Ciuhvunz dinjdetdet baez yaep da couh gvaqbae, miz mbangj boux gvaq ndaej cwxcwx caihcaih faen ngaenz mbouj nem ndang, miz mbangj vunz gaenx guh ak ngvanh dinfwngz maenh, yienznaeuz daengx ciuh dwgrengz hoeng dawz aen ranz guh dwk hoengh caiq fouqmiz, vunz rog raen cungj haenh. Lajneix gou daeuj gangj daeg mbauq gaenx guh ak ngvanh dinfwngz maenh he.

De dwg boux lwg daegbeix gou, heuhguh Daegcaiz, noix gou 4 bi, gou ngamq ndaej 4 bi hix deng de heuh daxau, de ngamq cunghconh bizyez, youq aen danhvei Namzningz he hwnjban guh dengungh, dwen daengz gizneix gou couh lai lwnh sou nyi de baenzlawz ndaej haeuj aen danhvei Namzningz bae hwnjban. De bizyez le itcig youq Namzningz Sambonj Daih- laeujdiemj guh dengungh, mwhnwngq Namzningz hwng dwk heiqbaizgiuz, gak aen danhvei cungj laeb aen doih ndeu daeuj caeuqfaenh gij doxdax heiqbaizgiuz, cingqngamj daeg mbauq neix dwk heiqbaizgiuz ak raixcaix, bouxdaeuz aen danhvei rox couh naemj banhfap dawz de gvaqbae haeuj ndaw bae guh dengungh, caemhcaiq haeuj aen doih heiqbaizgiuz bae.

Daegmbauq neix dinfwngz ak, de rox cang raemx cang dienh, de bae aen danhvei Namzningz le, dangh- naeuz roengzban ndaejhoengq, de couh bae ra hong guh, bang ranz moq bouxwnq rag dienh ciep raemx, guh sat dauq ranz ndeu couh ndaej ngaenzhong geij cien maenz. De gig roxsoq, bonjfaenh ra ndaej geijlai ngaenz couh sai geijlai, mbouj miz ngaenz yungh couh bae ra hong guh canh cienz, de mbouj lumj bouxwnq faenfaen yaek laeng bohmeh aeu. Miz baez ndeu youq dangqnaj gou, daxboh de ndenq 2000 maenz ngaenz hawj de naeuz:“Mwngz ngamq baenzgya, lwg youh yaek doegsaw, aeu gij ngaenz neix bae yungh bae.” De doq han mbouj aeu doq byaij ok dou bae.

Geij bi gonq Vujmingz hainduj ndaem makgambiz, de roxnyinh ndaem makgambiz canh cienz couh maranz nem bohmeh gangj yaek ndaem, daxboh de dai cungj mbouj hawj de ndaem, lij naeuz:“Mwngz youq Namzningz hwnjban caiq dauq- ma mbanjranz ndaem mak, daengz mwhde guenj mbouj gvaq lij siedbonj dem; mwngz mbouj ma guenj hawj bouxlaux bae guenj dwgrengz lai lo.” De han naeuz:“Gou yaek cawx ranz cawx ci gag di ngaenz hwnjban daengz ngoenz lawz cij rom ndaej gaeuq, gou gag ma ndaem coumued gag ma guenj.”

De gangj daengz guh daengz, singhgizhaj roengz ban le couh ma mbanjranz, mboujguenj fwn doek byaj raez roxnaeuz ndithaenq rumz rengz, singhgizroek caeuq ngoenzsinghgiz de cungj youq ndaw suen mak guenj mak. Ndaem mak hong lai: Bi dawz bwnh song baez aeu vat gumz song baez、ndwen sat song sam mbat yw、cawz nyaengq mbouj dingz、daet nyod, miz mak le yaek aeu faex aeu cag ma lamh hwnjdaeuj mbouj hawj aen mak daemj doem, roeb daengz mbwnrengx lij aeu raemx bae dwk mak, hoeng de gag guh gag haengjheiq, bineix ndaw suenmak de noix cungj miz 7 fanh gaen mak. De deng ndit cik dwk ndaemndaem ndingnding bae daengz Namzningz le gyoengqdoih cam de bae guh maz cik ndaej baenzlai ndaem? De yaeuh naeuz bae henz haij youz deng cik ndaem la. Ndaem 5 bi mak le, de ndaej cawx ci cawx ranz lo.

Mboengqgonq gou cam de:“Bineix gai mak sat le bae gizlawz lijyouz ha?” De naeuz:“Gij ngaenz gai mak faen baenz sam faenh, faenh ndeu aeu hawj bohmeh, faenh ndeu roengz giek ranzcoj, faenh ndeu aeu ma guh ngaenzgoek suenmak.” Nyi de gangj le gou roxnyinh daeg neix gvai dangqmaz, mbouj yungh cam gou cungj rox de yaek youq geij bi neix buek guh yaek rom ngaenz bae soengq lwg doegsaw、doeklaeng lwg doxaeu、ciengx laux bonjfaenh, gou guh daxau gag nyi gag najnyaenq caemh vih ndaw gyog gou miz boux vunz maenh neix angq raixcaix.