Laujmoz caij ci coh aen ranz- cuengqco biucaucau. Baihsae, fwj- haemh ngongqmyigmyig, gwnzmbwn osumsum, lumjbaenz swiq gvaq nei seuqcingh. Raq rumzcou he liengz- sausau, baet deuz gij mokfaenx ndaw aek seuqsat. “Deng, doxgauq!” Naemj daengz aen geiqmaeuz neix, Laujmoz sim soengsadsad. Haemhneix, de mbouj lau mehyah mbonsaex lo.

Buenq bi gonq, Laujmoz riuj bog sawgauj he, bae ra cuzbanjse oksaw. Cuzbanjse bouxbien fan yawj sawgauj yaep he, haengjdingh naeuz:“Ndaej ok.” Laujmoz ndawsim baez angq, doq riuhehe ndenq ien hawj bouxbien. Bouxbien bibi fwngz:“Seizneix cuz- banjse gag guh gag gwn, mwngz yaek gag okcienz cij ndaej.” Laujmoz aensim doq caem, cam geijlai cienz. Bouxbien aeu bit youq gwnz ceij vehveh ngaeungaeu, doiq Laujmoz naeuz:“Oksaw, yaek cawx ceij, yaek yaenq saw, lij miz vunz saemj gauj. Suenq hwnjdaeuj, benhcizfei、 guenj- lijfei、 fazhingzfei doenghgij feiqyungh neix, yaek miz 6 fanh maenz cij ndaej.” “6 fanh?” Laujmoz bak aj- ngub.

De yaemhywx lo. 6 fanh maenz cienz, doiq aen ranz aeu gai byaek ma gvaq saedceij neix, gij soq neix hung daemx mbwn lo. Mbouj ok ma, bonj sawgauj neix de sij baenz 5 bi, ngamq 40 bi vunz, gyaeuj ndoq liux, hwet hix miz di goz lo. Bonjfaenh daj iq couh maijgyaez sij faenzcieng, gig mbouj yungzheih sij baenz bouh sawcuenh neix, mbouj ok saw de caen mbouj simlaemx.

Laujmoz baez haebheuj, haenq- sim ok saw. Hoeng baenzlawz haibak cam mehyah aeu cienz ni? Laujmoz ra mbouj ok gij banhfap ndei, couh yaeuh mehyah naeuz:“Cuzbanjse heuh gyau cienzat gonq, caj saw gai caez le, cienzat caeuq gaujfei mbatdog hawj raeuz.” Mehyah raen goenggvan ndaej ok saw, ndawsim hix vuenheij, hoeng raen yaepyet aeu bae 6 fanh maenz, de sim’in dangq cax heh. Hoeng, raen goenggvan ngoenz rongh haemh laep sij baenz geij bi, hix sim’unq lo. Byawz liuh, saw yaenq okdaeuj buenq bi lo, faen cienz cungj caengz raen haeuj daeh. Mehyah ngoenzngoenz dwen aeu cienz. Laujmoz baezbaez cungj riuhehe naeuz:“Gaej youheiq, gvaq duenh dem.”

Geij ngoenz neix, mehyah fatheiq lo. Laujmoz hix coeghoz dangqmaz. Ngoenzngoenz vih gienh saeh neix dungx goenjfoedfoed, mbouj rox baenzlawz dawz saw gai bae. Hax- baenh, Laujmoz youq gwnz gai nyoengx ci cetbyaij, dingjlingz yawj- raen baenz gyoengqvunz humx yawj maz, Laujmoz byaij gyawj bae ngonz, yienzlaiz dwg song meh vunz cingq doxceng. Vunz yied humx yied lai, Laujmoz cienq ndang byaijbyag. De doq byaij lij doq naemj. Sawqmwh, gij vunz humx ngonz doxceng haenx fwt saet haeuj ndaw uk de. De gag hemq coenz he “doxgauq”, yinx ndaej vunz henz gai cungj geizheih cim de.

