiengq gig ndei ndeu: Dah hagseng heuhguh Vangz Yungzvaz, vunz najnomj noix gangj vah, bingzseiz cingzcik mbouj suenq daegbied ndei, hoeng banhaet de cungj dwg ceiq caeux daeuj hagdangz, ngoenzngoenz cungj boux daih’it daeuj daengz ndaw ban.

Haetneix Danz lauxsae daengz hagdangz le, youh raen de daeuj daih’it lo, nyaenx mbouj ndaej couh geizheih cam de:“Yungzvaz, vihmaz mwngz moix haet cungj daeuj ndaej nyaenx caeux ha?”

Yungzvaz naj fwt hoengz lo, de launyaenq sing daemq han naeuz:“Aenvih gou ndaej daih’it, ndawsim gig angq, gij feih daih’it caen ndei.”

“Gij feih daih’it?” Danz lauxsae mbouj daiq mingzbeg, ngeizvaeg youh cam.

“Deng ha!” Yungzvaz lumj nyangz daengz boux baengzyoux ndei nanz lai mbouj ndaej raennaj nei depdep bak, nyinhcaen gangj:“Gou vunz maj ndaej mbouj suenq ndeiyawj, hagsib hix gig roengzrengz, hoeng cingzcik cij dwg itbuen, bingzseiz hix mbouj maij ning geijlai, dijyuz cingzcik hix mbouj suenq ndei. Youq ranz gou miz cej miz go, baihlaj youh miz dah nuengx he, baiz youq gyoengq beixnuengx cungqgyang, gou cungj mbouj miz saek yiengh ndaej daih’it, hix mbouj cimz gvaq gij feih “daih’it” dwg baenzlawz yiengh. Miz ngoenz ndeu, gou dingjlingz daeuj hagdangz ceiq caeux, boux daih’it daengz gyausiz, ndaej bang hai aen dou ban raeuz, bang uet cingh gyangjdaiz, gou roxnyinh gig simhai, ndigah gou couh roengz gietsim aeu ngoenzngoenz ceng’aeu boux daih’it daeuj daengz hagdangz lo.”

Dingq Yungzvaz gangj ndaej miz saek miz feih, Danz lauxsae dingq ndaej ngaezngwdngwd, sat le de gig unqswnh lumhlumh aen gyaeuj Yungzvaz, riunyumnyum naeuz:“Daeuj daih’it ndei, daeuj daih’it ndei.”

Hoeng haetneix hwnjdangz seiz, Danz lauxsae fatyienh Yungzvaz vunz naiqniekniek, naj moenghmedmed. Danz lauxsae byaij daengz henz ndang de, gvansim cam:“Yungzvaz, mwngz ngoenzneix baenzlawz la?”

“Danz lauxsae……” Yungzvaz ngamq hai bak couh miz di hozndaet lo, “Haetneix gou laihnaeuz lumj doenghbaez nei, gou lij dwg boux daih’it daengz gyausiz, byawz liuh, Vangz Gangh ceng bae lo. Bonjlaiz dou song boux itheij daeuj daengz hagdangz, hoeng de vih le aeu mauhgvaq gou, couh buet ndaej vaiqvaiq bae, gou buet mbouj gib de……” Yungzvaz gangj daengz neix, raemxda couh yaek ndik daengz gwnz dieg lo.

“O, yienghneix ha!” Danz laux- sae cienq dauq youh gangj naeuz:“Neix hix mbouj youqgaenj. Mwngz yawj, mwngz caeuq Vangz Gangh song boux yienghneix ndwn, gvaq mbiengj- neix yawj, Vangz Gangh dwg daih’it; gvaq mbiengjhaenx yawj, mwngz couhdwg daih’it.” Raen Yungzvaz mbouj caiq nanzgvaq lo, Danz lauxsae laebdaeb gangj, “Lij miz, danghnaeuz daj rangh neix yawj, mwngz hix dwg daih’it ne, baenzneix yawj vang yawj daengj mwngz cungj dwg daih’it ha……” Danz lauxsae doq gangj doq aeu fwngz beij veh.

“Eiya! Dwg ha, baenzneix gangj gou hix dwg daih’it ha!” Yungzvaz dingq le naj hai riunyumnyum, yawj ndaej ok de ndawsim diemzsisi. Danz lauxsae dawz Yungzvaz lox riu lo.

Daj baezde hwnj, Yungzvaz lumj dwg bienq boux vunz he lo, de moix ngoenz saenqsim cibcuk, vaiqvued ndaej lumj duzroeg seizcin cwxcaih youq ndaw nga ndaw nye mbin bae mbin dauq.

Danz lauxsae rox: Aen haggeiz daj goek byaij daengz byai, miz simnyap doeknaiq, miz maqmuengh simhai. Ceng mbouj ndaej gij wnq daih’it, dingjlingz fatyienh bonjfaenh aeu ndaej daeuj hagdangz daih’it, aiq aen daih’it gaenq youq ndawsim Yungzvaz hai va langh ok gij heiq rang lo, cix hawj dah hagseng ngamq doeg sam nienzgaep neix bienq ndaej vaiqvued sim’angq, miz saenqsim gvaq ndwenngoenz. Mboujguenj daj giz vang giz daengj daeuj yawj, neix dwg gienh saehndei.

Danz lauxsae roxnyinh dang lauxsae yied daeuj yied hwnjyinx lo!