Laujmoz naj haiyabyab itloh yamq haeuj ranz. Raen de angq loh gwnz naj, mehyah cim de:“Ndaej cienz la?” Laujmoz riuhehe:“Yaek ndaej lo, gvaq duenh dem.” “Gvaq duenh dem duenh, ok roet wngq bakma ha?” Laujmoz cingqging naeuz:“Gou yaek doxgauq.” “Dox- gauq?” Mehyah ngeizvaeg cim de. “Deng, miz vunz cau bonj saw gou, gou yaek gauq de boiz cienz.” “Baezit naeuz ok saw ndaej cauh cienz, seizneix youh naeuz doxgauq ndaej boiz cienz. Gou baenzlawz ndaej saenq mwngz.” Mehyah baenq ndang haeuj ranzdajcawj bae.

Laujmoz song gvanbaz youq yienhsingz baij aen dan gai byaekheu ndeu, gaenq ndaej 6 bi lai. Song gvanbaz hwnq caeux haeuj laep, cawz le gyau cienz ranzco, soengq daeglwg doegsaw, mbaet gwn mbaet yungh cij rom ndaej 10 fanh maenz cienz. Mehyah seiz mbouj seiz mbon ok cekromcienz, doq fan yawj doq riu ndaej bak aj mbouj haep:“Caiq rom sam seiq bi dem, raeuz hix youq ndaw singz cawx dauq ranz iq ndeu.” Laujmoz riu naeuz:“Baengh gai byaek rom cienz, deq daengz gaeqboux ok gyaeq bae.” “Gai iennamh, guhdoj couh ndaej vaiq lo, mwngz bae guh vei.” “Gij saeh yak neix, raeuz mbouj guh, yaek guh couh guh gij saeh habfap de.” “Mwngz baenzlai ak ne, lij daeuj rih byaek ma gai dem.” “Mwngz gaej daj geh dou yawj vunz, gou youq yienhsingz haj roek bi lo, mbouj miz saekdi cinbu ha?” Laujmoz nyinhcaen naeuz, “Gou yaek ok bonj saw he, cauh cienz.” Mehyah riu naeuz:“Seizneix bouxlawz yawj saw dem. Saw cienh gvaq byaekheu bae.” “Mwngz mbouj rox, gou baenzbaenz cungj yaek ok saw.” Mehyah raen de gagsaenq cibcuk, couh youzcaih de lo. Seizneix, buenq bi gvaqbae lo, faen cienz caengz raennaj. Mehyah nyaenx mbouj ndaej lo, yied mboen yied bakdeih, yied saex yied hozgaek. Laujmoz bak lox mehyah, ndawsim cix diuqbubbub mbouj onj. De hixnaengz okrog bae seiqlengq cetbyaij, ndaw uk cix doeng siengj sae ngeix. Cingqngamj de yawjraen vunz haw doxhumx ngonz nauhyied, daezsingj de naemj ok aen geiqmaeuz “dox- gauq” neix daeuj.

Gvaq geij ngoenz, Laujmoz iet fwngz cam mehyah aeu song fanh maenz cienz. Mehyah byaengqda cam:“Lij aeu cienz guh maz?” “Doxgauq yaek ra lizswh cij ndaej. Mbouj hawj cienz vunz, byawz bang mwngz buekhoh?” Mehyah hozndat naeuz:“Cienz ok saw caengz ndaej doxdauq, caiq aeu cienz bae cingj lizswh?” Laujmoz riuyaengyaeng naeuz:“Seiz- neix ok cienz iq, baezlaeng ndaej cienz hung, gauq hingz le, lij lau mbouj miz cienz ha.” Mehyah ndek cekromcienz hawj de:“Dawz bae, yungh liux couh sat lo.”

Ngoenz he sou dan maranz, mehyah gaem mbaw bauqceij ndeu ndenq hawj Laujmoz:“Mwngz baenz- lawz gauq Mungzngaeuj ha?” Laujmoz riunyumnyum naeuz:“Couhdwg gauq de, gauq de cij ndaej cienz.” Mungz- ngaeuj dwg bonjdieg boux cozgyah ceiq mizmingz ndeu, Laujmoz ciengz- seiz youq dangqnaj mehyah lwnh daengz de, naeuz de ciengzseiz caeuq Mungzngaeuj baedauq, lij doxcaemh gwn laeuj, Laujmoz sij faenzcieng, lij dwg baiq de guh lauxsae ne. Mehyah gae de:“Gauq de, gauq ndaej hingz ne, gou gvej rwz bae.”

Hagseng gauq lauxsae, gij saeh neix swhyienz yinx hwnj hoengh- dungq. Gicej daeuj ranz caijfangj Laujmoz, de gig nyinhcaen lied ok Mungzngaeuj haujlai giz cau bonj saw de, naeuz bouxvunzcawj ndaw saw dwg cau bonj saw de, naeuz daih geij cieng daih geij hangz cau gij vahgawq de…… Yienghneix, caengz haidingz, gij saeh cau saw neix couh youq gwnz bauqceij daengh okdaeuj, youq gwnz densi boq okdaeuj, cenglwnh fonfon. Haidaeuz, gyoengqvunz cungj mbouj rox Laujmoz dwg boux vunz yiengh- lawz, baez rox caennaj de, daihgya cungj mbouj saenq dwg Mungzngaeuj cau Laujmoz, dauq nyinhnaeuz dwg Laujmoz cau Mungzngaeuj. Miz vunz lij dawz song bonj saw daeuj doxbeij, caz ra gizlawz miz giz cau. Baengzyoux gienq Laujmoz doiqgauq suenq lo, mienx ndaej vaihnaj caeuq siengheiq. Laujmoz riunyumnyum mbouj han bak. Gienh saeh neix youq gwnz vangj yied cienz yied gvangq, haujlai vunz daj denva cam cuzbanjse aeu saw Laujmoz.

itsaemj ngeihsaemj baenz geij ndwen. Doeklaeng, fazyen buenq Laujmoz gauqsaw. 4 fanh maenz cienz doxgauq haenx, youz Laujmoz ok. Ndawranz cienz mbouj gaeuq, Laujmoz lij caeuq vunz ciq song fanh dembouj. Mehyah gikheiq ndaej swenjndaq mbouj dingz:“Ne! Ne! Raen lwi? Gou naeuz mbouj hingz ba! Gauq lauxsae, vaih mingz youh sai cienz.” Youh daejiekiek, “Cienz- rom gvet seuqsat, lij dawzcaiq haeuj ndang, gij saedceij neix baenzlawz gvaq ha?” Laujmoz dauq dwg onjdada, de riuyaengyaeng nai mehyah:“Gaej youheiq, haeux couh miz, noh couh miz, ranz hix cawx ndaej.”

Youh gvaq song ndwen, miz ngoenz he, Laujmoz daj baihrog din naekgywggywg yamq haeuj ranz, naiqnueknuek naeuz:“Vunz ci boiz caiq lo, baenzlawz guh? “Ne! Raen fangz luba. Ok saw ok saw, ok cienz couh saw. Bae guh gaujvaq ra gwn lo.” Mehyah laekgaek swenj, “Mbouj gvaq lo, doxliz suenq lo.” “Doxliz couh doxliz.” Laujmoz riuhehe ndenq cek- romcienz hawj mehyah, “Cekromcienz hawj mwngz, gou maz cungj mbouj aeu.” Mehyah vax dawz cekromcienz baez yawj, doeksaet yat:“20 fanh? Mwngz guhdoj roxnaeuz guhcaeg?” “Gou mbouj guhdoj, hix mbouj guh- caeg, gou ok saw cauh cienz, mbouj famhfap ba?” “Mbouj dwg doxgauq saw luma?” Laujmoz dauqfanj cam mehyah:“Mwngz youq gwnz gai raen vunz doxceng, siengj caenx haeujbae yawj lwi?” Raen mehyah lij mbouj singjsag, Laujmoz youh naeuz:“Mwngz ngoenzngoenz yawj densi, raen gij doxgaiq guh gvangjgau haenx, dwg mbouj dwg hix siengj bae cawx?”

“……” Mehyah fatmoengx cim de.

“Doxgauq couhdwg guh gvangj- gau. Rox lwi?” Laujmoz fwngz ceij cekromcienz, gag riu aengjsaeng, “Lauxsae gou hix cauh cienz bw.”

Doxgauq